Nilipata Kitu Bora Kuliko Mchezo Nilioupenda

LIMESIMULIWA NA KARL HEINZ SCHWOERER

Nilizaliwa mwaka wa 1952 huko Pittsburgh, Pennsylvania, nchini Marekani, lakini nilikulia huko New Smyrna Beach, Florida. Nikiwa kijana, nilipenda sana kuteleza kwenye mawimbi kwa ubao. Kwa kweli, mchezo huo ulikuja kuwa jambo muhimu sana maishani mwangu.

MNAMO 1970, nilijiunga na Chuo cha Anga cha Embry-Riddle huko Daytona Beach, Florida, nikiwa na lengo la kuwa rubani wa ndege kubwa. Hata hivyo, nilivunjwa moyo sana na serikali, kwa sababu wakati huo ilikuwa ikipigana na Vietnam, vita ambavyo kwa maoni yangu, havikuwa vya haki. Nikiwa nimechukizwa na mfumo mzima wa mambo, niliacha shule na kufuatilia maisha ya kihuni kama vijana wengi wa wakati huo. Niliziachilia nywele zangu ziwe ndefu na kutumia dawa za kulevya.

Muda mfupi baadaye nilikutana na Susan, msichana jasiri aliyekuwa na kipawa kikubwa cha kuchora na kupiga picha. Nilipanga kwamba kwa kufanya maisha yetu yasiwe na mambo mengi, ningeweza kufanya kazi kwenye kampuni ya ujenzi kwa miezi sita hadi nane huko Florida na tungetumia miezi inayobaki kupiga kambi kwenye mahema kwenye fuo za Pwani ya Bahari ya Pasifiki huko Mexico na Amerika ya Kati.

Kutambua Uhitaji wa Kiroho

Kuishi maisha hayo yasiyo na mahangaiko mengi kwenye fuo nzuri za nchi zenye joto, huku Sue akichora na kupiga picha, na mimi nikiteleza kwenye mawimbi, yalikuwa ni maisha yenye kufurahisha sana. Hata hivyo, baada ya miaka kadhaa, tuligundua kwamba maisha yetu hayakuwa yenye kuridhisha. Jambo fulani lilikuwa linakosekana. Hivyo, katikati ya mwaka 1975, tulipokuwa tukiishi kwenye fuo za Pwani ya Bahari ya Pasifiki huko Kosta Rika, nilianza kutafuta nuru ya kiroho. Nilisoma vitabu vya dini za Mashariki na falsafa zilizokuwa zinapendwa sana wakati huo.

Kwa kuwa vitabu nilivyokuwa nikisoma mara nyingi viliinukuu Biblia kuthibitisha ukweli wa mafundisho yake, nilikata maneno kwamba lazima Biblia iwe ndio msingi wa ukweli. Hivyo, mtu mmoja alikubali nimpe uyoga unaoweza kulewesha ili anipe Biblia ya zamani ya King James Version. Kila alasiri, mara baada ya kuteleza kwenye mawimbi asubuhi nzima, nilisoma Biblia. Ingawa nilifurahia sana kusoma Biblia, sikuielewa vizuri.

“Je, Una Maswali Yoyote Yanayohusu Biblia?”

Mnamo Agosti (Mwezi wa 8), 1975, tulipokuwa tukirudi Marekani kutoka Kosta Rika, mimi na Sue, tulipitia kwenye duka la dawa huko El Salvador ili kununua dawa. Ilipokuwa vigumu kuwasiliana na muuza-dawa, mteja mmoja aitwaye Jenny alijitolea kutusaidia. Alikuwa msichana Mmarekani mwenye umri wa miaka 16 aliyezungumza Kihispania kwa ufasaha. Alitueleza kwamba yeye pamoja na wazazi wake ni Mashahidi wa Yehova na wamehamia El Salvador ili kuwafundisha watu Biblia.

Jenny aliniuliza, “Je, una maswali yoyote yanayohusu Biblia?”

 Nikamjibu, “Ndiyo, ninayo!” Licha ya kwamba tulionekana kama wahuni, Jenny alitukaribisha nyumbani kwao ili tukakutane na wazazi wake, Joe na Nancy Trembley. Tulikubali mwaliko wake. Tulitumia muda wote wa mchana tukiuliza maswali yanayohusu Biblia na tulivutiwa sana na jinsi ambavyo Joe na Nancy walijibu maswali yetu. Muda wote walisema, “Fungueni andiko hili kwenye Biblia yenu na msome.”

