JULAI 8, 2022
URUSI

Kupata Nguvu Kupitia Sala

CHEZA

Mahakama ya Wilaya ya Pervomayskiy iliyo Izhevsk itatangaza uamuzi wake hivi karibuni katika kesi inayomhusu Ndugu Sergey Ashikhmin, Ndugu Maksim Derendyaev, na Ndugu Aleksandr Kutin. Mwendesha mashtaka bado hajatoa ombi la hukumu anayopendekeza.

Mfuatano wa Matukio

Aprili 14, 2021

Maofisa wa FSB walifanya msako kwenye nyumba 12 hivi za Mashahidi wa Yehova. Sergey alihojiwa kwa saa saba. Maksim na Aleksandr walikamatwa na kupelekwa gerezani
Aprili 15, 2021

Maksim na Aleksandr walipelekwa mahabusu
Aprili 29, 2021

Aleksandr aliachiliwa kutoka mahabusu
Mei 14, 2021

Aleksandr aliwekwa katika kifungo cha nyumbani
Julai 9, 2021

Maksim aliachiliwa kutoka mahabusu na kuwekwa kwenye kifungo cha nyumbani
Machi 14, 2022

Kesi ya uhalifu ilianza

Maelezo Mafupi Kuwahusu

Sergey Ashikhmin

Alizaliwa: 1973 (Zheshart, Jamhuri ya Komi)

Maisha Yake: Alifanya kazi akiwa mlinzi na baadaye alifanya kazi ya kuuza bidhaa. Hivi karibuni alifanyiwa upasuaji wa moyo na kwa sababu hiyo hawezi kufanya kazi

Kujifunza kwamba Yesu alikufa ili kutoa fidia kuligusa moyo wake. Alibatizwa na kuwa Shahidi wa Yehova mwaka wa 2001. Alifunga ndoa na Anastasiya mwaka wa 2007

Maelezo ya Kibinafsi

Sala ilikusaidia katika hali gani?

Nyumba yetu ilipofanyiwa msako, kila kitu kilitokea haraka sana. Sikuwa na muda mrefu wa kusali, hivyo kama Nehemia alivyofanya nyakati za Biblia, nilisali kwa ufupi, kimyakimya, nikiomba hekima, na ujasiri.

Kwa kuongezea, msako huo ulipokuwa ukiendelea, niliulizwa maswali mengi ya kunitega. Nilimwomba Yehova anisaidie kujua wakati wa kukaa kimya, na pia anisaidie kuzungumza inapokuwa lazima kufanya hivyo.

Aleksandr Kutin

Alizaliwa: 1982 (Izhevsk)

Maisha Yake: Anafanya kazi ya kuchomelea vyuma

Baada ya kujifunza kumhusu Yesu, alichochewa kufuata mfano wake. Alibatizwa mwaka wa 2002. Alifunga ndoa na Guzel mwaka wa 2018

Maelezo ya Kibinafsi

Uliweza kudumishaje shangwe yako ulipokuwa mahabusu?

Nilipokuwa mahabusu kila kitu nilichofurahia kiliondolewa: wapendwa wangu, mikutano, Biblia, na hata ratiba yangu. Nilipokuwa nyumbani, ningeamka mapema asubuhi, na kupika chai au kahawa, kisha tungesoma mstari wa Biblia na kuuzungumzia pamoja na mke wangu. Sikuwahi kufikiria kwamba mtu fulani angeninyang’anya mambo hayo yote. Lakini nilitambua kwamba hakuna anayeweza kuninyang’anya zawadi ya sala. Niliposali, nilihisi kwamba Yehova ananipa roho yake takatifu ili nidumishe shangwe yangu bila kukata tamaa.

Pia, nilikuwa na fursa nyingi za kutoa ushahidi. . . . Wakati fulani, tulikuwa watu nane kwenye chumba cha gereza, na kila mtu aliuliza kwa nini nilikamatwa. Niliketi na kuwaeleza sababu. Muda huohuo, Yehova alinipa utulivu na amani. Nilisali kimyakimya na kumshukuru Yehova kwa jambo hilo.

Ndugu zetu wanaendelea kukabiliana na ukosefu wa haki wakiwa na uhakika katika Yehova ambaye anatuahidi: “Usiogope, kwa maana nipo pamoja nawe.”—Isaya 43:5.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI