1. Doa naon nu bakal dibahas ku urang?

JUTAAN jalma apal kana doa nu kasohor, nu sok disebut Doa Bapa Kami. Ieu téh doa nu diajarkeun ku Yésus ka murid-muridna. Kumaha doana? Sarta, naon sababna ieu doa téh penting pikeun urang?

2. Tilu hal penting naon nu perlu didoakeun ku urang?

² Yésus ngomong kieu ka murid-muridna, ”Jadi kieu bae unjukan teh: ’Nun Ama di sawarga. Mugi jenengan Ama nu suci dimulyakeun. Karajaan Ama mugi rawuh. Pangersa Ama mugi laksana di dunya, sapertos di sawarga.’” (Baca Mateus 6:9-13.) Naon sababna Yésus ngajar urang pikeun ngadoakeun tilu hal nu penting ieu?​—Tingali Catetan Ahir 20.

3. Urang bakal diajar naon ngeunaan Karajaan Allah?

³ Saacanna, urang geus diajar ngeunaan nami Allah nyaéta Yéhuwa. Urang ogé geus diajar ngeunaan kahoyong Allah pikeun manusa jeung bumi. Tapi, naon maksudna ”Karajaan Ama mugi rawuh”? Ayeuna, urang bakal diajar ngeunaan naon Karajaan Allah téh, naon nu bakal diwujudkeunana, jeung kumaha cara ngamulyakeun nami Allah nu suci.

4. Naon Karajaan Allah téh, sarta saha Rajana?

⁴ Yéhuwa geus ngadegkeun hiji pamaréntahan di sawarga jeung geus netepkeun Yésus sabagé Rajana. Dina Kitab Suci, éta pamaréntahan disebut Karajaan Allah. Yésus téh ”Gustina sakabeh gusti, Rajana  sakabeh raja”. (Wahyu 17:14) Yésus leuwih hadé ti batan pangawasa manusa mana waé jeung kakawasaanana moal aya nu nandingan.

5. Ti mana Karajaan Allah bakal maréntah, sarta bakal ngawasaan naon?

⁵ Opat puluh poé sanggeus dihirupkeun deui, Yésus naék ka sawarga. Dina waktuna, Yéhuwa bakal ngalantik Yésus jadi Raja Karajaan Allah. (Rasul 2:33) Karajaan Allah bakal maréntah bumi ti sawarga. (Wahyu 11:15) Ku kituna, dina Kitab Suci, Karajaan Allah disebut ogé ’karajaan sawarga’.​—2 Timoteus 4:18.

6, 7. Naon sababna Yésus leuwih hadé ti batan pangawasa manusa séjénna?

⁶ Kitab Suci ngajelaskeun yén Yésus téh leuwih agung ti batan pangawasa manusa séjénna, lantaran anjeunna ”moal pupus deui”. (Rum 6:9) Pangawasa-pangawasa manusa mah bakal maot, tapi Yésus mah moal maot. Sagala nu dipigawé ku Yésus bakal mawa mangpaat langgeng.

⁷ Kitab Suci nganubuatkeun yén Yésus téh bakal jadi Raja nu adil jeung welas asih, ”Anjeunna ku Roh PANGERAN bakal dipaparin hikmah, elmu jeung kapinteran pikeun ngatur rahayatna. Ka PANGERAN bakal ngabdi, ngamulyakeun, tumutna reujeung sukana. Mutus perkara moal satingal-tingalna, moal sadangu-danguna. Adil asih ka nu miskin, bumela ka nu sangsara.” (Yesaya 11:2-4) Tangtu raja nu saperti kitu nu dipiharep ku urang.

8. Ti mana urang nyaho yén Yésus téh moal maréntah sorangan?

⁸ Allah geus milih sababaraha manusa pikeun maréntah jeung Yésus dina Karajaan sawarga. Ieu kaciri basa rasul Paulus ngomong kieu ka Timoteus,  ”Mun urang kuat nandangan, bakal milu jeung Anjeunna ngarajaan.” (2 Timoteus 2:12) Jadi, aya sabaraha urang nu bakal jadi raja?

9. Aya sabaraha jalma nu bakal maréntah jeung Yésus? Ti saprak iraha Yéhuwa milih maranéhna?

⁹ Di Pasal 7 disebutkeun yén dina téténjoan Yohanes ningali Yésus jeung 144.000 jadi raja di sawarga. Saha 144.000 téh? Yohanes ngajelaskeun yén maranéhna téh ”jelema anu tarangna make tulisan jenengan Anjeunna [Yésus] jeung jenengan Rama-Na”. Sarta, ”ka mana-mana maranehna ngingiring bae ka Anak Domba [nyaéta Yésus]. Ti sakumna manusa, maranehna mah geus disalametkeun”. (Baca Wahyu 14:1, 4.) Maranéhna téh urang Kristen nu ariman, nu dipilih ku Allah ’sina marentah bumi’ jeung Yésus. Lamun maranéhna maot, maranéhna bakal dihirupkeun deui pikeun hirup di sawarga. (Wahyu 5:10) Yéhuwa milih maranéhna ti saprak jaman rasul-rasul.

