AGOSTI 24, 2022
URUSI

Kuwafikiria Wengine Huwasaidia Akina Ndugu Kuvumilia Kifungo

CHEZA

Mahakama ya Jiji la Taiginskiy iliyo katika Eneo la Kemerovo itatangaza hivi karibuni uamuzi wake katika kesi inayowahusu Ndugu Maksim Morozov na Ndugu Yuriy Usanov. Mwendesha-mashtaka bado hajatoa ombi la hukumu anayopendekeza.

Mfuatano wa Matukio

Aprili 1, 2021

Kesi ya uhalifu ilifunguliwa dhidi ya Yuriy kwa madai ya kupanga mikutano ya kidini ya shirika lililopigwa marufuku
Aprili 2, 2021

Maofisa wa polisi walipekua nyumba ya Yuriy kwa saa tatu. Alikamatwa na kupelekwa mahabusu
Agosti 4, 2021

Kesi ya uhalifu ilifunguliwa dhidi ya Maksim
Agosti 6, 2021

Maksim alikamatwa na kuzuiliwa usiku mzima
Agosti 7, 2021

Maksim alishtakiwa kwa kosa la uhalifu na akapelekwa mahabusu
Mei 16, 2022

Kesi ya uhalifu ilianza

Maelezo Mafupi Kuwahusu

Maksim Morozov

Alizaliwa:1983 (Volgograd, Eneo la Volgograd)

Maisha Yake: Alitumikia akiwa mwanajeshi anayeruka kwa parachuti. Baadaye alifanya kazi akiwa dereva wa malori

Alianza kujifunza Biblia pamoja na Mashahidi wa Yehova baada ya kuondoka jeshini. Alibatizwa mwaka wa 2009

Maelezo ya Kibinafsi

Ni nini kinachokusaidia kudumisha shangwe yako ukiwa mahabusu?

Nina Biblia, na ninaisoma kila siku. Ninapenda hasa kusoma barua za mtume Paulo na alivyofafanua jinsi alivyofungwa gerezani na hata kufungwa kwa minyororo na mikatale. Yeye hakukazia fikira hali zake, bali alikazia fikira kazi ya kiroho aliyopaswa kufanya.

Isitoshe, kujua kwamba siko peke yangu kunanitia moyo sana. Niko pamoja na Yehova, Yesu na malaika wengi, bila kusahau undugu wetu. Katika video fulani ya Caleb na Sophia, tuliona jinsi malaika walivyofurahi watoto hao walipofanya maamuzi mazuri shuleni. Jambo hilo hunikumbusha kwamba ninapaswa kuona kila changamoto kama nafasi ya kuonyesha ushikamanifu wangu kwa Mungu. Hilo hunisaidia nisijifikirie kupita kiasi au kukazia fikira magumu ninayokabili bali nikazie fikira masuala muhimu yanayohusika.

Yuriy Usanov

Alizaliwa: 1991 (Gorno-Chuisky, Eneo la Irkutsk)

Maisha Yake: Alifanya kazi akiwa fundi-umeme na pia alichomelea vyuma. Alipokuwa bado mtoto, yeye na mama yake walijifunza kumhusu Yehova. Alibatizwa mwaka wa 2007

Alifunga ndoa na Irina mwaka wa 2021

Maelezo ya Kibinafsi Kutoka kwa Irina, a Mke wa Yuriy,

Yuriy anakutia moyo jinsi gani licha ya kwamba yuko mahabusu?

Kufikia sasa, sijaruhusiwa kumtembelea au hata kumpigia simu. Njia pekee ya kuwasiliana tunayoruhusiwa kutumia ni barua, na mara nyingi barua hizo huchelewa kufika. Ingawa ni bora zaidi kuwasiliana ana kwa ana, bado tunathamini fursa hii ya kuendelea kuwasiliana kwa barua.

Ninatamani sana kuwasiliana naye moja kwa moja na kusoma Biblia pamoja kama tulivyokuwa tukifanya. Hata hivyo, kwenye barua zake karibu zote, Yuriy huniandikia mistari ya Biblia ambayo inamtia moyo. Wakati mwingine, anatia ndani hazina za kiroho anazopata kwenye barua anazopokea. Kupitia barua zetu, tunafanya ibada ya familia pamoja. Sikuzote, yeye hunikumbusha kwamba Yehova anatupenda na ametuandalia baraka nyingi. Yuriy pia hunihakikishia kwamba ananipenda na ananiambia kwamba anathamini sana jitihada zangu. Hayo yanaweza kuonekana kama mambo madogo, lakini yananitia moyo sana.

Tunajua kwamba Yehova anathamini sana jinsi ndugu na dada hao wanavyojidhabihu. Tuna uhakika kwamba Yehova ataendelea kuwabariki sasa na atawabariki hata zaidi milele.—Waebrania 11:26.

a Makala hii ilipokuwa ikitayarishwa, Ndugu Usanov alikuwa mahabusu. Hatukuweza kupata maelezo kutoka kwake.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI