VIJANA HUULIZA

Mwonekano Wangu Unanitambulishaje?

CHEZA

Kwa nini unapaswa kujali kile unachovaa? Kwa sababu mavazi hueleza jinsi mtu alivyo. Mavazi yako yanaeleza nini kukuhusu?

Makosa matatu yanayohusiana na mitindo na jinsi ya kuyaepuka

Kosa la 1: Kuruhusu vyombo vya habari viamue mwonekano wako.

Kijana anayeitwa Theresa anasema hivi: “Nyakati nyingine ninavutiwa na mtindo kwa sababu nimeona matangazo mengi ya mtindo huo. Ubongo wako unapojaa picha za watu wanaovaa vazi fulani inaweza kuwa rahisi kuwaiga.”

Si wasichana peke yao wanaothiriwa na matangazo. “Wavulana huathiriwa pia na mitindo ya kisasa,” kinasema kitabu The Everything Guide to Raising Adolescent Boys. “Wanapokua huona matangazo yanayowalenga.”

Njia bora: Biblia inasema hivi: “Mtu asiye na uzoefu huamini kila neno, lakini mtu mwerevu huzifikiria hatua zake” (Methali 14:15) Kulingana na kanuni hiyo, jifunze kupambanua mambo unayoona katika matangazo. Kwa mfano, unapoona matangazo ya nguo yanayotumia maneno kama “ya kisasa,” “mpya kabisa,” au “inavutia kimapenzi,” jiulize hivi:

‘Ni nani anayefaidika nikifuata mtindo huo?’
‘Mtindo huo utafanya nionekane kuwa mtu wa aina gani?’
‘Je, hivyo ndivyo nilivyo?’

Dokezo: Kwa juma moja, angalia vizuri matangazo ya nguo na matangazo mengine yanayohusu mitindo. Yanahamasisha watu waishi maisha ya aina gani? Je, kuna ujumbe wowote uliojificha ambao umekusudiwa kukuchochea uhisi kwamba unahitaji kufuata mtindo fulani? “Kuna shinikizo kubwa la kuwa na mwonekano mzuri sana, kuvaa vizuri sana, na kuonyesha umbo lako ‘zuri,’” anasema msichana anayeitwa Karen. “Watangazaji wa biashara wanaoendeleza dhana hiyo katika matangazo yao huwavutia zaidi vijana.”

Kosa la 2: Kufuata mtindo maarufu ili ukubaliwe.

Kijana anayeitwa Manuel anasema, “Ikiwa mtindo fulani wa mavazi umetoka karibuni, basi kila mtu atauvaa. Usipouvaa, watu watakuelewa vibaya.” Msichana anayeitwa Anna anakubaliana na jambo hilo. Anasema hivi: “Suala kuu si mtindo wenyewe bali ni kukubalika na jamii.”

Njia bora: Biblia inasema hivi: “Acheni kufanyizwa kulingana na mfumo huu wa mambo.” (Waroma 12:2) Ukitumia ushauri huo, angalia kabati lako la nguo na ujiulize hivi:

‘Ni mambo gani yanayochochea uchaguzi wangu wa mavazi?’
‘Je, ni muhimu sana kwangu kuwa na mavazi yenye nembo fulani?’
‘Je, ninajaribu kuwavutia watu kupitia mavazi yangu?’

Dokezo: Badala ya kuona mambo kwa njia mbili tu, yaani, ya kisasa (na inayokubalika) au iliyopitwa na wakati (na isiyopendwa), ona mambo kwa njia hii: inakufanya ujiamini. Kadiri unavyojiamini, ndivyo ambavyo hutahangaika sana ukubalike.

Kosa la 3: Kufikiria kuwa ‘ikivutia zaidi kingono, ndiyo nzuri zaidi.’

Msichana anayeitwa Jennifer anakiri hivi: “Kusema kweli, nyakati nyingine natamani kuvaa mtindo wa nguo unaosisimua, yaani nguo ambayo ni fupi sana au inabana sana.”

Njia bora: Biblia inasema hivi: “Kujipamba kwenu kusiwe kule . . . kwa nje . . . bali kuwe yule mtu wa siri wa moyoni.” (1 Petro 3:3, 4) Ukitumia ushauri huo, fikiria ni nini kinachovutia zaidi—mavazi yenye mvuto au tabia nzuri.

Dokezo la mitindo: Mtindo wako bora kabisa unapaswa kuwa kiasi. Ni kweli kwamba, watu wengi hawapendi sifa hiyo. Lakini fikiria jambo hili:

Je, umewahi kuzungumza na mtu ambaye anaongea sana hasa kuhusu mambo yake tu? Jambo la kusikitisha ni kwamba, huenda mtu huyo hajui kwamba anakuchosha!

Kama yalivyo mazungumzo, mavazi yanaweza kuwa ya ‘mimi tu’ na hivyo kuwakasirisha watu walio karibu yetu

Unapovaa vibaya, unakuwa kama huyo mtu. Mavazi yako yanatoa ujumbe ‘nitazameni,’ na hilo linaweza kufanya uonekane hujiamini au unajifikiria mwenyewe tu—au yote mawili. Pia inaweza kufanya uonekane unataka watu wakukazie fikira—au hata wakukazie fikira kwa njia mbaya.

Badala ya kutangaza kitu ambacho huna, jaribu kuwa na kiasi. “Kuwa na kiasi hakumaanishi uvae kama bibi yako,” anasema kijana anayeitwa Monica. “Inamaanisha ujiheshimu na uwaheshimu wale walio karibu yako.”