Watu ambao ni waaminifu huaminiwa na wazazi, marafiki, na waajiri wao. Wao hutii sheria zilizowekwa, hutimiza ahadi zao, na kusema kweli nyakati zote.

Karibu mara zote, kiwango cha uhuru unachopata kitategemea jinsi ulivyothibitika kuwa mtu mwenye kuaminika.

“Njia bora zaidi ya kuwafanya wazazi wako wakuamini ni: Kuonyesha kwamba umekomaa na unategemeka, wanapokuwepo na hata wasipokuwepo.”—Sarahi.

KANUNI YA BIBLIA: “Endeleeni kuthibitisha jinsi ninyi wenyewe mlivyo.”—2 Wakorintho 13:5.

Iwe unataka wengine wakuamini zaidi au waanze kukuamini tena, chukua hatua zifuatazo.

Uwe mnyoofu. Uwongo utafanya wengine waache kukuamini haraka sana. Kwa upande mwingine, unaposema kweli bila kufichaficha mambo, hasa makosa yako, wengine watakuamini.

“Ni rahisi sana kusema kweli mambo yanapokuwa shwari. Lakini kusema kweli kuhusiana na habari zako ambazo si nzuri huwafanya wengine wakuamini zaidi.”—Caiman.

KANUNI YA BIBLIA: “Tunataka kujiendesha kwa unyoofu katika mambo yote.”—Waebrania 13:18.

Uwe mwenye kutegemeka. Katika utafiti mmoja uliofanywa nchini Marekani, asilimia 78 ya waajiri walisema kwamba kutegemeka “ni moja kati ya sifa kuu tatu zinazoangaliwa kwa watu wanaotaka kuajiriwa.” Ukijifunza kuwa mwenye kutegemeka sasa, utafaidika utakapokuwa mtu mzima.

“Wazazi wangu hutambua ninapotekeleza majukumu yangu bila wao kunifuatilia. Na kadiri ninavyofanya hivyo, ndivyo wanavyoniamini zaidi.”—Sarah.

KANUNI YA BIBLIA: “[Nina] uhakika kwamba utakubali, . . . nikijua utafanya hata zaidi ya jambo ninalokuomba.”—Filemoni 21.

Uwe mwenye subira. Ukuzi wa kimwili huonekana wazi. Lakini tofauti na hilo, inachukua muda kwa wengine kutambua ikiwa mtu amekomaa kiakili na kihisia pia.

“Wazazi na wengine hawawezi kukuamini kutokana na jambo moja tu ulilofanya. Hata hivyo, watakuamini hatua kwa hatua ikiwa utathibitika kuwa mwenye kutegemeka kadiri muda unavyopita.”—Brandon.

KANUNI YA BIBLIA: “Jivikeni . . . subira.” —Wakolosai 3:12.