Imamat 15:1-33
-
Cairan tina alat kelamin nu nganajisan hiji jalma (1-33)
15 Yéhuwa neruskeun omongana-Na ka Musa jeung Harun,
2 ”Béjaan urang Israél, ’Lamun aya lalaki nu tina alat kelaminna kaluar cairan kawas nanah, éta cairan nyababkeun manéhna najis.
3 Boh cairanana terus kaluar boh mengpetan alat kelaminna, sarua waé manéhna najis.
4 ”’Di mana waé jalma nu gering éta saré, tempat saréna bakal jadi najis. Di mana waé manéhna diuk, nu didiukanana bakal jadi najis.
5 Saha waé nu antel kana tempat saréna kudu nyeuseuh bajuna jeung mandi. Manéhna bakal jadi najis nepi ka panonpoé surup.
6 Saha waé nu diuk dina urut diukna kudu nyeuseuh bajuna jeung mandi. Manéhna bakal jadi najis nepi ka panonpoé surup.
7 Saha waé nu antel kana jalma nu gering éta kudu nyeuseuh bajuna jeung mandi. Manéhna bakal jadi najis nepi ka panonpoé surup.
8 Lamun ciduh jalma nu gering éta keuna ka hiji jalma nu teu najis, éta jalma kudu nyeuseuh bajuna jeung mandi. Manéhna bakal jadi najis nepi ka panonpoé surup.
9 Sadel nu didiukan ku jalma nu gering éta bakal jadi najis.
10 Saha waé nu antel kana barang nu didiukan ku manéhna bakal jadi najis nepi ka panonpoé surup. Saha waé nu mawa barang urut diukna kudu nyeuseuh bajuna jeung mandi. Manéhna bakal jadi najis nepi ka panonpoé surup.
11 Lamun jalma nu gering éta nyabak batur padahal can ngumbah leungeun, nu dicabakna kudu nyeuseuh bajuna jeung mandi. Manéhna bakal jadi najis nepi ka panonpoé surup.
12 Lamun jalma nu gering éta nyabak wadah tina taneuh liket, éta wadah kudu dipeupeuskeun. Tapi lamun wadahna tina kai, éta wadah kudu dikumbah.
13 ”’Lamun éta jalma cageur jeung nanahna teu kaluar deui, manéhna kudu nyucikeun diri sanggeus tujuh poé. Manéhna kudu nyeuseuh bajuna jeung mandi maké cai tina cinyusu. Ku kituna, manéhna teu najis deui.
14 Dina poé kadalapan, manéhna kudu mawa dua tikukur atawa dua japati ngora ka hareupeun Yéhuwa di lawang asup kémah tepangan. Bikeun manuk-manukna ka imam.
15 Imam kudu ngabaktikeun manuk nu hiji keur kurban pangampura dosa sarta nu hiji deui keur kurban beuleuman. Imam kudu mangméntakeun pangampura di hareupeun Yéhuwa supaya éta jalma teu najis deui.
16 ”’Lamun aya hiji lalaki nu ngaluarkeun cimani, manéhna kudu mandi. Manéhna bakal jadi najis nepi ka panonpoé surup.
17 Baju atawa bahan kulit nu kacakclakan ku cimani kudu diseuseuh. Éta bakal jadi najis nepi ka panonpoé surup.
18 ”’Lamun aya hiji lalaki jeung hiji awéwé ngalakukeun hubungan séks, tuluy lalakina ngaluarkeun cimani, duanana kudu mandi. Maranéhna bakal jadi najis nepi ka panonpoé surup.
19 ”’Awéwé nu ngagetih lantaran haid bakal jadi najis salila tujuh poé. Saha waé nu antel ka manéhna bakal jadi najis nepi ka panonpoé surup.
20 Salila manéhna najis lantaran haid, di mana waé manéhna saré, tempat saréna bakal jadi najis. Urut diukna gé bakal jadi najis.
21 Saha waé nu antel kana tempat saré éta awéwé kudu nyeuseuh bajuna jeung mandi. Manéhna bakal jadi najis nepi ka panonpoé surup.
22 Saha waé nu antel kana barang nu didiukan ku éta awéwé kudu nyeuseuh bajuna jeung mandi. Manéhna bakal jadi najis nepi ka panonpoé surup.
23 Saha waé nu antel kana tempat saré atawa barang nu didiukan ku éta awéwé bakal jadi najis nepi ka panonpoé surup.
24 Lamun hiji lalaki ngalakukeun hubungan séks jeung hiji awéwé, tuluy éta lalaki keuna ku getih haid, manéhna bakal jadi najis salila tujuh poé. Di mana waé éta lalaki saré, tempat saréna bakal jadi najis.
25 ”’Lamun hiji awéwé ngagetih sababaraha poé padahal éta téh lain waktuna haid atawa ngagetihna leuwih lila tibatan biasana, manéhna bakal jadi najis salila manéhna ngagetih, sakumaha waktu manéhna keur haid.
26 Salila manéhna ngagetih, di mana waé manéhna saré atawa diuk, éta barang bakal jadi najis, sakumaha waktu manéhna keur haid.
27 Saha waé nu antel kana éta barang kudu nyeuseuh bajuna jeung mandi. Manéhna bakal jadi najis nepi ka panonpoé surup.
28 ”’Tapi lamun geus teu ngagetih deui, éta awéwé kudu nunggu tujuh poé deui. Geus kitu kakara manéhna teu najis.
29 Dina poé kadalapan, manéhna kudu mawa dua tikukur atawa dua japati ngora ka imam di lawang asup kémah tepangan.
30 Imam kudu ngabaktikeun manuk nu hiji keur kurban pangampura dosa sarta nu hiji deui keur kurban beuleuman. Imam kudu mangméntakeun pangampura di hareupeun Yéhuwa supaya éta awéwé teu najis deui.
31 ”’Kitu carana ngajaga urang Israél supaya teu najis. Ku kituna, maranéhna moal maot lantaran nganajisan tabernakel Kuring nu aya di tengah-tengah maranéhna.
32 ”’Éta hukum ngeunaan lalaki nu ngaluarkeun cairan kawas nanah, lalaki nu jadi najis lantaran ngaluarkeun cimani,
33 awéwé nu najis lantaran haid, lalaki nu terus ngaluarkeun cairan atawa awéwé nu terus ngagetih, sarta lalaki nu ngalakukeun hubungan séks jeung awéwé nu najis.’”
