JUNI 1, 2022 | HABARI ZILIONGEZWA: SEPTEMBA 6, 2023
URUSI

HABARI ZA KARIBUNI—NDUGU WAHUKUMIWA | Wanaendelea Kuwa Imara kwa Sababu Yehova Yuko Upande Wao

CHEZA

Septemba 5, 2023, Mahakama ya Jiji la Nizhnekamsk iliyo katika Jamhuri ya Tatarstan iliwahukumu Ndugu Denis Filatov, Ndugu Stanislav Klyuchnikov, na Ndugu Dmitriy Yarchak kifungo cha nje cha miaka sita kila mmoja. Hawahitaji kwenda gerezani wakati huu.

Mfuatano wa Matukio

Novemba 18, 2020

Maofisa wa FSB pamoja na maofisa wengine wa polisi waliobeba silaha walivamia nyumba 12 za Mashahidi wa Yehova katika jiji la Nizhnekamsk. Ndugu tisa na dada watatu walipelekwa kituoni ili wakahojiwe
Agosti 24, 2021

Baada ya kuhojiwa, Denis, Stanislav, na Dmitriy waliwekewa vizuizi vya kusafiri
Oktoba 7, 2021

Denis, Stanislav, na Dmitriy walishtakiwa kwa madai kwamba ‘waliimba nyimbo za kipekee za kidini na kusali’
Januari 27, 2022

Kesi hiyo ya uhalifu ilianza kusikilizwa upya kwenye Mahakama ya Jiji la Nizhnekamsk iliyo katika Jamhuri ya Tatarstan

Maelezo Mafupi Kuwahusu

Stanislav Klyuchnikov

Alizaliwa: 1982 (Nizhnekamsk)

Maisha Yake: Ana kampuni ya kutengeneza video. Anapenda kukusanya stempu na kwenda matembezi

Alikutana na Mashahidi wa Yehova akiwa kijana. Walimtendea kwa fadhili na upendo na jambo hilo lilimgusa moyo. Alibatizwa mwaka wa 1998

Alifunga ndoa na Oksana mwaka wa 2003. Wana binti mmoja

Maelezo ya Kibinafsi

Ni nini kinakuchochea uendelee kuvumilia?

Nimeazimia kuendelea kutembea katika barabara yenye nafasi ndogo inayoongoza kwenye uzima ulio wa kweli na hilo linanichochea niendelee kuvumilia. Ninahisi kama mtume Petro aliyesema hivi kwenye Yohana 6:68: “Bwana, tutaenda kwa nani? Wewe una maneno ya uzima wa milele.” Maneno hayo yanaonyesha kwamba Shetani anaweza kutushawishi kupita njia nyingine lakini njia ya kweli ni moja tu nayo inaongoza kwa Mungu wa kweli. Si jambo la hekima kumkataa Yule anayetusaidia na kutupa nguvu, Yeye hatatuacha kamwe!

Dmitriy Yarchak

Alizaliwa: 1984 (Nizhnekamsk)

Maisha Yake: Ana tatizo la kupooza ubongo. Baada ya kumaliza shule alifanya kazi ya uhasibu katika taasisi inayowatunza watoto wenye ulemavu. Muda si mrefu alikuwa anafanya kazi akiwa meneja wa mauzo katika kampuni inayotoa huduma za mawasiliano

Alianza kujifunza Biblia akiwa tineja. Aliguswa moyo na mambo aliyojifunza kuhusu utu wa Yehova. Alibatizwa mwaka wa 1998

Alifunga ndoa na Svetlana mwaka wa 2010

Maelezo ya Kibinafsi

Ni jambo gani ambalo limekuimarisha sana?

Ninapenda kusali na ninafurahia muda ninaotumia kusali. Ninahisi kwamba Baba yangu amekuwa karibu nami maisha yangu yote na mpaka leo bado yuko karibu nami. Ninamwomba hekima ili nitende kwa njia inayofaa. Pia, ninamwomba anisaidie niwe mtulivu na niwe na maoni yanayofaa kuhusu hali yangu.

Ndugu zetu wanaendelea kumtegemea Yehova awape nguvu na hatuna shaka kwamba wanahisi kama alivyohisi mtunga zaburi Daudi aliyesema: “Nina hakika kuhusu jambo hili: Mungu yuko upande wangu.”—Zaburi 56:9.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI