Ndugu Giandomenico Gullà, ambaye ni daktari anayefanya kazi katika idara ya huduma za dharura katika hospitali iliyo Erba, karibu na jijini la Como, nchini Italia, amepitia hali ngumu sana katika kipindi hiki cha mlipuko wa ugonjwa wa virusi vya corona (COVID-19). Hata hivyo, imani yake inamsaidia kuwa na amani ya akili, na jambo hilo linamsaidia kuwa na uwezo wa kuwafariji wengine. (2 Wakorintho 1:4) Hilo limeonekana kupitia masimulizi yake aliyotaja katika mahojiano na Dawati la Habari za Umma la ofisi ya tawi ya Italia.

Yafuatayo ni mazungumzo yaliyofupishwa ya mahojiano pamoja na Ndugu Gullà ambayo yamerekebishwa kidogo ili yaeleweke vizuri.

Ni hali gani unazokabiliana nazo katika kipindi hiki cha ugonjwa huu?

Giandomenico Gullà: Katika hospitali ninayofanya kazi, ugonjwa huo ulilipuka haraka sana bila kutazamia kama vile tu tsunami inavyoweza kuja. Idara zote hospitalini zilipangwa upya ili kuunda idara ambazo zitashughulika na wagonjwa wenye COVID-19 pekee. Katika pindi hii yenye kuhuzunisha, wagonjwa wametengwa na hawawezi kuonana na watu wao wa karibu kama vile familia zao na marafiki wao. Hivyo, nina jukumu la kuwapigia simu watu wa familia na kuwajulisha hali ya wagonjwa inaendeleaje. Pindi fulani, katikati ya usiku, nilipaswa kumjulisha mtu kwamba mama yake alikuwa anakufa. Hivyo, nilitumia simu yangu kumpigia kwa njia ya video. Kwa njia hiyo, alipata nafasi ya kumwona mama yake kwa mara ya mwisho, ingawa mama yake alikuwa hajitambui tena. Ilikuwa pindi yenye kuhuzunisha sana.

Ujuzi wa Biblia unakufariji jinsi gani?

GG: Nimetambua kwamba tofauti na wafanyakazi wenzangu ambao wameathiriwa sana kihisia na hali hii, funzo langu la kibinafsi linanisaidia sana niwe na usawaziko. Ninaelewa sasa kuliko wakati mwingine wowote kwamba Yehova ametuandaa vizuri ili kukabiliana na nyakati hizi ngumu. Kujua kwamba mlipuko huu ni sehemu ya utimizo wa unabii kunanisaidia kuwa na maoni yanayofaa. Imani yangu imeimarishwa sana.

Faraja inayotoka kwa Yehova imekusaidiaje kuwafariji wengine?

GG: Ninahisi roho yake takatifu ikitenda kwa njia ya pekee, imenisaidia mimi pamoja na familia yangu na hata nikiwa kazini, imeniwezesha kuwasaidia akina ndugu wanaokabiliana na hali ngumu kwa sababu ya mlipuko huu.

Unaweza kuelezea jinsi Yehova anavyokusaidia kufariji familia yako?

GG: Ingawa ninapaswa kufanya kazi muda mrefu hospitalini, ninajitahidi sana kudumisha ratiba nzuri ya kiroho pamoja na familia yangu. Nimegundua kwamba kufanya hivyo kumemtia nguvu mke wangu. Tunahisi tuna umoja zaidi. Ibada yetu ya familia imenisaidia kumfariji binti yetu pia, Ginevra, anayekaribia umri wa miaka mitatu. Yeye pia anahisi hali imebadilika na anajieleza kwa kusema mambo kama: “Sitaki Baba aende kazini kwa sababu kuna corona,’ au ‘Ninaogopa Baba hatarudi nyumbani.’ Ili kumsaidia asiwe na wasiwasi, tunamwekea nyimbo zilizotungwa, na baada ya muda mfupi tu anachangamka tena.

Unaweza kutusimulia pindi ambayo umewahi kumfariji mfanyakazi mwenzako?

GG: Hivi karibuni, mfanyakazi mwenzangu ameanza kujifunza Biblia. Nilijuana naye miaka michache iliyopita katika hospitali ambayo nilikuwa nikifanya kazi, na tulikuwa na mazungumzo ya Biblia mara kadhaa. Alianza kujifunza muda mfupi kabla ya mlipuko wa ugonjwa huu na aliamua kutoacha. Wakati huu, tunajifunza—hata mara mbili kwa wiki—kwa njia ya video. Niliguswa moyo aliponieleza hisia zake, alisema: “Funzo la Biblia linanisaidia kuwa na maisha bora. Ninahisi nina amani. Ninajifunza majibu ya maswali mengi kuhusu kusudi letu maishani na ni nini kinachosababisha milipuko kama huu itokee. Imani ninayojenga inanifanya imara na inanipa tumaini la wakati ujao.”

Umefanya nini ili kuwafariji ndugu na dada kutanikoni?

GG: Kwa kusikitisha, dada mmoja kutanikoni kwetu [Dada Daniela Sgreva] alikutwa na ugonjwa wa virusi vya corona na alilazimika kulazwa hospitalini. Niliwasiliana na ndugu wawili ambao wanamiliki gari la kubebea wagonjwa, na tukafanya mipango ya kumsafirisha. Ndugu hao walisafiri zaidi ya kilomita 50 ili kumchukua. Alifurahi sana kuwaona! Alifika hospitalini akiwa na hofu nyingi kwa sababu ya hali zilizokuwepo, lakini alifarijika sana alipotukuta katika idara ya kushughulikia hali za dharura. Nilimkaribisha, na kwa kuwa mimi na wale waliomleta ni wahudumu wa afya, alijikuta akiwa amezingirwa na ndugu wanaomjali! Upendo na msaada aliopewa na akina ndugu ulimwimarisha sana. Alisema hivi kwa shukrani: “Nilikuwa ninajua kwamba Yehova anatuelewa, lakini pindi hii kwa kweli amefanya mengi zaidi ya nilichotarajia!”

Kila siku, ninajifunza kutegemea nguvu za Yehova. Ninapokuwa ndani ya gari langu nikielekea kazini na pindi ninaporudi pia, mimi husikiliza nyimbo zilizotungwa, nazo zinanipa nguvu za kiroho na kihisia. Ninamshukuru Yehova kwa msaada wake wote, na ninaposikiliza wimbo wenye kichwa Yehova Yuko Nasi, mimi hurudia tena na tena maneno yake: ‘Yehova yuko na mimi. Hata nini, kinipate, sitamuacha.’