Kutoka kwa Wasomaji Wetu

Halloween Ningependa kusahihisha taarifa fulani niliyosoma katika makala ya “Je, Sherehe Zinazopendwa Zinaweza Kudhuru?” (Oktoba 8, 2001) Mnataja “Usiku wa Guy Fawkes,” ambao pia unaitwa usiku wa mioto mikubwa huku Uingereza. Ni wazi kwamba Usiku wa Guy Fawkes ni sherehe ambayo Wakristo wanapaswa kuepuka. Ni sikukuu ya kisiasa, inayoadhimisha kuuawa kwa mwanamume mmoja. Lakini, ijapokuwa sherehe hiyo inafanywa katika tarehe (5 Novemba), inayokaribia siku ya sherehe ya Halloween, usiku wa mioto hauhusishi kwa vyovyote sherehe ya kimizungu ya Halloween.

P. B., Uingereza

“Amkeni!” linajibu: Tulitaja sherehe ya “Halloween” kama mfano wa desturi yenye chanzo cha kuchukiza inayopendwa na watu wengi. Tulisema kwamba Sherehe ya Kandili huko Taiwan na Usiku wa Guy Fawkes ziko “kama” sherehe ya “Halloween” kwa njia fulani. Hata hivyo, hatukukusudia kuleta wazo la kwamba sherehe hizo zinahusiana na sherehe ya “Halloween” au kwamba zina chanzo kimoja. Hata hivyo, kwa sababu sherehe hizo zinafanana na sherehe ya “Halloween,” ambayo ni ya kimizungu, wasomaji wanapaswa kufikiria vyanzo vya sherehe hizo wanapoamua ikiwa watazishiriki au la.

Asanteni sana kwa kuonyesha kwamba sherehe ya Halloween inahusisha mambo ya mizungu. Watu huiona kuwa tu sherehe isiyodhuru na inayofurahisha, lakini baadhi ya watu wamepata matatizo makubwa walipoisherekea. Watoto wanaozurura mtaani usiku wanaweza kujiumiza au kupewa peremende mbaya. Msichana mmoja katika mtaa wetu alihitaji kupelekwa hospitalini. Vijana fulani wanaiona sherehe hiyo kuwa nafasi ya kuzurura barabarani na kuharibu nyumba za watu. Mwenye nyumba mmoja aliyepeana peremende kwa nia nzuri alishtakiwa kwa uwongo na mtoto mmoja kwamba alipeana peremende mbaya. Licha ya mambo hayo, bado watu wengi katika mtaa wetu husherehekea Halloween. Ninatumaini majirani wangu wote watasoma makala hii nzuri.

G. H., Marekani

Vitu vya Kuchezea Asanteni kwa sehemu yenye kichwa “Vitu Vingi Mno vya Kuchezea,” katika makala ya “Kuutazama Ulimwengu.” (Oktoba 8, 2001) Binti yangu mwenye umri wa miezi 15 alikuwa na masanduku manne ya vitu vya kuchezea katika chumba chake. Kwa kawaida alitapanya vitu vyote kotekote chumbani, na alishindwa kuamua acheze na kipi. Baba yangu aliponionyesha taarifa hiyo katika Amkeni! niliisoma mara moja na nikapunguza idadi ya vitu vyake vya kuchezea. Sasa binti yangu ana nusu sanduku tu ya vitu vya kuchezea, na anafurahia tena kucheza na vitu vyake.

P. G., Ujerumani

Leif Eriksson Ninataka kuwashukuru kwa makala ya “Je, Leif Eriksson Alivumbua Amerika?” (Septemba 22, 2001) Tunajifunza kumhusu Columbus katika somo letu la historia. Mwalimu wangu alipotuambia kwamba Columbus aligundua Amerika, niliinua mkono wangu na kusema kwamba kulingana na habari fulani niliyosoma huenda Leif Eriksson ndiye aliyeigundua miaka 500 mapema. Nilifanya utafiti zaidi, na kuchapisha nakala za makala nyingine za Amkeni! kumhusu Columbus. Mwalimu wangu alizisoma na alivutiwa na habari zote ambazo nilikuwa nimepata.

M. D., Ujerumani

Usomaji wa Biblia Asanteni kwa makala ya “Vijana Huuliza . . . Ninaweza Kufanyaje Usomaji wa Biblia Ufurahishe Zaidi?” (Agosti 22, 2001) Sikuzote nilifikiri ningechoshwa kusoma Biblia na kwamba singeweza kamwe kumaliza kusoma kitabu hicho kikubwa. Lakini niliposoma makala hiyo na kuanza kusoma Biblia, niligundua kwamba ni jambo la kupendeza sana. Sasa ninasoma Biblia kwa ukawaida.

M. S., Ujerumani