MACHI 1, 2018
KOREA KUSINI
Mashahidi Nchini Korea Kusini Watuma Ombi kwa Rais: Suluhisha Suala la Kukataa Kujiunga na Jeshi kwa Sababu ya Dhamiri
Matukio ya karibuni ya Korea Kusini yanaonyesha kwamba huenda serikali inaweza kufanya mabadiliko makubwa kuhusiana na suala la kuzingatia haki za msingi za kibinadamu. Desemba 7, 2017, Rais wa Korea Kusini, Jae-in Moon alikutana na maofisa wa Tume ya Haki za Kibinadamu ya Korea (NHRC) na kuwaomba watoe mapendekezo yao kuhusu njia ya kuboresha hali ya haki za kibinadamu ili ifikie viwango vya kimataifa. Rais Moon aliiomba tume hiyo itoe pendekezo hususa la suluhisho ambalo litaisaidia serikali kuondoa sera yake ya kuwafunga wanaume wanaokataa kujiunga na utumishi wa kijeshi kwa sababu ya dhamiri.
Baada ya habari kuhusu mkutano huo kutangazwa sana na vyombo vya habari, Mashahidi wa Yehova nchini Korea Kusini walipanga kampeni ya kukusanya sahihi za watu kuhusu maombi wanayotaka kumfikishia rais. Sera ya serikali ya kuwaadhibu kwa vifungo wale wanaokataa kujiunga na jeshi kwa sababu ya dhamiri imeathiri vizazi vingi vya Mashahidi. Kwa kuwa Rais Moon ametoa maagizo kwamba serikali ifanyie kazi maombi kutoka kwa raia; maombi haya ni kuhusu kuomba msaada wa rais wa kutafuta suluhisho kwa tatizo ambalo wale wanaokataa kujiunga na jeshi kwa sababu ya dhamiri wamekabili kwa miaka 70 hivi.
Ofisi ya taifa ya Mashahidi wa Yehova ilipanga kupeleka maombi
Majuma manne tu tangu kuanza kwa kampeni hiyo, maombi yalikuwa yamekamilika. Wale waliotia sahihi maombi hayo walitia ndani wanaume zaidi ya 14,000 walioadhibiwa kama wahalifu kwa kukataa kujiunga na jeshi kwa sababu ya dhamiri, pamoja na washiriki 26,000 wa familia ambazo ziliathiriwa na kushtakiwa na kufungwa kwa wanaume hao.
Maombi yaliwasilishwa kwenye Ofisi ya Rais, Januari 15, 2018
Januari 15, 2018, wawakilishi 6 wa Mashahidi 41,275 waliotia sahihi maombi hayo, waliyapeleka kwenye Ofisi ya Rais. Maombi hayo yalionyesha shukrani za dhati kwa kuwa rais amekazia uangalifu jambo hili, yanaonyesha matokeo mabaya ya miaka 70 ya kuwaadhibu kwa vifungo wale wanaokataa kujiunga na jeshi kwa sababu ya dhamiri, na yamekazia faida ambazo taifa litapata kwa kusuluhisha tatizo hili. Januari 16, 2018, Ofisi ya Rais iliyapeleka maombi hayo kwenye Wizara ya Ulinzi wa Taifa ili yashughulikiwe.
Wakati maombi hayo yalipokuwa yakitayarishwa, wawakilishi wa Mashahidi wa Yehova walikutana na maofisa wa Tume ya Haki za Kibinadamu (NHRC). Waliwaeleza sababu za Kimaandiko zinazofanya Mashahidi wa Yehova wakatae utumishi wa kijeshi. Ikiwa Mashahidi vijana wataandikishwa kwenye programu ya utumishi wa badala wa kiraia watakuwa na manufaa kwa serikali na wanaweza kutumikia kwa manufaa ya nchi badala ya kukaa tu gerezani. Maofisa hao waliwaeleza Mashahidi kwamba kukataa kujiunga na utumishi wa kijeshi kwa sababu ya dhamiri ndilo suala la haki za kibinadamu lililopewa kipaumbele na Tume ya Haki za Kibinadamu katika mwaka wa 2018.
Idadi ya wale wanaokataa kujiunga na jeshi kwa sababu ya dhamiri ambao wamefungwa nchini Korea Kusini ni kubwa kuliko jumla ya idadi ya watu waliofungwa kwa kosa hilo katika nchi nyingine zote. Maofisa wanapoifikiria upya sera hiyo ya serikali iliyodumu kwa muda mrefu, Mashahidi wa Yehova wanatumaini kwamba mpango huu mpya utamaliza vifungo vya miaka mingi ambavyo Mashahidi vijana kwa ujumla wamekabili, yaani, vifungo vya zaidi ya miaka 36,700 kwa sababu walikataa kujiunga na utumishi wa kijeshi.
Huenda Ukapenda Pia
MASWALI YANAYOULIZWA MARA NYINGI
Kwa Nini Mashahidi wa Yehova Hawaendi Vitani?
Ulimwenguni pote, inajulikana kwamba Mashahidi wa Yehova hawaendi vitani. Soma uone ni kwa nini sisi huchukua msimamo huo.
TAARIFA ZA HABARI
Msimamo wa Kikristo wa Kutounga Mkono Upande Wowote Nchini Korea Kusini—Historia ya Imani na Ujasiri
Tangu mwaka wa 1953, akina ndugu vijana nchini Korea ambao ni Mashahidi wa Yehova wamefungwa kwa kukataa utumishi wa kijeshi kwa sababu ya dhamiri. Mnamo Februari 2019, hali hiyo ilibadilika. Jifunze ni nini kilichoongoza kwenye tukio hilo la kihistoria.
TAARIFA ZA HABARI
Mahakama za Korea Kusini Zinajitahidi Kutafuta Suluhisho kwa Wanaokataa Kujiunga na Jeshi kwa Sababu ya Dhamiri
Mahakimu nchini Korea Kusini wanatafuta utumishi wa badala kwa ajili ya wale wanaokataa kujiunga na jeshi kwa sababu ya dhamiri badala ya kuwahukumu kifungo.
TAARIFA ZA HABARI
Watu Wengi Watoa Maoni Kuhusu Kutambuliwa kwa Haki ya Kukataa Kujiunga na Jeshi kwa Sababu ya Dhamiri Nchini Korea Kusini
Hata ingawa hakuna uamuzi uliofanywa na mahakama au sheria mpya iliyotungwa, Korea Kusini imeboresha maoni yake kuhusu wale wanaokataa kujiunga na utumishi wa kijeshi kwa sababu ya dhamiri.
TAARIFA ZA HABARI
Tume ya Haki za Kibinadamu ya Kitaifa Yasihi Uhuru wa Dhamiri Uheshimiwe
Tume ya Haki za Kibinadamu ya Korea Kusini yaisihi serikali kulinda haki ya msingi ya wale wanaokataa kujiunga na utumishi wa kijeshi kwa sababu ya dhamiri.
TAARIFA ZA HABARI
Korea Kusini Ilimtendea Isivyo Haki Dong-hyuk Shin
Haki ya uhuru wa dhamiri na ibada wa Bw. Shin imekiukwa kwa adhabu isiyo ya haki na ya mara kwa mara kutokana na kukataa kujiunga na utumishi wa kijeshi kwa sababu ya dhamiri.