Yosua 4:1-24
-
Batu-batu keur ngingetan urang Israél (1-24)
4 Sanggeus kabéh jalma meuntasan Walungan Yordan, Yéhuwa ngomong kieu ka Yosua,
2 ”Pilih 12 lalaki ti bangsa ieu, saurang ti unggal kaom,
3 jeung paréntahkeun maranéhna, ’Pék cokot 12 batu nu aya di tengah-tengah Walungan Yordan, tempatna imam-imam narangtung. Bawa batu-batu éta tuluy teundeun di tempat maranéh meuting.’”
4 Jadi, Yosua ngageroan 12 lalaki nu dipilih ti antara urang Israél, saurang ti unggal kaom.
5 Yosua ngomong ka maranéhna, ”Jung indit ka tengah-tengah Walungan Yordan, ka hareupeun peti perjangjian Yéhuwa Allah maranéh. Maranéh kudu nyokot batu hiji séwang tuluy panggul, hiji batu keur unggal kaom Israél,
6 pikeun jadi tanda keur maranéh. Lamun engké anak-anak maranéh nanya kieu, ’Ku naon batu-batu éta bet diteundeun di dieu?’
7 pék jawab, ’Batu-batu éta aya di dieu téh supaya urang Israél inget salilana kana kajadian di dieu,* lantaran cai Walungan Yordan eureun ngalir waktu peti perjangjian Yéhuwa digotong meuntasan walungan éta.’”
8 Jadi, 12 lalaki éta ngajalankeun paréntah Yosua. Maranéhna nyokot 12 batu ti tengah-tengah Walungan Yordan nurutkeun jumlah kaom Israél, sakumaha nu diparéntahkeun ku Yéhuwa ka Yosua. Batu-batu éta dibawa ka tempat maranéhna meuting tuluy diteundeun di dinya.
9 Yosua gé nyusun 12 batu di tengah-tengah Walungan Yordan, di tempat nangtungna imam-imam nu ngagotong peti perjangjian. Batu-batu éta aya kénéh nepi ka ayeuna.
10 Imam-imam nu ngagotong peti éta terus nangtung di tengah-tengah Walungan Yordan nepi ka bangsa éta ngalaksanakeun sakabéh paréntah Yéhuwa nu ditepikeun ku Yosua. Éta téh sajalan jeung sakabéh paréntah Musa ka Yosua. Ari bangsa éta buru-buru meuntas.
11 Sanggeus sakabéh jalma meuntas, peti perjangjian Yéhuwa jeung imam-imam gé meuntas bari disaksian ku kabéhan.
12 Kaom Rubén, kaom Gad, jeung satengah ti kaom Manasyé meuntas di hareupeun urang Israél séjénna bari siap tempur, sakumaha paréntah Musa ka maranéhna.
13 Aya kira-kira 40.000 prajurit nu mawa senjata meuntas ka Gurun Keusik Yérikho disaksian ku Yéhuwa.
14 Dina poé éta, Yéhuwa ngalantarankeun Yosua dihormat ku sakabéh urang Israél. Maranéhna hormat pisan* ka Yosua salila manéhna hirup, sakumaha maranéhna hormat pisan ka Musa.
15 Tuluy Yéhuwa ngomong ka Yosua,
16 ”Paréntahkeun imam-imam nu ngagotong peti Kasaksian sina kaluar ti Walungan Yordan.”
17 Jadi Yosua maréntahkeun imam-imam, ”Geura kalaluar ti Walungan Yordan.”
18 Waktu imam-imam nu ngagotong peti perjangjian Yéhuwa kaluar ti tengah-tengah Walungan Yordan jeung suku maranéhna napak kana taneuh nu garing, ger Walungan Yordan ngalir deui jeung caina mudal ka sisi walungan siga saacanna.
19 Bangsa éta meuntasan Walungan Yordan dina poé nu kasapuluh bulan nu kahiji. Maranéhna masang kémah di Gilgal di wates Yérikho beulah wétan.
20 Ari 12 batu nu dicokot ti Walungan Yordan téa ku Yosua disusun di Gilgal.
21 Tuluy manéhna ngomong ka urang Israél, ”Lamun engké anak-anak maranéh nanya kieu, ’Naon hartina batu-batu ieu téh?’
22 jelaskeun kieu ka anak-anak maranéh, ’Bangsa Israél pernah meuntasan Walungan Yordan nu geus garing.
23 Harita, Yéhuwa Allah urang nyaatkeun cai Walungan Yordan keur maranéhna ngarah bisa dipeuntasan, sakumaha Yéhuwa Allah urang nyaatkeun Laut Beureum keur urang ngarah bisa dipeuntasan.
24 Éta dilakukeun ku Yéhuwa téh supaya sakabéh bangsa di bumi nyaho sakumaha gedéna kawasa Anjeunna sarta supaya urang terus hormat* ka Yéhuwa Allah urang.’”
Catetan Tambihan
^ Atawa ”supaya jadi pangéling nu langgeng keur urang Israél”.
^ As. ”sieun”.
^ As. ”sieun”.
