Yosua 8:1-35
8 Tuluy Yéhuwa ngomong ka Yosua, ”Ulah sieun atawa geumpeur. Bawa kabéh prajurit jeung serang kota Ai. Tuh, Kuring geus nyerahkeun raja Ai, rahayatna, kotana, jeung nagrina ka manéh.
2 Musnakeun kota Ai jeung rajana, sarua siga kota Yérikho jeung rajana, tapi ayeuna mah harta bandana jeung ingon-ingonna meunang dijarah keur maranéh. Siapkeun pasukan di tukangeun kota supaya bisa nyerang ngadadak kota éta.”
3 Jadi, Yosua jeung kabéh prajurit indit rék merangan Ai. Yosua milih 30.000 prajurit anu perkasa jeung nitah maranéhna indit peuting-peuting.
4 Manéhna maréntahkeun, ”Maranéh kudu nyumput di tukangeun kota supaya bisa nyerang éta kota. Tapi ulah jauh teuing, sarta maranéh kudu siap.
5 Ari urang jeung prajurit nu bareng jeung urang mah rék ngadeukeutan kota éta. Waktu maranéhna nyalampeurkeun rék ngalawan siga saacanna, urang kabéh rék kabur.
6 Maranéhna bakal ngudag, da disangkana urang kabéh rék kabur siga saacanna. Tapi sabenerna, éta téh keur mancing maranéhna sina ngajauh ti kota.
7 Engké maranéh kudu kaluar ti panyumputan jeung ngarebut éta kota. Yéhuwa Allah maranéh bakal nyerahkeun éta kota ka maranéh.
8 Sanggeus direbut, gancang duruk éta kota. Laksanakeun éta kabéh sakumaha firman Yéhuwa. Tah éta paréntah ti urang.”
9 Tuluy Yosua nitah maranéhna indit. Bral maranéhna indit ka tempat panyumputan, nyaéta di antara Bétel jeung Ai, di kuloneun Ai. Ari Yosua meuting bareng jeung prajurit séjénna.
10 Isukna, Yosua hudang isuk-isuk jeung ngumpulkeun pasukanna. Manéhna jeung para kokolot Israél mawa maranéhna ka Ai.
11 Kabéh prajurit nu bareng jeung manéhna baris jeung maju ka hareupeun kota éta. Maranéhna masang kémah di kaléreun Ai. Aya lebak di antara maranéhna jeung Ai.
12 Ari Yosua geus misahkeun kira-kira 5.000 prajurit sina nyarumput di antara Bétel jeung Ai, di kuloneun kota éta. Maranéhna geus siap nyerang.
13 Jadi, pasukan nu utama masang kémah di kaléreun kota, ari pasukan nu nyumput aya di kuloneun kota éta. Peutingna, Yosua indit ka tengah-tengah lebak.
14 Barang raja Ai ningali hal éta, isuk-isuk kénéh manéhna jeung para lalaki di kota éta gancang ngadatangan urang Israél rék merangan maranéhna di hiji tempat di hareupeun lebak. Tapi, manéhna teu nyahoeun aya pasukan nu nyumput di tukangeun kota jeung geus siap nyerang.
15 Waktu diserang ku urang Ai, Yosua jeung kabéh prajurit Israél lalumpatan ka gurun keusik.
16 Tuluy kabéh jalma nu aya di jero kota dititah ngudag urang Israél. Ku sabab ngudag Yosua, maranéhna jadi beuki jauh ti kota.
17 Kabéh lalaki nu aya di Ai jeung Bétel kalaluar ngudag urang Israél. Kotana diculkeun jeung gerbangna molongo.
18 Geus kitu Yéhuwa ngomong ka Yosua, ”Tumbak nu dicekel ku manéh arahkeun ka kota Ai, sabab Kuring rék nyerahkeun kota éta ka manéh.” Jadi, Yosua ngarahkeun tumbakna ka kota éta.
