BAB 34

Kumaha Carana Nunjukkeun Kanyaah Urang ka Yéhuwa?

JALANKEUN

Dibandingkeun waktu mimiti diajar Alkitab, na ayeuna anjeun jadi beuki nyaah ka Yéhuwa? Na anjeun hayang leuwih akrab jeung Anjeunna? Sing inget, lamun anjeun beuki nyaah ka Yéhuwa, Yéhuwa gé bakal beuki nyaah ka anjeun. Nah, kumaha carana nunjukkeun kanyaah anjeun ka Yéhuwa?

1. Kumaha carana nunjukkeun kanyaah urang ka Yéhuwa?

Ku cara taat ka Yéhuwa. (Baca 1 Yahya 5:3.) Yéhuwa teu pernah maksa urang pikeun taat ka Anjeunna. Unggal jalma téh dibéré kabébasan pikeun milih rék taat ka Yéhuwa atawa henteu. Ku naon? Sabab Yéhuwa hayang urang ”réla taat”. (Roma 6:17) Maksudna, Yéhuwa téh hayang urang taat lantaran urang nyaah ka Anjeunna, lainna ku karana kapaksa. Bagian 3 jeung 4 dina buku ieu bakal ngabantu anjeun pikeun nunjukkeun kanyaah ka Yéhuwa, nyaéta ku cara ngalakukeun hal-hal nu nyenangkeun Anjeunna jeung ngajauhan hal-hal nu teu nyenangkeun Anjeunna.

2. Ku naon kadang hésé pikeun nunjukkeun kanyaah ka Yéhuwa?

”Jalma bener téh loba kasusahna.” (Jabur 34:19, NW) Urang kabéh téh teu sampurna. Terus kadang urang boga masalah, misalna masalah ékonomi, kateuadilan, jeung hal-hal séjénna. Waktu keur aya kasusah, bisa jadi leuwih gampang pikeun ngalakukeun hal-hal nu salah tibatan hal-hal nu nyenangkeun Yéhuwa. Tapi lamun anjeun terus upaya pikeun ngalakukeun hal-hal nu nyenangkeun Yéhuwa, anjeun nunjukkeun yén anjeun leuwih nyaah ka Yéhuwa tibatan ka saha waé atawa kana naon waé. Terus, éta téh bukti yén anjeun satia ka Yéhuwa. Yéhuwa gé bakal satia jeung moal pernah ninggalkeun anjeun.—Baca Jabur 4:3, NW.

HAYU NGULIK

Perhatikeun ku naon Yéhuwa bakal senang mun anjeun satia ka Anjeunna jeung naon nu bisa ngabantu anjeun satia ka Yéhuwa.

3. Sétan nuduh anjeun

Dina kitab Ayub, Sétan nuduh Ayub jeung kabéh jalma nu hayang ngalayanan Yéhuwa. Naon tuduhanana? Baca Ayub 1:1, 6–2:10, terus bahas:

Ceuk Sétan, ku naon Ayub satia ka Yéhuwa?—Tingali Ayub 1:9-11.
Sétan nuduh naon ka kabéh manusa, kaasup ka anjeun?—Tingali Ayub 2:4.

Baca Ayub 27:5b (NW), terus bahas:

Kumaha Ayub ngabuktikeun yén manéhna bener-bener nyaah ka Yéhuwa?

Ayub ngabuktikeun kanyaah ka Yéhuwa ku cara tetep satia

Urang ngabuktikeun kanyaah ka Yéhuwa ku cara tetep satia

4. Pék senangkeun haté Yéhuwa

Baca Siloka 27:11, terus bahas:

Kumaha parasaan Yéhuwa lamun anjeun bijaksana jeung taat ka Anjeunna? Ku naon?

5. Anjeun bisa satia ka Yéhuwa

Lamun urang nyaah ka Yéhuwa, urang bakal kajurung pikeun nyaritakeun ngeunaan Anjeunna ka batur. Terus lamun urang satia ka Yéhuwa, urang bakal tetep ngawawar sanajan kadang éta téh teu gampang. Setél VIDÉO, terus bahas:

VIDÉO: Béla Iman Anjeun Najan Aya Tangtangan (5:09)

Na anjeun sok ngarasa hésé pikeun nyaritakeun ngeunaan Yéhuwa ka batur?
Dina vidéo, naon nu ngabantu Grayson ngéléhkeun kasieun?

Mun urang resep kana hal-hal nu dipikaresep ku Yéhuwa jeung ngéwa kana hal-hal nu dipikangéwa ku Anjeunna, urang bakal leuwih gampang pikeun satia. Baca Jabur 97:10, terus bahas:

Sanggeus diajar Alkitab, ceuk anjeun hal naon waé nu dipikaresep ku Yéhuwa? Hal naon waé nu dipikangéwa ku Anjeunna?
Anjeun kudu kumaha supaya bisa resep kana hal-hal nu hadé jeung ngéwa kana hal-hal nu goréng?

6. Mun taat ka Yéhuwa, urang bakal meunang mangpaat

Taat ka Yéhuwa téh pasti aya mangpaatna. Baca Yesaya 48:17, 18, terus bahas:

Ceuk anjeun, na Yéhuwa téh mémang nyaho nu panghadéna keur urang? Ku naon anjeun ngajawab kitu?
Keur anjeun, naon mangpaatna diajar Alkitab jeung diajar ngeunaan Allah nu sajati, nyaéta Yéhuwa?

AYA NU NGOMONG: ”Abdi mah moal pernah bisa nyenangkeun Allah.”