1. Saha nu bisa méré nyaho urang cara ibadah nu bener ka Allah?

KALOLOBAAN agama ngakuna ngajarkeun bebeneran ngeunaan Allah. Tapi éta téh teu mungkin, sabab pangajaran unggal agama ngeunaan Allah jeung cara ibadah ka Mantenna téh teu sarua. Ti mana urang nyaho carana ibadah nu bener ka Allah? Mung Yéhuwa nu bisa masihan terang urang kumaha sakuduna ibadah ka Mantenna.

2. Kumaha Sadérék bisa diajar cara ibadah nu bener ka Allah?

² Yéhuwa masihan urang Kitab Suci supaya urang bisa diajar cara ibadah nu bener ka Mantenna. Jadi, Sadérék perlu diajar Kitab Suci. Yéhuwa bakal ngabantu Sadérék narima mangpaat tina pangajarana-Na lantaran Mantenna nyaah pisan ka Sadérék.​—Yesaya 48:17.

3. Naon nu dipiharep Allah ti urang?

³ Ceuk loba jalma, Allah narima sakabéh agama. Tapi, teu kitu nu diajarkeun ku Yésus mah. Ceuk Yésus, ”Lain anu ngan semet nyambat ka Kami: ’Gusti, Gusti!’ anu bakal asup ka [Karajaan] sawarga teh, tapi anu ngalampahkeun pangersa Ama Kami nu di sawarga.” Jadi, urang perlu nyaho naon kahoyong Allah, terus ngalaksanakeunana. Ieu téh hal nu sérius lantaran Yésus nyaruakeun jalma-jalma nu teu taat jeung jalma-jalma jahat atawa ”durjana-durjana”.​—Mateus 7:21-23.

4. Ceuk Yésus, naon nu bakal disanghareupan lamun hayang ngalaksanakeun kahoyong Allah?

⁴ Yésus ngingetan urang, lamun hayang ngalaksanakeun kahoyong Allah, urang bakal nyanghareupan  tangtangan. Ceuk Yésus, ”Heug arasup teh ka lawang nu leutik; sabab loba jelema nu geus marilih asup ka lawang anu rubak tur jalanna gede, eta mah brasna kana picilakaeun. Sabab sanajan leutik lawangna sarta heurin jalanna, tapi ahirna matak bagja jamuga; ngan nya kitu, nu milih jalan ieu mah ngan saeutik.” (Mateus 7:13, 14, Sunda Formal) Jalan nu leutik, atawa cara ibadah nu bener ka Allah, brasna kana hirup langgeng. Tapi, lamun jalan nu gedé, atawa cara ibadah nu salah ka Allah, brasna kana kabinasaan. Yéhuwa teu miharep saurang gé binasa. Yéhuwa masihan kasempetan ka unggal jalma supaya diajar ngeunaan Mantenna.​—2 Petrus 3:9.

5. Ti mana urang bisa ngabédakeun jalma-jalma nu ibadah ka Allah ku cara nu bener?

⁵ Yésus ngajelaskeun yén urang bisa ngabédakeun jalma-jalma nu ibadah ka Allah ku cara nu bener. Éta bisa kaciri tina kapercayaan jeung tingkah laku maranéhna. Ceuk Yésus, ”Maraneh baris nyaho ka maranehna tina tingkah lakuna . . . Tangkal alus buahanana tangtu alus.” (Mateus 7:16, 17) Éta lain hartina jalma-jalma nu ibadah ka Allah téh manusa nu sampurna. Tapi, maranéhna ngupayakeun pikeun ngalakukeun nu bener. Ayeuna, hayu urang tingali ciri-cirina.

6, 7. Naon sababna ibadah nu sajati téh pangajaranana dumasar kana Kitab Suci? Naon nu bisa urang conto ti Yésus?

⁶ Pangajaranana dumasar kana Kitab Suci. Kitab Suci ngajelaskeun, ”Eusi Kitab Suci, sagemblengna wahyu ti Allah, sarta mangpa’at pikeun ngawurukkeun kayaktian, pikeun ngaweweleh anu salah, pikeun ngomean kasalahan, jeung pikeun nungtun kana hirup bener, supaya jelema anu ngabdi ka Allah lengkep  sampurna kanyahona kana sagala rupa lampah nu hade.” (2 Timoteus 3:16, 17) Rasul Paulus ngomong kieu ka urang Kristen, ”Eta amanat ti Allah anu ditepikeun ku sim kuring teh ku aranjeun ditarima jeung dipercaya, yen lain beja ti manusa, tapi amanat ti Allah.” (1 Tesalonika 2:13) Jadi, ibadah nu sajati téh pangajaranana dumasar kana Firman Allah, nyaéta Kitab Suci, lain kana pamikiran manusa, tradisi, atawa nu séjénna.

