Maria Magdalene Alikuwa Nani?
Jibu la Biblia
Maria Magdalene alikuwa mfuasi mwaminifu wa Yesu Kristo. Inaelekea jina lake, Magdalene, lilitokana na mji wa Magdala (huenda Magadan), ambalo lilikuwa karibu na Bahari ya Galilaya. Huenda Maria aliwahi kuishi katika eneo hilo.
Maria Magdalene alikuwa mmoja kati ya wanawake waliosafiri pamoja na Yesu na wanafunzi wake na kuwategemeza kimwili. (Luka 8:1-3) Alishuhudia Yesu alipokuwa anauawa, na alikuwa miongoni mwa watu wa kwanza kumwona Yesu baada ya kufufuliwa.—Marko 15:40; Yohana 20:11-18.
Je, Maria Magdalene alikuwa kahaba?
Biblia haisemi kwamba Maria Magdalene alikuwa kahaba. Biblia inataja tu kwamba Yesu alitoa roho waovu saba ndani ya Maria.—Luka 8:2.
Wazo la kwamba alikuwa kahaba lilitoka wapi? Miaka mingi baada ya kifo chake, watu walidai kwamba alikuwa yule mwanamke ambaye alilowesha miguu ya Yesu kwa machozi na kuifuta kwa nywele za kichwa chake. (Luka 7:36-38) Hata hivyo, hakuna sehemu yoyote katika Biblia inayounga mkono jambo hilo.
Je, Maria Magdalene alikuwa “mtume wa mitume”?
Hapana. Kanisa Katoliki linamwita Maria “Mt. Maria Magdalene” na pia “mtume aliyetumwa kwa mitume” kwa sababu alikuwa miongoni mwa watu wa kwanza kuwajulisha wanafunzi kwamba Yesu amefufuliwa. (Yohana 20:18) Lakini jambo hilo halimaanishi kwamba alikuwa mtume. Na hakuna mahali ambapo Maandiko yanamwita hivyo.—Luka 6:12-16.
Biblia ilikamilika mwishoni mwa karne ya kwanza W.K. Hata hivyo, mpaka karne ya sita ndipo wenye mamlaka katika kanisa walipofanya uamuzi wa kumpandisha cheo. Maandishi yaliyoandikwa katika karne ya pili na ya tatu—ambayo si sehemu ya Biblia—yanasema kwamba baadhi ya mitume wa Yesu walimwonea wivu Maria. Habari kama hizo zilizotungwa hazina msingi wowote wa Kimaandiko.
Je, Maria Magdalene alikuwa mke wa Yesu Kristo?
Hapana. Biblia inataja moja kwa moja kwamba Yesu alikuwa mseja. a
a Ona makala yenye kichwa “Je, Yesu Alikuwa na Mke? Je, Alikuwa na Ndugu na Dada?”
Huenda Ukapenda Pia
MAJIBU YA MASWALI YA BIBLIA
Wanawake Katika Biblia—Tunaweza Kujifunza Nini Kutoka Kwao?
Ona tofauti iliyopo kati ya wanawake wa hawa pekee katika Biblia na wengine walio waovu kabisa.
IGENI IMANI YAO
Maria Magdalene—“Nimemwona Bwana!”
Mwanamke huyo mwaminifu alipewa pendeleo la kuwajulisha wengine habari hizo njema.
MAJIBU YA MASWALI YA BIBLIA
Je, Yesu Alikuwa na Mke? Je, Alikuwa na Ndugu na Dada?
Kwa kuwa Biblia haisemi moja kwa moja ikiwa Yesu alioa au la, tunawezaje kujua kwamba hakuwahi kufunga ndoa?
