AGOSTI 26, 2022 | HABARI ZILIONGEZWA: MACHI 8, 2023
URUSI

HABARI ZA KARIBUNI—HUKUMU YABADILISHWA | Wavumilia Mateso kwa Utulivu na Uhakika

CHEZA

Machi 1, 2023, Mahakama ya Eneo la Stavropol ilitangaza uamuzi wake katika kesi inayowahusu Ndugu Anatoliy na mke wake, Irina, na pia Ndugu Viktor Zimovskiy. Vifungo ambavyo Anatoliy na Viktor walikuwa wamepewa hapo awali vimebadilishwa vikawa vifungo vya nje. Anatoliy hahitaji kwenda kwenye kambi ya kurekebisha tabia. Viktor aliachiliwa mara moja. Kifungo cha nje cha Irina hakijabadilishwa. Irina hahitaji kwenda gerezani wakati huu.

Novemba 14, 2022, Mahakama ya Jiji la Georgievskiy iliyo katika Eneo la Stavropol iliwahukumu Anatoliy na mke wake, Irina, pamoja na Viktor. Anatoliy alihukumiwa kifungo cha miaka minne na miezi miwili katika kambi ya kurekebisha tabia. Irina alihukumiwa kifungo cha nje cha miaka minne na miezi miwili. Viktor alihukumiwa kifungo cha miaka sita na miezi miwili gerezani na alipelekwa gerezani moja kwa moja.

Mfuatano wa Matukio

Oktoba 23, 2019

Maofisa wa polisi walifanya msako kwenye nyumba za familia tatu za Mashahidi wa Yehova katika mji wa Georgievsk. Walipokuwa wakifanya msako kwenye nyumba hizo, kwa ulaghai maofisa hao waliweka humo vitu mbalimbali ambavyo walikusudia kutumia kama ushahidi wa uwongo. Anatoliy, Irina, Viktor, na Mashahidi wengine nane walizuiliwa na kuhojiwa usiku mzima
Desemba 30, 2019

Kesi ya uhalifu ilifunguliwa dhidi ya Anatoliy, Irina, na Viktor
Januari 23, 2020

Viktor aliitwa tena ili akahojiwe, kisha akazuiliwa. Siku iliyofuata, alihamishwa kutoka kwenye sehemu aliyokuwa amezuiliwa na akapelekwa mahabusu
Machi 23, 2020

Viktor aliachiliwa kutoka mahabusu na akawekwa kwenye kifungo cha nyumbani
Mei 6, 2020

Viktor aliachiliwa kutoka kwenye kifungo cha nyumbani na akawekewa vizuizi vya kusafiri
Oktoba 6, 2021

Viktor aliondelewa vizuizi vya kusafiri
Machi 10, 2022

Kesi ya uhalifu ilianza

Maelezo Mafupi Kuwahusu

Anatoliy Gezik

Alizaliwa: 1967 (Nezlobnaya, Eneo la Stavropol)

Maisha Yake: Alipokuwa akifanya kazi kwenye kituo cha kurekebisha tabia cha watoto, aliwaza sana kuhusu maisha ya baadaye ya watoto hao na pia alitaka kujua kusudi la uhai. Alipata majibu alipojifunza Biblia pamoja na Mashahidi wa Yehova. Alifunga ndoa na Irina mwaka wa 1997. Alibatizwa mwaka wa 1998

Maelezo ya Kibinafsi

Nini ambacho kimekuimarisha wakati wa majaribu haya?

Mimi hufikiria sana kuhusu ulimwengu mpya utakaokuja na kwa sababu hiyo ninajua kwamba maisha yana kusudi, si bure. Sote tutakabili majaribu wakati ujao, na majaribu hayo yatatofautiana. Ili kuyashinda, tutahitaji kukazia akilini mwetu mambo ambayo Yehova na Mwana wake tayari wamefanya kwa ajili yetu. Katika kipindi hiki cha majaribu, ninahisi kana kwamba Yehova amekuwa akinishika mkono, na ninapolemewa, ananiinua.

Viktor Zimovskiy

Alizaliwa: 1969 (Georgievsk)

Maisha Yake: Wazazi wake walikufa alipokuwa na miaka 13

Alianza kujifunza Biblia baada ya mume wa dada yake kumweleza kuwahusu Mashahidi wa Yehova. Tumaini la ufufuo lilimfariji sana. Alibatizwa mwaka wa 2003

Alifunga ndoa na Nadezhda mwaka wa 2006. Wana watoto watatu. Viktor alipokamatwa, Nadezhda alikuwa mjamzito, akitarajia kupata mtoto wao wa tatu

Maelezo ya Kibinafsi

Yehova alikutegemeza jinsi gani ulipokuwa kwenye kifungo cha nyumbani?

Nilipokuwa kwenye kifungo cha nyumbani, nilizuiwa kutumia simu au Intaneti na hata kuondoka nyumbani. . . . Kwa hiyo singeweza kuiandalia familia yangu mahitaji. Mke wangu alikuwa na mimba ya miezi tisa, na hata singeweza kwenda dukani kununua chakula au vitu tulivyohitaji kwa ajili ya binti yetu ambaye angezaliwa hivi karibuni. Nilihisi vibaya sana, lakini familia yetu na waabudu wenzetu walitusaidia sana. Yehova aliwatumia ndugu na dada zetu kutimiza mahitaji yetu yote, yaani, chakula, mavazi, na pia faraja.

Tunaamini kwamba Yehova ataendelea kuwa “karibu na wote wanaomwitia” wanapovumilia wakiwa na shangwe na tumaini.—Zaburi 145:18.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI