Afya Bora—Hivi Karibuni!

“WAZO la kutokuwa wagonjwa tena . . . linapendwa sana leo,” laripoti gazeti Focus la Ujerumani. Lakini hilo si wazo jipya. Muumba alipowaumba wanadamu hakukusudia wawe wagonjwa. Yeye hakukusudia wanadamu wawe tu na “kiwango kinachokubalika cha afya kwa watu wote ulimwenguni.” (Italiki ni zetu.) Muumba wetu alikusudia watu wote wawe na afya kamilifu!

Basi kwa nini sote tunakuwa wagonjwa? Biblia hutuambia kwamba Yehova Mungu aliwaumba wazazi wa wanadamu wote, Adamu na Hawa, wakiwa wakamilifu. Mara tu baada ya kuumba, ‘Mungu aliona kila kitu alichokifanya, na tazama, kilikuwa chema sana.’ Muumba wetu mwenye upendo hakukusudia kamwe wanadamu watatizwe na magonjwa na kifo. Lakini Adamu na Hawa walipoacha njia ya uhai waliyoagizwa kufuata, walitumbukia kwenye dhambi. Dhambi ya Adamu ilileta kifo, ambacho kilipitishwa kwa wanadamu wote.—Mwanzo 1:31; Waroma 5:12.

Yehova hakuwaacha wanadamu. Wala hakutupilia mbali kusudi lake la awali kwa wanadamu na dunia. Kotekote katika Biblia, yeye husema juu ya kusudi lake la kuwarudishia wanadamu watiifu afya bora kama ilivyokuwa mwanzoni. Mwana wa Mungu, Yesu Kristo alipokuwa duniani, alionyesha nguvu za Mungu za kuponya magonjwa. Kwa mfano, Yesu aliponya vipofu, wenye ukoma, viziwi, watu wenye ugonjwa wa chovya, kifafa, na waliopooza.—Mathayo 4:23, 24; Luka 5:12, 13; 7:22; 14:1-4; Yohana 9:1-7.

Hivi karibuni Mungu atamwagiza Mfalme wake wa Kimesiya, Yesu Kristo, aongoze wanadamu. Chini ya utawala wake, unabii wa Isaya utatimia: “Hapana mwenyeji atakayesema, Mimi mgonjwa; watu wakaao humo watasamehewa uovu wao.” (Isaya 33:24) Jambo hilo litatukiaje?

Nabii huyo asema kwamba watu “watasamehewa uovu wao.” Kwa hiyo, kisababishi cha awali cha magonjwa kitaondolewa, yaani,  dhambi ambayo wanadamu wamerithi. Jinsi gani? Thamani ya dhabihu ya fidia ya Yesu itatumiwa kwa wanadamu watiifu, na hivyo kuondoa hali inayoleta magonjwa na kifo. Dunia yote itakuwa paradiso. Mtume Mkristo Yohana aandika hivi: “[Mungu] atafuta kabisa kila chozi kutoka katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe. Mambo ya zamani yamepitilia mbali.” Hali hiyo itatukia hivi karibuni!—Ufunuo 21:3, 4; Mathayo, sura ya 24; 2 Timotheo 3:1-5.

Kuwa na Usawaziko

Leo, mamilioni ya watu husumbuliwa sana na magonjwa. Kwa hiyo ni jambo la kawaida tu kwa watu kuhangaikia afya yao na afya ya wapendwa wao.

Wakristo huthamini sana jitihada zinazofanywa na madaktari leo, nao hujitahidi sana kudumisha afya bora. Hata hivyo, ahadi ya Biblia ya kuishi wakati ujao bila magonjwa inatusaidia kuwa na usawaziko kuhusu hali ya afya. Mfalme wa Kimesiya atakapotawala wanadamu, ndipo tu tutakapokuwa na afya kamilifu. Kama tulivyoona, hata uvumbuzi wa kitiba wenye kustaajabisha sana haujafaulu kuwaletea wanadamu wote afya bora.

Mradi wa kuwa na “kiwango kinachokubalika cha afya kwa watu wote ulimwenguni” utatimizwa hivi karibuni. Lakini hautatimizwa na UM wala na Shirika la Afya Ulimwenguni wala na wanamazingira wala na wanamapinduzi wa kijamii wala na madaktari. Mradi huo utatimizwa na Yesu Kristo. Itakuwa shangwe kama nini kuona wanadamu ‘wakiwekwa huru kutoka katika utumwa wa uharibifu na kuwa na uhuru wenye utukufu wa watoto wa Mungu’!—Waroma 8:21.

[Picha katika ukurasa wa 10]

Watu wote watakuwa na afya bora katika ulimwengu mpya wa Mungu