⁷ Kabéh nu diajarkeun ku Yésus dumasar kana Firman Allah. (Baca Yohanes 17:17.) Yésus ogé sering nyutat Firman Allah. (Mateus 4:4, 7, 10) Hamba-hamba Allah nu sajati nyonto ka Yésus. Pangajaran maranéhna dumasar kana Kitab Suci.

8. Naon nu diajarkeun ku Yésus ngeunaan ibadah ka Yéhuwa?

⁸ Ibadah urang kudu ka Yéhuwa. Jabur 83:19 nyebutkeun, ”Mung Gusti nu jumeneng PANGERAN [Yéhuwa, NW], anu murbeng sakuliah jagat.” Yésus hayang jalma-jalma kenal ka Allah nu bener. Yésus ogé ngajarkeun nami Allah ka maranéhna. (Baca Yohanes 17:6.) Ceuk Yésus, ”Maneh kudu nyembah ka Pangeran [Yéhuwa, NW], Allah maneh. Ngan Mantenna anu kudu dibakti!” (Mateus 4:10) Jadi, salaku hamba-hamba Allah, urang nyonto ka Yésus. Ibadah urang ngan ka Yéhuwa, urang ngagunakeun nami-Na, ogé ngajarkeun nami Allah sarta naon nu bakal dilakukeun ku Mantenna.

9, 10. Kumaha carana némbongkeun kanyaah urang?

⁹ Urang kudu bener-bener nyaah ka batur. Yésus ngajar murid-muridna sangkan silih pikanyaah, urang gé kitu ayeuna. (Baca Yohanes 13:35.) Teu sual ti mana asalna, budayana, beunghar atawa miskin, kanyaah ngahijikeun urang dina duduluran. (Kolosa 3:14) Ku kituna,  urang teu milu perang jeung maéhan batur. Kitab Suci ngajelaskeun, ”Ari bedana antara putra-putra Allah jeung anak-anak Iblis teh tetela pisan, nya eta: Sing saha anu lampahna teu bener jeung teu nyaah ka dulur, eta lain putra Allah.” Ayat séjénna méré nyaho, ”Kudu silih pikanyaah. Urang ulah cara Kain. Kain anak Iblis, geus tega maehan Habil, adina sorangan.”​—1 Yohanes 3:10-12; 4:20, 21.

¹⁰ Urang ngagunakeun waktu, tanaga, jeung sumber daya pikeun silih bantu jeung ngagedékeun haté. (Ibrani 10:24, 25) Urang ”getol migawe kahadean ka sing saha bae”.​—Galata 6:10.

11. Naon sababna urang yakin yén Yésus téh jalan ka Allah?

¹¹ Urang kudu taat ka Yésus sabab anjeunna téh jalan ka Allah. Ceuk Kitab Suci, ”Anjeunna, sareng mung Anjeunna bae anu tiasa nyalametkeun manusa teh. Di saalam dunya teu aya deui manusa anu ku Allah dipaparin kawasa nyalametkeun, mung Yesus Kristus.” (Rasul 4:12) Di pasal 5, urang geus diajar yén Yéhuwa ngutus Yésus pikeun jadi tebusan keur jalma-jalma nu taat. (Mateus 20:28) Yéhuwa gé geus ngalantik Yésus jadi Raja sakuliah bumi. Ku kituna, Kitab Suci méré nyaho urang, lamun taat ka Yésus, urang bakal hirup langgeng.​—Baca Yohanes 3:36.

12. Naon sababna urang teu pipilueun dina urusan pulitik?

¹² Urang teu pipilueun dina urusan pulitik. Yésus teu pipilueun dina urusan pulitik. Waktu dikaniaya, Yésus ngomong kieu ka Pilatus, pangawasa Rum, ”Karajaan Kaula sanes ti ieu dunya.” (Baca Yohanes 18:36.) Saperti Yésus, urang gé satia ka Karajaan Allah. Ku kituna, teu sual di nagara mana urang hirup, urang moal pipilueun dina urusan pulitik. Kitab Suci ngajurung  urang pikeun taat ka ”pamarentah”. (Rum 13:1) Urang taat kana hukum-hukum pamaréntah. Tapi, lamun hukum pamaréntah teu luyu jeung Kitab Suci, pamadegan urang bakal saperti rasul-rasul, ”Sim kuring sadaya ngaraos wajib tunduk ka Allah ti batan ka manusa.”​—Rasul 5:29; Markus 12:17.

13. Naon nu diwartakeun ku urang ngeunaan Karajaan Allah?

¹³ Urang yakin yén Karajaan Allah hiji-hijina jalan kaluar pikeun masalah manusa. Yésus nyebutkeun yén ”Injil Kasalametan . . . hal Karajaan Sawarga” bakal diwartakeun di sakuliah dunya. (Baca Mateus 24:14.) Nu bakal dilakukeun ku Karajaan Allah moal bisa dilakukeun ku pamaréntahan manusa. (Jabur 146:3) Yésus ngajar urang supaya ngadoakeun Karajaan Allah, ”Karajaan Ama mugi rawuh. Pangersa Ama mugi laksana di dunya, sapertos di sawarga.” (Mateus 6:10) Kitab Suci méré nyaho urang yén Karajaan Allah bakal ngabinasakeun sakabéh pamaréntahan manusa, terus bakal ”ngadeg salalanggengna”.​—Daniel 2:44.

