Roma 6:1-23
6 Jadi kumaha? Urang kudu terus nyieun dosa kitu supaya welas asih Allah nu taya bandingna* jadi beuki gedé?
2 Nya henteu atuh! Pan kana dosa mah urang geus maot,* piraku urang téh hirup terus dina dosa?
3 Atawa aranjeun teu apal kitu yén urang kabéh nu dibaptis pikeun ngahiji jeung Isa Al-Masih, dibaptis ogé pikeun maot kawas manéhna?
4 Ku lantaran urang dibaptis pikeun maot kawas manéhna, urang dikuburkeun bareng jeung manéhna, supaya urang gé ngajalankeun hirup nu anyar sakumaha Al-Masih nu dihirupkeun deui ku kawasa Bapana.
5 Lamun urang ngahiji jeung manéhna waktu urang maot kawas manéhna, nya tangtu urang gé bakal ngahiji jeung manéhna waktu urang dihirupkeun deui kawas manéhna.
6 Sabab urang apal, kapribadian urang nu heubeul geus dipakukeun dina tihang bareng jeung manéhna supaya urang teu dikawasaan ku awak nu pinuh ku dosa. Ku kituna, urang teu diperbudak deui ku dosa.
7 Ari geus maot mah jelema téh bébas* tina dosana.
8 Salian ti éta, lamun urang maot bareng jeung Al-Masih, urang yakin urang gé bakal hirup bareng jeung manéhna.
9 Urang apal, sanggeus Al-Masih dihirupkeun, manéhna teu maot deui. Maot teu bisa ngawasaan manéhna deui.
10 Manéhna maot sakali keur salilana pikeun mupus dosa. Tapi ayeuna manéhna hirup, jeung hirupna dipaké pikeun ngalakukeun kahayang Allah.
11 Kitu ogé aranjeun kudu nganggap yén kana dosa mah aranjeun geus maot, tapi ayeuna hirup pikeun ngalakukeun kahayang Allah salaku murid Isa Al-Masih.
12 Ku kituna, ulah nepi ka dosa ngawasaan aranjeun siga raja. Napsu tina awak nu bisa maot ulah dituturkeun.
13 Ulah masrahkeun awak aranjeun ka dosa pikeun jadi alat jang nyieun kajahatan. Tapi, pasrahkeun diri aranjeun ka Allah salaku jalma-jalma nu geus maot jeung dihirupkeun deui. Pasrahkeun ogé awak aranjeun ka Allah pikeun jadi alat jang ngalampahkeun nu bener.
14 Dosa ulah jadi dunungan aranjeun, sabab aranjeun ayeuna teu diparéntah ku hukum Torét deui, tapi geus narima welas asih Allah nu taya bandingna.*
15 Jadi ayeuna kumaha? Meunang kitu urang nyieun dosa pédah geus narima welas asih Allah nu taya bandingna* jeung teu diparéntah deui ku hukum Torét? Tangtu henteu!
16 Aranjeun teu apal kitu, lamun aranjeun teterusan nurut ka saurang jalma, aranjeun jadi palayanna? Lamun aranjeun jadi palayanna dosa, aranjeun bakal maot. Tapi lamun aranjeun jadi palayanna Allah jeung nurut ka Anjeunna, aranjeun bakal disebut jalma bener.
17 Tapi sukur ka Allah, sanajan aranjeun téh baheulana palayan dosa, ayeuna aranjeun réla taat kana pangajaran nu ditarima ku aranjeun.
18 Lantaran geus dibébaskeun tina dosa, aranjeun jadi palayanna Allah jeung ngalampahkeun hal nu bener.
19 Ku lantaran aranjeun condong kana dosa, kuring ngomong maké kekecapan nu gampang kaharti. Baheula, awak aranjeun diperbudak ku napsu pikeun ngalakukeun hal-hal nu najis jeung jahat. Jadi ayeuna, awak aranjeun kudu diperbudak ku kahayang pikeun ngalakukeun hal-hal nu bener jeung suci.
20 Sabab waktu masih kénéh diperbudak ku dosa, aranjeun teu wajib ngalakukeun nu bener.
21 Jadi, naon hasil lalampahan aranjeun nu baheula téh? Hal-hal nu ayeuna mah matak aranjeun éra, da apal hasilna téh maot.
22 Tapi ayeuna, sanggeus aranjeun dibébaskeun tina dosa jeung jadi palayanna Allah, aranjeun ngalakukeun hal-hal nu suci, jeung hasilna téh hirup langgeng.
23 Upahna dosa téh maot, tapi kurnia Allah mah hirup langgeng ku jalan Isa Al-Masih Juragan urang.
Catetan Tambihan
^ Tingali Daptar Istilah.
^ Atawa ”Pan urang geus teu dikawasaan ku dosa”.
^ Atawa ”dihampura”.
^ Tingali Daptar Istilah.
^ Tingali Daptar Istilah.
