Julai 23, 2023, Ndugu Lemma Koyra, mshiriki wa Halmashauri ya Tawi ya Ethiopia, alitoa matoleo ya Biblia—Habari Njema Kulingana na Mathayo katika Kisidama na Kiwolaita. Tangazo hilo lilitolewa wakati wa mkutano wa pekee katika Jumba la Ufalme la Addis Ababa, Ethiopia. Watu 1,800 hivi walihudhuria tukio hilo uso kwa uso, na wengine 12,669 walitazama programu hiyo kupitia video iliyounganishwa kwenye mtandao na kwenye kituo cha televisheni cha satelaiti. Upesi baada ya kutolewa, matoleo ya kidijitali yalipatikana ili yaweze kupakuliwa. Matoleo yaliyochapishwa ya kitabu cha Mathayo yatapatikana katika makutaniko katika miezi ijayo.

Kiwolaita na Kisidama ni lugha zinazozungumzwa hasa kusini mwa Ethiopia. Kikundi cha utafsiri cha Kiwolaita kilianzishwa mnamo 2005, na kikundi cha utafsiri cha Kisidama kilianzishwa mnamo 2007. Vikundi vyote vinafanya kazi kwenye ofisi za tafsiri zilizo katika maeneo ambayo watu wengi wanaozungumza lugha hizo wanapatikana.

Ingawa tafsiri nzima za Biblia zimetolewa katika lugha zote mbili, hazipatikani kwa urahisi na ni bei ghali sana. Mtafsiri mmoja alifafanua jinsi hali ilivyokuwa kwa ndugu na dada wengi wanaozungumza Kisidama: “Makutaniko mengi yana nakala moja tu ya Biblia. Wakati wa mikutano, ni msemaji tu anayeweza kutumia Biblia hiyo. Kwa hiyo, ili tufanye usomaji wetu wa kibinafsi wa Biblia, lazima twende kwenye Jumba la Ufalme na kutumia Biblia hiyo. Hatimaye, kwa kuwa sasa tuna kitabu cha Mathayo katika Kisidama, tumepata uwezo wa kusoma na kujifunza Neno la Mungu katika nyumba zetu.”

Mtafsiri wa kikundi cha utafsiri cha Kiwolaita alishukuru kwa lugha ya wazi iliyo katika Tafsiri ya Ulimwengu Mpya. Alisema hivi: “Tafsiri moja ya Biblia inafafanua roho takatifu kuwa mtu kwenye Mathayo 28:19. Hilo lilifanya iwe vigumu sana kueleza tofauti kati ya Baba, Mwana, na roho takatifu tulipokuwa katika huduma. Kwa upande mwingine, Tafsiri ya Ulimwengu Mpya inaweka wazi kwamba roho takatifu ni nguvu. Nina uhakika kwamba tafsiri hii ya kitabu cha Mathayo katika Kiwolaita itatusaidia sana katika kazi ya kuhubiri.”

Kutolewa kwa Biblia—Habari Njema Kulingana na Mathayo katika Kisidama na Kiwolaita kunathibitisha kwa njia yenye nguvu kwamba habari njema inasambazwa kwa ‘kila taifa, kabila, na lugha.’​—Ufunuo 14:6.