14. Ceuk Sadérék, saha nu cara ibadahna bener?

¹⁴ Jadi, sanggeus diajar ngeunaan hal-hal ieu, tanyakeun ka diri sorangan, ’Saha nu pangajaranana dumasar kana Kitab Suci? Saha nu ngawawarkeun nami Yéhuwa? Saha nu silih pikanyaah jeung percaya yén Allah ngutus Yésus pikeun nyalametkeun urang? Saha nu teu pipilueun dina urusan pulitik? Saha nu ngawartakeun Karajaan Allah sabagé hiji-hijina jalan kaluar pikeun masalah urang?’ Ngan Saksi-Saksi Yéhuwa.​—Yesaya 43:10-12.

15. Naon nu kudu dilakukeun ku urang sangkan ibadah urang ditarima ku Allah?

¹⁵ Teu cukup ngan saukur percaya yén Allah téh aya. Malaikat-malaikat nu jahat gé percaya Allah téh aya,  tapi maranéhna teu taat. (Yakobus 2:19) Sangkan ibadah urang ditarima ku Allah, teu cukup ngan saukur percaya yén Allah téh aya, tapi urang kudu ngalaksanakeun paréntah-Na.

16. Naon sababna urang kudu nolak agama palsu?

¹⁶ Supaya ibadah urang ditarima ku Allah, urang kudu nolak agama palsu. Ceuk nabi Yésaya, ”Kalaluar ti Babul . . . usahakeun supaya maraneh tetep beresih.” (Yesaya 52:11; 2 Korinta 6:17) Éta alesanana urang perlu nolak hal-hal nu aya patalina jeung ibadah palsu.

17, 18. Naon Babul raya téh, sarta naon sababna kudu geura kaluar ti dinya?

¹⁷ Naon agama palsu téh? Éta téh agama nu ngajarkeun cara ibadah nu teu luyu jeung Firman Allah. Dina Kitab Suci, sakabéh agama palsu disebut ”Babul raya”. (Wahyu 17:5) Naon sababna? Sanggeus Caah Gedé jaman Nuh, pangajaran-pangajaran nu salah mimitina aya di kota Babul terus nyebar ka sakuliah dunya. Contona, maranéhna nyembah tilu Allah nu jadi hiji. Ayeuna ogé loba agama ngajarkeun yén Allah téh Tritunggal. Tapi, lain kitu ceuk Kitab Suci mah. Kitab Suci ngajarkeun yén Allah téh ésa, nyaéta Yéhuwa, jeung Yésus téh Putra Allah. (Yohanes 17:3) Di Babul, jalma-jalma ogé percaya yén aya bagian tina diri manusa nu tetep hirup sanggeus ragana maot, sarta bisa disiksa di naraka. Sakabéh pangajaran éta téh salah.​—Tingali Catetan Ahir 14, 17, jeung 18.

¹⁸ Allah nganubuatkeun yén moal lila deui sakabéh agama palsu bakal dibinasakeun. (Wahyu 18:8) Naon sababna Sadérék kudu geura kaluar tina agama palsu? Allah Yéhuwa miharep Sadérék geura kaluar, mumpung masih aya waktu.​—Wahyu 18:4.

19. Naon berkahna lamun Sadérék mutuskeun pikeun ibadah ka Yéhuwa?

 ¹⁹ Waktu Sadérék mutuskeun pikeun kaluar ti agama palsu terus milih ibadah ka Yéhuwa, bisa jadi sababaraha babaturan jeung kulawarga Sadérék bingungeun, malahan aya nu ngéwaeun nepi ka nganiaya Sadérék. Tapi, Yéhuwa moal bakal ninggalkeun Sadérék. Sadérék bakal jadi bagian tina duduluran sakuliah dunya nu bener-bener silih pikanyaah, ogé boga harepan hirup langgeng di dunya anyar Allah. (Markus 10:28-30) Bisa jadi, babaturan jeung kulawarga nu tadina teu suka kana putusan Sadérék, barobah jadi daék diajar Kitab Suci.

20. Naon sababna ibadah ka Allah ku cara nu bener téh penting?

²⁰ Moal lila deui, Allah bakal ngabinasakeun sakabéh nu jahat. Karajaan Allah bakal maréntah sakuliah dunya. (2 Petrus 3:9, 13) Éta téh mangsa nu ngabagjakeun! Unggal jalma bakal ibadah ka Allah ku cara nu dipiharep ku Mantenna. Jadi, penting nyieun putusan ayeuna. Putuskeun pikeun ibadah ka Allah ku cara anu bener.