Yosua 5:1-15
5 Kabéh raja urang Amori di beulah kulon* Walungan Yordan jeung kabéh raja urang Kanaan di deukeut laut ngadéngé Yéhuwa geus nyaatkeun cai Walungan Yordan keur urang Israél ngarah bisa dipeuntasan. Maranéhna jadi sieuneun jeung teu wani* ngalawan urang Israél.
2 Harita, Yéhuwa ngomong ka Yosua, ”Sok jieun péso tina batu jeung ayakeun deui sunatan keur lalaki Israél nu kadua kalina.”
3 Jadi, Yosua nyieunan péso tina batu tuluy lalaki Israél disarunatan di Gibéat-haaralot.*
4 Ieu alesanna Yosua nyunatan maranéhna: Kabéh lalaki nu budal ti Mesir, nyaéta kabéh prajurit,* geus maraot salila ngumbara di gurun keusik.
5 Kabéh jalma nu budal ti Mesir téh geus disarunatan, tapi kabéh jalma nu lahir salila ngumbara di gurun keusik sanggeus budal ti Mesir mah can disarunatan.
6 Bangsa Israél ngumbara salila 40 taun di gurun keusik nepi ka sakabéh prajurit nu budal ti Mesir téa maraot lantaran teu nurut kana paréntah Yéhuwa. Yéhuwa sumpah yén maranéhna moal bakal ningali nagri nu limpah ku susu jeung madu, sanajan Yéhuwa geus sumpah ka karuhun maranéhna yén nagri éta rék dibikeun ka umat-Na.*
7 Jadi, maranéhna digantikeun ku barudak lalakina. Barudak lalakina ieu nu disunatan ku Yosua téh, lantaran salila ngumbara maranéhna can disunatan.
8 Sanggeus kabéhanana disarunatan, maranéhna cicing di pakémahan nepi ka cageur.
9 Tuluy Yéhuwa ngomong ka Yosua, ”Ku lantaran naon nu dilakukeun ku Kuring poé ieu, urang Mesir moal ngaléléwé maranéh deui.”* Éta sababna nepi ka ayeuna tempat éta disebut Gilgal.*
10 Bangsa Israél terus cicing di pakémahan di Gilgal di Gurun Keusik Yérikho. Dina poé nu ka-14 bulan éta, peutingna, maranéhna ngarayakeun Paskah.
11 Sapoé sanggeus Paskah, maranéhna mimiti ngadahar roti nu teu diragian jeung sisikian nu disangray, nyaéta hasil tanah di dinya.
12 Dina poé bangsa Israél ngadahar hasil tanah di dinya, manna teu muncul deui. Ti mimiti taun éta, maranéhna ngadahar hasil tanah di Kanaan.
13 Hiji poé pas keur aya di deukeut Yérikho, Yosua ningali saurang lalaki nangtung bari nyekel pedang. Ku Yosua disampeurkeun jeung ditanya, ”Manéh téh balad atawa musuh?”
14 Manéhna ngajawab, ”Lain duanana, urang datang salaku panglima* tentara Yéhuwa.” Bruk Yosua sujud jeung ngomong ka manéhna, ”Juragan badé nepikeun naon ka palayan Juragan ieu?”
15 Panglima tentara Yéhuwa ngajawab kieu, ”Laanan sendal manéh, sabab tanah nu ditincak ku manéh téh suci.” Ku Yosua langsung diturut.
Catetan Tambihan
^ As. ”di sisi nu nyanghareup ka laut ti”.
^ As. ”jeung euweuh nu sumanget deui”.
^ Hartina ”Pasir Kulit Khitan”.
^ Atawa ”para lalaki nu geus cukup umur milu perang”.
^ As. ”ka urang”.
^ As. ”Poé ieu, Kuring geus ngagulingkeun hinaan Mesir ti maranéh”.
^ Hartina ”Ngagulingkeun”.
^ Atawa ”pamingpin”.