19 Barang Yosua ngangkat leungeunna, pasukan nu nyarumput téa gancang kalaluar, lalumpatan ka kota, jeung ngarebut kota éta. Gur kota éta langsung diduruk ku maranéhna.
20 Waktu urang Ai ngalalieuk ka tukang, haseup kota éta geus ngebul nepi ka langit. Maranéhna geus teu bisa lumpat ka mamana. Urang Israél anu lalumpatan ka gurun keusik malik ngudag maranéhna.
21 Yosua sarta para prajuritna ningali kota éta geus direbut ku pasukan nu nyumput téa jeung ningali haseup kota éta geus ngebul. Jadi, maranéhna malik nyerang urang Ai.
22 Ari pasukan Israél nu di kota kalaluar rék milu nyerang, jadi urang Ai kajebak di tengah-tengah dua pasukan Israél. Kabéh urang Ai dipaéhan nepi ka euweuh nu bisa salamet atawa lolos.
23 Tapi, raja Ai ditéwak hirup-hirup tuluy dibawa ka Yosua.
24 Sanggeus urang Israél ngudag jeung maéhan kabéh urang Ai ku pedang di gurun keusik, maranéhna balik deui ka Ai jeung nyerang kota éta ku pedang.
25 Kabéh urang Ai nu dipaéhan dina poé éta, boh lalaki boh awéwé, aya 12.000 urang.
26 Yosua terus ngarahkeun tumbak nu aya dina leungeunna nepi ka kabéh penduduk Ai dibasmi.
27 Tapi, urang Israél ngajarah harta banda jeung ingon-ingon di kota éta keur maranéhna, sakumaha nu diparéntahkeun ku Yéhuwa ka Yosua.
28 Tuluy Yosua ngaduruk kota Ai, ruruntuhanana ngagunduk nepi ka ayeuna.
29 Ari raja Ai ku Yosua digantung dina tihang* nepi ka soré. Pas panonpoé rék surup, Yosua maréntahkeun supaya mayitna diturunkeun tina tihang. Tuluy mayitna dialungkeun ka gerbang kota jeung dibugbrugan ku batu. Tumpukan nu gedé éta aya kénéh nepi ka ayeuna.
30 Harita, Yosua nyieun mézbah keur Yéhuwa Allah Israél di Gunung Ébal,
31 sakumaha paréntah Musa hamba Yéhuwa ka bangsa Israél jeung sakumaha nu ditulis dina buku Hukum Musa, nyaéta ”mézbah tina batu-batu weuteuh nu can pernah dikukumaha ku pakakas beusi”. Di luhureun mézbah éta, maranéhna méré korban beuleuman jeung korban karukunan keur Yéhuwa.
32 Tuluy dina batu-batu, Yosua nyalin Torét, nyaéta nu pernah ditulis ku Musa di hareupeun bangsa Israél.
33 Kabéh urang Israél, para kokolot, para pamingpin, jeung para hakim narangtung di beulah kénca jeung katuhu peti perjangjian di hareupeun imam-imam Léwi nu ngagotong peti perjangjian Yéhuwa. Boh urang Israél asli boh urang asing araya di dinya. Nu satengah narangtung di hareupeun Gunung Gérizim, ari nu satengah deui narangtung di hareupeun Gunung Ébal. Kitu carana urang Israél diberkahan, sakumaha nu geus diparéntahkeun ku Musa hamba Yéhuwa.
34 Geus kitu, ku sora nu tarik Yosua macakeun sakabéh eusi Torét, nya berkahna nya kutukanana, sakumaha nu ditulis dina buku Torét.
35 Sakabéh paréntah Musa dibacakeun ku Yosua, euweuh nu kaliwat. Dibacakeunana ku sora nu tarik di hareupeun sakabéh jamaah Israél, kaasup awéwé, budak leutik, jeung urang asing nu cicing* bareng jeung maranéhna.
