OKTOBA 21, 2021 | TAREHE YA KARIBUNI: DESEMBA 26, 2022
URUSI

HABARI ZA KARIBUNI—ADHABU YAONGEZWA | Wana Shangwe Licha ya Kuwekwa Mahabusu na Kuwa Katika Kifungo cha Nyumbani kwa Muda Mrefu

CHEZA

Desemba 22, 2022, Mahakama ya Nne ya Kuchunguza Maamuzi ya Mahakama za Chini iliongeza adhabu waliyopewa Ndugu Rustam Diarov na Ndugu Sergey Klikunov, pamoja na Ndugu Yevgeniy Ivanov na mke wake, Olga. Hakimu alitangaza kwamba baada ya kumaliza kutumikia vifungo vyao, hawataruhusiwa kuondoka katika eneo la Astrakhan kwa sababu yoyote ile. Ndugu hao watatu pamoja na dada yetu walishiriki katika kesi yao kupitia video iliyounganishwa kupitia mtandao huku wakiwa mahabusu.

Machi 3, 2022, Mahakama ya Eneo la Astrakhan ilitupilia mbali ombi la rufaa la Ndugu Rustam Diarov na Sergey Klikunov, na Ndugu Yevgeniy Ivanov na mke wake, Olga. Wote wanne wataendelea kukaa gerezani.

Mfuatano wa Matukio

Oktoba 25, 2021

Mahakama ya Wilaya ya Trusovskiy iliyo Astrakhan iliwahukumu Rustam, Yevgeniy, na Sergey miaka minane gerezani. Olga, mke wa Yevgeniy, alihukumiwa kifungo cha miaka mitatu na miezi sita gerezani. Ndugu hao watatu tayari walikuwa mahabusu. Dada Olga alipelekwa kizuizini mara moja
Juni 11, 2020

Rustam, Yevgeniy, na Sergey waliwekwa mahabusu katika sehemu nyingine. Olga alifungwa kifungo cha nyumbani
Juni 9, 2020

Zaidi ya maofisa 100 wa usalama walivamia nyumba za familia 27 za Mashahidi wa Yehova katika jiji la Astrakhan. Rustam, Yevgeniy, Olga, na Sergey waliwekwa mahabusu
Juni 8, 2020

Kesi ya uhalifu ilifunguliwa dhidi ya Rustam, Yevgeniy, Olga, na Sergey. Akina ndugu wote walishtakiwa kwamba wanapanga na kutegemeza kifedha utendaji wenye msimamo mkali. Olga alishtakiwa kwa kushiriki katika utendaji wenye msimamo mkali

Maelezo Mafupi Kuwahusu

Olga Ivanova

Alizaliwa: 1982 (Volzhsky, Eneo la Volgograd)

Maisha Yake: Akiwa mtoto alijifunza kucheza ala ya kodiani. Alijifunza sayansi ya lugha na alikuwa mwalimu wa Kiingereza

Alipokuwa mtoto Olga aliogopa kifo. Olga alipokuwa tineja, mama yake alikutana na Mashahidi wa Yehova na akamfunza Olga kuhusu Biblia. Alibatizwa mwaka wa 1997

Maelezo ya Kibinafsi

Unakabilianaje na kuvunjika moyo katika kipindi hiki ambacho umetenganishwa na mume wako?

Mfano ambao Yehova na Yesu wametuwekea unanichochea kuendelea kuvumilia. Yehova alitenganishwa na Yesu, rafiki yake, kwa miaka 33 na nusu kwa faida ya wanadamu wote, kutia ndani mimi. Mume wangu ndiye rafiki yangu mkubwa zaidi, na ninamkosa sana. Lakini inaelekea hatutatenganishwa kwa muda mrefu kama [ilivyokuwa kwa Yehova na Yesu]. Nina hakika kwamba tutaweza kuvumilia mambo yote kwa msaada wa Yehova.

Sergey Klikunov

Alizaliwa: 1975 (Astrakhan)

Maisha Yake: Kabla ya kuwekwa mahabusu alifanya kazi ya kuchomelea vyuma. Yeye na Irina mke wake, walianza kujifunza Biblia wakati uleule. Kanuni za Biblia zilimsaidia kuacha kuvuta sigara. Alibatizwa mwaka wa 2007. Wana mabinti wawili. Anatumia muda wake wa mapumziko kuvua samaki na pia anapenda kucheza gitaa

Maelezo ya Kibinafsi

Ni nini kinachokusaidia kuendelea kuwa mwaminifu katika kipindi hiki ulicho mahabusu?

Tangu niwekwe gerezani, nimeanza kuthamini zaidi zawadi ya sala. Sala ni muhimu sana hapa nilipo. Nimekuwa kwa seli peke yangu kwa miezi sita sasa. Si rahisi, lakini sala inanisaidia kuvumilia mambo yote. Mambo yanapokuwa magumu sana, ninapiga magoti na kumwambia Baba yetu kila kitu kilicho moyoni. Kisha ninaanza kuhisi nimepata faraja na amani, na ninahisi vizuri. Inastaajabisha kuona jinsi Baba yetu anavyotusaidia tunapohitaji msaada. Ninamtumaini kabisa na kwa sababu hiyo, siogopi.

Inafariji sana kujua kwamba sikuzote Yehova yuko karibu na watumishi wake washikamanifu wanapopatwa na majaribu.—Zaburi 139:5, 10.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI