Januari 31, 2022, Mahakama ya Wilaya ya Pozharskiy iliyo katikaEneo la Primorye imewahukumu Yuriy na Sergey. Wote wawili wamepewa vifungo vya miaka sita gerezani.

Yuriy Belosludtsev

• Alizaliwa: 1964 (Smidovich, Eneo Lililotengewa Wayahudi)

• Maisha Yake: Alilelewa na nyanya yake katika kijiji kidogo. Alifanya kazi akiwa injinia katika kampuni ya umeme. Anapenda kuvua samaki na kuteleza kwenye theluji

  Alifunga ndoa na Yelena mwaka wa 1985. Wote wawili walipendezwa na ahadi ya Mungu ya kuondoa uovu na kuteseka. Wote wawili walistaajabishwa na utimizo wa unabii wa Biblia. Kweli hizo ziliwasaidia kukubali funzo la Biblia. Walibatizwa mnamo 1994

Sergey Sergeyev

• Alizaliwa: 1955 (Dukhovnitskoye, Eneo la Saratov)

• Maisha Yake: Alifanya kazi katika machimbo ya makaa ya mawe hadi alipostaafu. Alifunga ndoa na Nelly mnamo 1991. Wana binti wawili na mwana mmoja. Wenzi hao wa ndoa wanapenda sana mbwa

  Walianza kujifunza Biblia muda mfupi baada ya harusi yao. Walipendezwa na usahihi wa unabii wa Biblia na ushauri wake unaofaa. Walibatizwa mnamo 1996

Machi 17, 2019, maofisa wa Idara ya Usalama wa Taifa (FSB) walivamia nyumba nyingi za Mashahidi wa Yehova huko Luchegorsk, Eneo la Primorye. Akina ndugu na dada walihojiwa, wengine kwa saa saba hivi. Yuriy na Sergey walizuiliwa.

Siku mbili baadaye, ndugu hao wawili waliwekwa mahabusu ambako walikaa kwa zaidi ya miezi sita. Baada ya kuachiliwa mnamo Septemba 2019, walikaa kwa karibu miezi mitano katika kifungo cha nyumbani.

Wote wawili wanasema kwamba sala iliwasaidia sana kukabiliana na hali walipokuwa mahabusu. Sergey anasema kwamba Biblia pia ilimsaidia kudumisha mtazamo mzuri. Anasema hivi: “Nilikumbuka maneno ya Yesu: ‘Ikiwa wamenitesa mimi, watawatesa ninyi pia.’ (Yohana 15:20) Nilijiambia hivi: ‘Kwa kweli, kila kitu kinachotupata kilimpata Yesu Kristo, wanafunzi wake, na mitume. Inaonekana kwamba Yehova anaamini ninaweza kutoa ushahidi mzuri hapa.’ Mawazo hayo pamoja na kuona Yehova akijibu sala zangu kuliniimarisha na kunisaidia niwe mtulivu na mwenye furaha.”

Yuriy anasema kwamba zamani haikuwa rahisi sana kwake kufanya usomaji wa Biblia. Ndugu yake mmoja wa kiroho alimsaidia kuboresha usomaji huo. Kuwa na zoea hilo lilimnufaisha alipokuwa mahabusu. Anasema hivi: “Nilikumbuka mifano ya Biblia na iliyo katika machapisho yetu ambayo nilijifunza zamani. Hilo liliniimarisha na kunisaidia kuendelea kuwa na furaha. Pia lilinisaidia kuepuka kuwa na wasiwasi kupita kiasi.”

Tunasali tukiwa na uhakika kamili kwamba Yehova ataendelea kuwa “kimbilio . . . na nguvu” kwa ndugu na dada zetu nchini Urusi katika “nyakati za taabu.”​—Zaburi 46:1.