10. Naon sababna dipilihna Yésus jeung 144.000 téh némbongkeun kaasih Allah ka urang?

¹⁰ Ayana jalma-jalma nu maréntah jeung Yésus némbongkeun yén Yéhuwa téh mikaasih manusa. Yésus téh pangawasa nu bageur, lantaran anjeunna paham ka urang. Anjeunna nyaho kumaha kahirupan jeung kasangsaraan manusa. Paulus ngajelaskeun kumaha parasaan Yésus ka urang. Yésus téh ”ngaraskeun kahengkeran-kahengkeran urang”, jeung anjeunna gé geus ”nandangan sagala dodoja cara urang”. (Ibrani 4:15; 5:8) Kitu ogé 144.000 pernah jadi manusa nu teu sampurna jeung ngarasakeun kasakit. Jadi, urang bisa yakin yén Yésus jeung 144.000 téh teu ngan saukur  paham kana parasaan urang, tapi ogé paham kana masalahna.

11. Naon sababna Yésus ngajar murid-muridna ngadoakeun kahoyong Allah laksana di sawarga?

¹¹ Yésus ngajar murid-muridna ngadoakeun kahoyong Allah laksana di sawarga. Naon sababna? Di Pasal 3, urang geus diajar yén Sétan si Iblis barontak ka Yéhuwa. Yéhuwa ngidinan Sétan jeung malaikat-malaikat nu teu taat, atawa roh-roh jahat, cicing di sawarga keur samentara waktu. Teu kabéh mahluk di sawarga ngalaksanakeun kahoyong Allah. Di Pasal 10, urang bakal diajar leuwih loba ngeunaan Sétan jeung roh-roh jahat.

12. Dua kajadian penting naon nu dijelaskeun di Wahyu 12:10?

¹² Kitab Suci ngajelaskeun yén sanggeus Yésus dilantik jadi Raja Karajaan Allah, anjeunna bakal merangan Sétan. (Baca Wahyu 12:7-10.) Di ayat 10 disebutkeun aya dua kajadian penting. Nu kahiji, Karajaan Allah diparéntah ku Yésus Kristus. Nu kadua, Sétan dibalangkeun ti sawarga ka bumi. Ayeuna, dua hal éta geus kajadian.

13. Kumaha kaayaan di sawarga sanggeus Sétan dibalangkeun ka bumi?

¹³ Kitab Suci ngajelaskeun yén para malaikat nu satia di sawarga galumbira, lantaran Sétan jeung roh-roh jahat dibalangkeun ka bumi. Disebutkeun kieu, ”Ku sabab kitu eh sawarga, eh anu ngarancik di sawarga, sing barungah!” (Wahyu 12:12) Kaayaan di sawarga jadi tengtrem jeung satunggal lantaran kabéhanana ngalaksanakeun kahoyong Allah.

14. Kumaha kaayaan bumi sanggeus Sétan dibalangkeun ti sawarga?

 ¹⁴ Tapi, kaayaan di bumi mah béda. Manusa ngalaman loba kasusah ”sabab Iblis geus turun bari napsu ngagugudug, da nyahoeun geus deukeut kana panungtunganana”. (Wahyu 12:12) Sétan ngamuk. Manéhna dibalangkeun ti sawarga jeung nyaho yén sakeudeung deui rék dibinasakeun. Manéhna ngupayakeun sagala cara sangkan di sakuliah bumi loba masalah, kanyeri, jeung kasangsaraan.

15. Naon kahoyong Allah pikeun bumi?

¹⁵ Sanajan kitu, kahoyong Allah pikeun bumi teu barobah. Mantenna hoyong sangkan manusa jadi sampurna jeung hirup langgeng di bumi pirdaus. (Jabur 37:29) Kumaha Karajaan Allah bakal ngawujudkeunana?

16, 17. Nubuat Daniel 2:44 ngajelaskeun naon ngeunaan Karajaan Allah?

¹⁶ Nubuat di Daniel 2:44 nyebutkeun, ”Nalika eta karajaan-karajaan tea ngadeg, Allah anu jumeneng di sawarga ngadegkeun hiji karajaan anu moal aya tungtungna, moal aya nu tiasa ngelehkeun, malah bakal numpes numpurkeun karajaan-karajaan anu tadi tea sadayana, lajeng ngadeg salalanggengna.” Naon nu diajarkeun nubuat ieu ngeunaan Karajaan Allah?

¹⁷ Nu kahiji, Karajaan Allah mimiti maréntah ”nalika eta karajaan-karajaan tea ngadeg”. Éta hartina Karajaan Allah bakal ngamimitian maréntah waktu pamaréntahan-pamaréntahan manusa masih aya kénéh di bumi. Nu kadua, Karajaan Allah bakal aya salalanggengna jeung moal kagantikeun ku karajaan séjénna. Nu katilu, Karajaan Allah bakal merangan  pamaréntahan manusa sarta bakal meunang. Karajaan Allah bakal jadi hiji-hijina pamaréntahan di bumi. Manusa bakal ngabogaan pamaréntahan nu panghadéna.

