Nilikubali Maoni ya Mungu Kuhusu Damu

Daktari Asimulia

NILIKUWA kwenye ukumbi wa hospitali, nikiwaelezea madaktari matokeo ya uchunguzi wa maiti. Mgonjwa aliyekuwa amekufa alikuwa na kansa. Nami nilisema, “Tunaweza kufikia mkataa kwamba mgonjwa huyo alikufa kwa sababu ya kuharibika kwa chembe nyekundu za damu na figo kushindwa kufanya kazi kwa sababu ya kutiwa damu nyingi mishipani.”

Profesa mmoja alisimama na kufoka kwa hasira, “Unataka kutuambia kwamba tulimtia damu isiyofaa?” Nikamjibu, “La, simaanishi hivyo.” Nikionyesha kwenye kompyuta sehemu ndogo za figo ya mtu huyo, niliongezea hivi, “Tunaweza kuona jinsi chembe nyekundu za damu kwenye figo yake zilivyotengana na hivyo kufanya figo yake ishindwe kufanya kazi kabisa.” * Kukawa kimya sana na mdomo wangu ukakauka kwa wasiwasi. Ingawa nilikuwa daktari kijana, naye alikuwa profesa, sikubadili maoni yangu.

Jambo hilo lilitukia wakati ambapo sikuwa Shahidi wa Yehova. Nilizaliwa mnamo mwaka wa 1943 huko Sendai, jiji lililoko kaskazini mwa Japan. Kwa kuwa baba yangu alikuwa mtaalamu wa magonjwa na akili, nikaamua kusomea tiba. Mnamo mwaka wa 1970, nikiwa katika mwaka wa pili chuoni, nilimwoa msichana anayeitwa Masuko.

 Kuwa Mtaalamu wa Magonjwa

Masuko alifanya kazi ili kututegemeza nilipokuwa chuoni. Nilifurahia sana tiba. Nilistaajabia jinsi mwili wa mwanadamu ulivyoumbwa vizuri! Hata hivyo, sikuamini kuna Muumba. Nilifikiri kwamba utafiti wa kitiba ungenisaidia kuwa na kusudi maishani. Kwa hiyo, baada ya kuwa tabibu, niliamua kuendelea na masomo katika taaluma ya tiba kwa kusomea dalili, chanzo, na athari za magonjwa.

Nilipokuwa nikiwachunguza watu waliokufa kwa sababu ya kansa, nilianza kutilia shaka umuhimu wa kutiwa damu mishipani. Wagonjwa ambao wameugua kansa kwa muda mrefu huenda wakavuja na kupungukiwa damu. Kwa kuwa tiba ya kemikali huzidisha upungufu wa damu, mara nyingi madaktari hupendekeza kutia damu mishipani. Hata hivyo, nilifikiri kwamba kutia damu kungefanya kansa isambae mwilini. Leo inajulikana kwamba kutia damu mishipani hudhoofisha mfumo wa kinga na hivyo kuongezea mgonjwa uwezekano wa kupata kansa tena na kufa. *

Kisa kilichotajwa kwenye utangulizi kilitukia mwaka wa 1975. Profesa huyo alikuwa kiongozi wa upasuaji huo naye alikuwa mtaalamu wa damu. Basi, si ajabu kwamba alikasirika niliposema kwamba mgonjwa huyo alikufa kwa sababu ya kutiwa damu mishipani! Hata hivyo, niliendelea na maelezo yangu, na baada ya muda akatulia.

Hakuna Magonjwa Wala Kifo

Karibu wakati huo, mke wangu alitembelewa na mwanamke mzee, Shahidi wa Yehova. Alitumia jina “Yehova” katika mahubiri yake, na mke wangu akamwuliza maana ya jina hilo. Shahidi huyo akamjibu, “Yehova ni jina la Mungu wa kweli.” Masuko alikuwa amesoma Biblia tangu utotoni, lakini Biblia yake ilikuwa na jina “BWANA” badala ya jina la Mungu. Sasa alijua kwamba Mungu ana jina!

Masuko alianza kujifunza Biblia mara moja na Shahidi huyo mzee. Niliporudi kutoka hospitalini mwendo wa saa saba usiku, mke wangu aliniambia kwa furaha, “Biblia inasema kwamba magonjwa na kifo vitakomeshwa!” Nikamjibu, “Hilo ni jambo zuri sana!” Akaongezea, “Kwa kuwa ulimwengu mpya unakaribia, sitaki upoteze wakati.” Nilifikiri alimaanisha kwamba niache kuwa daktari, hivyo nilikasirika na tulikosana mara nyingi.

Hata hivyo, mke wangu hakukata tamaa. Alisali na kunionyesha maandiko yanayofaa. Maneno ya Mhubiri 2:22, 23 hasa yalinigusa moyo: “Kwa maana mwanadamu hupata nini kwa ajili ya kazi yake yote iliyo ngumu na kwa ajili ya jitihada za moyo wake katika kufanya kazi ngumu chini ya jua? . . . Usiku moyo wake haulali kamwe. Hilo pia ni ubatili mtupu.” Hivyo ndivyo nilivyokuwa nikifanya—kujitoa mhanga katika taaluma ya tiba usiku na mchana bila kuridhika.

Jumapili moja asubuhi, mnamo Julai 1975, mke wangu alipoenda kwenye Jumba la Ufalme la Mashahidi wa Yehova, niliamua kumfuata. Mke wangu alishangaa sana kuniona, na Mashahidi walinikaribisha kwa uchangamfu. Tangu wakati huo, nilihudhuria mikutano kila Jumapili. Baada ya mwezi mmoja hivi, Shahidi mmoja  akaanza kunifundisha Biblia. Mke wangu alibatizwa miezi mitatu baada ya kutembelewa na Mashahidi wa Yehova kwa mara ya kwanza.

Nakubali Maoni ya Mungu Kuhusu Damu

Muda si muda, nilijifunza kwamba Biblia huwaambia Wakristo ‘wajiepushe na damu.’ (Matendo 15:28, 29; Mwanzo 9:4) Kwa kuwa sikuona faida ya kuwatia wagonjwa damu, ilikuwa rahisi kwangu kukubali maoni ya Mungu kuhusu damu. * Niliwaza kwamba, ‘Ikiwa kuna Muumba na hayo ndiyo maoni yake, basi ni lazima yawe kweli.’

Pia nilijifunza kwamba magonjwa na kifo husababishwa na dhambi ya Adamu. (Waroma 5:12) Wakati huo, nilikuwa nafanya utafiti kuhusu ugonjwa wa kukauka kwa mishipa ya damu. Tunapozeeka, mishipa yetu hukauka na kuwa myembamba, na kusababisha magonjwa kama vile, ugonjwa wa moyo, magonjwa ya mishipa ya ubongo, na ugonjwa wa figo. Kwa hiyo, inaeleweka kwamba magonjwa hayo husababishwa na kutokamilika tulikorithi. Baada ya hapo, bidii yangu katika tiba ilianza kufifia. Ni Yehova Mungu peke yake anayeweza kukomesha magonjwa na kifo!

Mnamo Machi 1976, miezi saba baada ya kuanza kujifunza Biblia, niliacha masomo yangu katika chuo kikuu cha hospitali. Nilihofia kwamba singepata kazi ya udaktari tena, lakini niliajiriwa katika hospitali nyingine. Nilibatizwa katika Mei 1976. Niliona kwamba njia bora zaidi ya kutumia maisha yangu ingekuwa kuwa mhubiri wa wakati wote, yaani, painia, hivyo nikaanza kazi hiyo mnamo Julai 1977.

Kutetea Maoni ya Mungu Kuhusu Damu

Mnamo Novemba 1979, mimi na Masuko tulihamia kutaniko lingine katika Wilaya ya Chiba, ambako kulikuwa na uhitaji mkubwa wa wahubiri. Nilifanya kazi ya muda katika hospitali moja huko. Siku yangu ya kwanza kazini, madaktari-wapasuaji walinijia. Wakasisitiza niwajibu swali hili, “Kwa kuwa wewe ni Shahidi wa Yehova, utafanya nini ukiletewa mgonjwa anayehitaji kutiwa damu?”

Kwa heshima, niliwaeleza kwamba nitatii yale ambayo Mungu anasema kuhusu damu. Niliwaeleza kwamba kuna njia nyingine za kuwatibu wagonjwa bila kuwatia damu na kwamba ningejitahidi niwezavyo kuwasaidia. Baada ya kujadiliana nao kwa muda wa saa moja hivi, mpasuaji mkuu alisema, “Ninaelewa. Lakini kukiwa na mgonjwa aliyepungukiwa damu sana, tutamshughulikia.” Mpasuaji huyo alionwa kuwa mtu mgumu, lakini baada ya mazungumzo yetu tukawa marafiki na sikuzote aliheshimu imani yangu.

Maoni Kuhusu Damu Yajaribiwa

Tulipokuwa huko Chiba, ofisi mpya ya Mashahidi wa Yehova nchini Japan ilikuwa ikijengwa huko Ebina. Mimi na mke wangu tulikuwa tukienda huko mara moja kwa juma kutunza afya ya Mashahidi waliojitolea kujenga ofisi hiyo inayoitwa Betheli. Baada ya miezi michache, tulialikwa kutumikia kwa wakati wote katika Betheli ya Ebina. Hivyo, mnamo Machi 1981, tulianza kuishi kwenye makao ya muda yaliyotumiwa na wafanyakazi wa kujitolea zaidi ya 500. Asubuhi, nilisafisha bafu na vyoo, na alasiri nikawatunza wagonjwa.

Mgonjwa mmoja niliyemtunza aliitwa Ilma Iszlaub, ambaye alitoka Australia na kuja Japan mwaka wa 1949 akiwa mishonari. Aliugua lukemia na madaktari walimwambia kwamba angeishi kwa miezi michache tu. Ilma alikataa kurefusha maisha yake kwa kutiwa  damu mishipani, hivyo akaamua kurudi Betheli ili aishi huko mpaka afe. Wakati huo dawa za kufanyiza chembe nyekundu za damu, kama vile erythropoietin, hazikuwapo. Kwa hiyo, wakati mwingine kiwango chake cha himoglobini kilifikia gramu 3 au 4! (Kiwango cha kawaida ni 12 mpaka 15.) Lakini nilifanya yote niwezayo ili kumtibu. Ilma aliendelea kuamini Neno la Mungu kwa dhati mpaka alipokufa mnamo Januari 1988—karibu miaka saba baadaye!

Kwa miaka mingi wafanyakazi kadhaa wa kujitolea katika ofisi ya tawi ya Mashahidi wa Yehova nchini Japan wamehitaji upasuaji. Inapendeza kwamba madaktari katika hospitali za karibu wamewafanyia upasuaji bila kuwatia damu. Mara nyingi, nimealikwa kwenye chumba cha upasuaji kushuhudia utaratibu unaofuatwa, na nyakati nyingine hata nimesaidia kufanya kazi hiyo. Nawashukuru madaktari wanaoheshimu msimamo wa Mashahidi wa Yehova kuhusu damu. Kufanya kazi pamoja nao kumenipatia nafasi nyingi ya kuwaeleza yale ninayoamini. Daktari mmoja alibatizwa hivi majuzi.

Kwa kupendeza, jitihada za madaktari za kuwatibu Mashahidi wa Yehova bila kuwatia damu zimeleta maendeleo ya kitiba. Upasuaji unaofanywa bila damu umeonyesha faida za kuepuka kutiwa damu mishipani. Uchunguzi umeonyesha kwamba wagonjwa hupona haraka na hawawi na matatizo mengi baada ya upasuaji.

Naendelea Kujifunza Kutoka kwa Daktari Mkuu Zaidi

Mimi husoma habari za karibuni zaidi za kitiba. Na bado, ninaendelea kujifunza kutoka kwa Daktari mkuu zaidi, Yehova. Yeye hawaoni watu kijuu-juu tu, bali huwachunguza kila sehemu. (1 Samweli 16:7) Nikiwa daktari, mimi hujaribu kuona mambo yote kumhusu mgonjwa, si ugonjwa wake tu. Hilo hunisaidia kumtibu vizuri zaidi.

Bado ninatumikia Betheli. Ninapata shangwe kubwa kuwasaidia wengine kujifunza kumhusu Yehova na maoni yake kuhusu damu. Ninatumaini kwamba Daktari Mkuu Zaidi, Yehova Mungu, ataondoa magonjwa yote na kifo hivi karibuni.—Simulizi la Yasushi Aizawa.

[Maelezo ya Chini]

[Blabu katika ukurasa wa 14]

“Niliwaeleza kwamba kuna njia nyingine za kuwatibu wagonjwa bila kuwatia damu na kwamba ningejitahidi niwezavyo kuwasaidia”

[Blabu katika ukurasa wa 15]

“Upasuaji unaofanywa bila damu umeonyesha faida za kuepuka kutiwa damu mishipani”

[Picha katika ukurasa wa 15]

Juu: Natoa hotuba ya Biblia

Kulia: Sasa, nikiwa na mke wangu, Masuko