PARASAAN SEDIH KU LANTARAN DITINGGAL MAOT TÉH LOBA DITALITI KU PARA AHLI. Siga nu dibahas dina artikel saacanna, saran-saran alus ti para ahli téh cocog jeung naséhat nu dicatet dina Alkitab. Hal ieu ngabuktikeun yén naséhat bijak tina Alkitab téh henteu tinggaleun jaman. Malahan mah, Alkitab gé méré informasi nu teu dijelaskeun ku para ahli. Informasi éta bisa ngalilipur jeung ngagedékeun haté urang.

• Jalma nu geus maot téh henteu disiksa

  Ceuk Alkitab dina Pandita 9:5, ”Nu paeh mah teu nyaho naon-naon.” Geus kitu ”sagala pamaksudanana ge harita musna”. (Jabur 146:4) Alkitab téh osok nyaruakeun jalma nu maot siga jalma nu keur saré tibra.​—Yahya 11:11, 13.

• Aya Gusti nu nyaahan nu bakal ngahibur urang

  Ceuk Alkitab dina 1 Pétrus 3:12, ”Yéhuwa a merhatikeun jalma-jalma nu bener, jeung Anjeunna ngadangukeun doa paménta maranéhna.” Lamun urang ngungkabkeun parasaan urang waktu ngadoa ka Allah, éta téh lain saukur keur nenangkeun haté urang. Tapi, doa téh bisa ngaraketkeun urang jeung Nu Nyipta, nyaéta Pribadi nu boga kawasa pikeun ngahibur urang.

• Harepan nu didago-dago

  Pék bayangkeun kaayaanana engké waktu jalma-jalma nu geus maot dihirupkeun deui di bumi! Alkitab mangkali-kali nyebutkeun ngeunaan jangji ieu. Bakal siga kumaha kaayaanana engké? Alkitab nyebutkeun yén Allah bakal ”nyusutan cipanon maranéhna. Moal aya deui nu maot. Kitu ogé moal aya deui nu sedih, ceurik, atawa ngarasa nyeri”.​—Wahyu 21:3, 4.

Loba jalma nu keur sungkawa ngarasa dikuatkeun lantaran boga iman ka Yéhuwa. Maranéhna boga harepan bisa panggih deui jeung kulawarga sarta sobat nu geus maot. Salah sahiji contona téh Ana. Sanggeus nikah salila 65 taun, salakina maot. Ana nyarita, ”Alkitab ngayakinkeun abdi yén jalma nu maot téh geus teu bisa ngarasakeun naon-naon deui. Allah ogé inget jeung bakal ngahirupkeun deui umat-Na. Abdi jadi teu pati sedih deui mun keur inget ka salaki abdi. Abdi gé bisa nyanghareupan masalah nu pangbeuratna ieu!”

Tina, anu disebutkeun dina awal artikel, ngomong, ”Sanggeus Timo maot, abdi téh bener-bener ngarasakeun yén Yéhuwa negerkeun abdi jeung ngabantu abdi waktu keur sedih. Abdi yakin pisan kana jangji Alkitab ngeunaan dihirupkeunana deui nu maot. Abdi jadi bisa tabah pikeun ngadagoan waktuna abdi bisa panggih deui jeung Timo.”

Sabenerna, aya jutaan jalma séjénna anu percaya yén jangji dina Alkitab téh pasti bakal jadi kanyataan. Tapi, bisa jadi Anjeun ngarasa jangji dina Alkitab téh siga dongéng atawa teu asup akal. Mun kitu, Anjeun bisa mariksa bukti-bukti yén naséhat jeung jangji dina Alkitab téh bener sarta bisa nguatkeun jalma nu dikantunkeun.

Mangga tongton vidéona dina situs Internét jw.org/su

 NAON NU KAALAMAN KU JALMA NU GEUS MAOT?

NAHA SADÉRÉK HOYONG NGADANGU WARTA PIKABUNGAHEUN?