18. Naon ngaran perang ahir antara Karajaan Allah jeung pamaréntahan di dunya?

¹⁸ Kumaha Karajaan Allah ngaganti pamaréntahan manusa? Saacanna perang ahir, nu disebut perang Armagédon, roh-roh jahat bakal ”ngadatangan raja-raja, rek dibawa sakait perang dina poe agung, Poena Allah Nu Maha Kawasa”. Pamaréntahan manusa bakal perang ngalawan Karajaan Allah.​—Wahyu 16;14, 16; tingali Catetan Ahir 10.

19, 20. Naon sababna urang butuh Karajaan Allah pikeun maréntah bumi?

¹⁹ Naon sababna urang butuh Karajaan Allah? Aya tilu alesan. Nu kahiji, urang téh manusa nu boga dosa, jadi urang bisa gering jeung ahirna maot. Tapi Kitab Suci ngajarkeun, waktu Karajaan Allah maréntah, urang bakal hirup langgeng. Sakumaha nu ditulis di Yohanes 3:16, ”Karana kacida mikaasihna Allah ka alam dunya, nepi ka masihkeun Putra tunggal-Na, supaya sakur anu percaya ka Anjeunna ulah binasa, tapi meunang hirup langgeng.”

²⁰ Alesan nu kadua, urang dikurilingan ku jalma-jalma jahat. Loba jalma sok ngabohong, sok nipu, jeung ngalakukeun nu bejad. Urang teu bisa nanaon pikeun nyingkirkeun maranéhna. Tapi Allah mah bisa, jeung bakal numpes jalma-jalma jahat di Armagédon. (Baca Jabur 37:10.) Nu katilu, pamaréntahan manusa mah lemah, kejem, jeung sok korupsi. Maranéhna teu resepeun lamun urang taat ka Allah.  Kitab Suci nyebutkeun yén ”nu sejenna sangsara ku lantaran kakawasaan maranehna”.​—Pandita 8:9.

21. Kumaha carana Karajaan Allah mastikeun kahoyong Allah laksana di bumi?

²¹ Sanggeus Armagédon, Karajaan Allah bakal mastikeun kahoyong Allah laksana di bumi. Contona, Karajaan Allah bakal ngabinasakeun Sétan jeung roh-roh jahat. (Wahyu 20:1-3) Ku ayana tebusan, jalma-jalma nu satia moal garering, moal maraot, sarta bakal hirup langgeng di bumi Pirdaus. (Wahyu 22:1-3) Karajaan Allah ogé bakal ngamulyakeun nami Allah nu suci. Naon hartina? Waktu Karajaan Allah maréntah bumi, sakabéh manusa bakal ngamulyakeun nami Yéhuwa.​—Tingali Catetan Ahir 21.

22. Ti mana urang nyaho yén Yésus teu langsung jadi Raja waktu di bumi atawa sanggeusna ka sawarga?

²² Waktu di bumi, Yésus ngajar murid-muridna pikeun ngadoakeun ”Karajaan Ama mugi rawuh”. Éta hartina Karajaan Allah bakal datang dina mangsa pikahareupeun. Yéhuwa kudu ngadegkeun heula éta karajaan jeung ngalantik Yésus jadi Raja. Tapi, naha  Yésus langsung jadi Raja sanggeus ka sawarga? Henteu. Anjeunna kudu nungguan heula. Teu lila sanggeusna Yésus dihirupkeun deui, Pétrus jeung Paulus ngajelaskeun nubuat ngeunaan Yésus di Jabur 110:1. Di ayat éta Yéhuwa nyarios ka Yésus, ”Geura calik katuhueun Kami, nepi ka musuh-musuh hidep, ku Kami dijieun titincakan hidep.” (Rasul 2:32-35; Ibrani 10:12, 13) Sabaraha lila Yésus kudu nungguan nepi ka dilantik jadi Raja ku Yéhuwa?

23. (a) Iraha Yésus dilantik jadi Raja? (b) Naon nu bakal dibahas di pasal saterusna?

²³ Sababaraha taun saacanna 1914, sakelompok urang Kristen paham yén taun éta téh boga harti penting dina nubuat Kitab Suci. Kajadian-kajadian dunya ngabuktikeun yén éta téh bener. Yésus dilantik jadi Raja taun 1914. (Jabur 110:2) Teu lila ti harita, Sétan dibalangkeun ka bumi, manéhna ogé ”nyahoeun geus deukeut kana panungtunganana”. (Wahyu 12:12) Di pasal saterusna, urang bakal diajar leuwih loba bukti yén urang téh hirup dina mangsa panungtungan éta, sarta kumaha Karajaan Allah bakal ngawujudkeun kahoyong Allah pikeun bumi.​—Tingali Catetan Ahir 22.