LOBA jalma geus apal yén Isa téh dihukum pati dina tihang bareng jeung dua penjahat. (Mat. 27:35-38) Tapi aya sababaraha jalma anu mikir, catetan Alkitab téh teu pati bener waktu nyaritakeun yén mayit Isa digolérkeun dina makam.​—Mar. 15:42-46.

Sababaraha jalma ngiritik catetan dina Injil. Maranéhna teu percaya yén jalma nu dihukum pati dina tihang bakal dimakamkeun ku cara anu layak. Saurang wartawan di majalah Smithsonian anu ngaranna Ariel Sabar, ngajelaskeun ku naon aya jalma-jalma anu mikir jiga kitu, ”Jalma anu dihukum pati dina tihang téh biasana jalma anu dianggap paling hina. Jadi sababaraha ahli mikir, moal mungkin pamaréntah Roma ngidinan maranéhna pikeun dimakamkeun ku cara anu layak.” Pamaréntah Roma hayang bener-bener ngarendahkeun jalma-jalma éta. Jadi, biasana mayitna diantepkeun dina tihang sina didahar ku sato. Terus, engké sésana bakal dipiceun ka kuburan.

Tapi, para ahli arkéologi manggihan tulang-tulang ti urang Yahudi nu dihukum pati. Dina taun 1968, maranéhna manggihan tulang ti saurang priya anu dihukum pati dina abad kahiji. Tulang ieu disimpen di jero peti tulang nu aya di kuburan kulawarga urang Yahudi di deukeut Yérusalém. Di antara tulang-tulang éta, aya tulang keuneung. Tulang keuneung ieu baheulana dipakukeun kana papan kayu ku paku anu panjangna 11,5 séntiméter. Ceuk Sabar, ”Tulang keuneung ieu téh milik saurang priya anu ngaranna Yehochanan. Tulang ieu ngabuktikeun yén naon anu dicatet dina buku Injil ngeunaan cara Isa dimakamkeun téh bisa waé bener. Tulang ieu ngabuktikeun yén sakapeung pamaréntah Roma ngidinan urang Yahudi anu dihukum pati pikeun dimakamkeun ku cara nu layak.”

Sanggeus tulang keuneung Yehochanan kapanggih, jalma-jalma boga pamikiran nu béda-béda ngeunaan kumaha posisi Isa waktu dipakukeun dina tihang. Tapi nu pasti mah, sababaraha penjahat anu dipakukeun dina tihang meunang dimakamkeun ku cara nu layak. Jadi jelas yén catetan ngeunaan Isa digolérkeun dina makam téh bisa dipercaya. Bukti-buktina nunjukkeun yén hal éta téh bener.

Terus nu leuwih penting, Yéhuwa geus nyebutkeun yén Isa bakal dimakamkeun di makamna jalma beunghar. Moal aya anu bisa ngahalangan kekecapan éta jadi kanyataan.​—Yes. 53:9; 55:11.