Muda si mrefu, jioni iliingia na wakatuomba tulale. Hata hivyo hawakuturuhusu mimi na Sue tulale kitanda kimoja, kwani tulikuwa hatujaoana. Usiku huo Sue na Jenny walikesha wakizungumzia mambo mbalimbali kutoka kwenye Biblia, kuanzia Adamu hadi Har–Magedoni.

Biblia ya Rangi ya Kijani

Siku iliyofuata, kabla ya kuondoka mjini humo, Joe na Nancy walitupa magazeti mengi ya Mnara wa Mlinzi na Amkeni!, vitabu, na Biblia. Ilikuwa ni Biblia Takatifu—Tafsiri ya Ulimwengu Mpya, ambayo kwa wakati huo ilikuwa ikichapishwa ikiwa na jalada gumu la rangi ya kijani. Pia Joe alitupeleka tukaone Jumba la Ufalme. Lilikuwa jengo sahili na zuri, mahali ambapo Mashahidi wa Yehova walikutana kujifunza Biblia. Niliwaza, ‘Jinsi lilivyo tofauti na makanisa ya kifahari ya Jumuiya ya Wakristo ambamo watu hujifunza machache sana kuhusu Biblia!’

Baadaye siku hiyo, tulipokuwa tumesimama kwenye kituo cha ukaguzi kabla ya kuvuka mpaka na kuingia Guatemala, Biblia hiyo ya kijani ilizua mabishano kati ya maofisa wa ukaguzi. Walichanganyikiwa kwa sababu walijua kwamba Biblia hiyo kwa kawaida hutumiwa na Mashahidi wa Yehova. Hata hivyo, sisi hatukuonekana kamwe kama Mashahidi wa Yehova. Licha ya mwonekano wetu, maofisa wa ukaguzi walituruhusu tupite baada ya muda mfupi. Jambo hilo lilitushangaza kwani kwa kawaida gari na vitu vyetu hupekuliwa sana ili waone kama kuna dawa za kulevya au vitu vya magendo. Hivyo tukaanza kuiona Biblia hiyo kama hirizi au talasimu.

Kadiri tulivyoendelea kusoma Biblia na vitabu vinavyotegemea Biblia, ndivyo tulivyosadikishwa kwamba tumeupata ukweli kumhusu Mungu. Tulipokuwa tukipita Mexico, nilikuwa nikitazamia kuteleza kwenye mawimbi kwa majuma mawili huko Puerto Escondido, mahali nilipopenda sana kuteleza. Baada ya kufurahia mawimbi hayo, niliazimia kurudi Florida na kuwa mtumishi wa Yehova.

Kila siku asubuhi kwa majuma mawili, niliteleza kwenye mawimbi na alasiri nilisoma Biblia na vitabu vinavyotegemea Biblia nikiwa ufuoni. Msichana mwenye umri wa miaka minane aliiona ile Biblia ya kijani na akasisitiza atupeleke mahali fulani jioni. Hatukuelewa alitaka kutupeleka wapi, lakini tulitambua mahali hapo panahusiana na ile Biblia ya kijani. Tulikataa, lakini aliendelea kutukaribisha. Mwishowe baada ya siku kadhaa tuliamua kuambatana naye. Alitupeleka kwenye Jumba dogo la Ufalme la Mashahidi wa Yehova, lililojengwa kwa mianzi na kuezekwa kwa nyasi. Kila mtu alitusalimia kwa mkono na kutukumbatia kana kwamba tulikuwa marafiki wa muda mrefu.

 Tulivutiwa na heshima ya wote waliohudhuria. Watoto fulani walitukodolea macho wakati wa mkutano, labda kwa sababu hawakuwa wameona watu wenye nywele ndefu kama zetu. Wazazi wao walihitaji kuwakumbusha mara nyingi wakazie mkutano uangalifu. Hata hivyo, Yehova alikuwa amemtumia mtoto mdogo kama wao ili kutusaidia tuhudhurie mkutano kwa mara ya kwanza.

Kuazimia Kumtumikia Yehova

Baada ya majuma mawili ya kuteleza kwenye mawimbi makubwa, niliuza ubao wangu wa kutelezea na tukafunga safari moja kwa moja kurudi Florida. Tukiwa huko tulianza kujifunza Biblia na Mashahidi wa Yehova na kuhudhuria mikutano yote ya kutaniko. Tukiwa tumeazimia kumtumikia Yehova, tulitengana na kukata mawasiliano na marafiki wetu wa zamani. Nilinyoa ndevu na nywele zangu, na Sue akanunua marinda kadhaa. Tulioana baada ya miezi minne, na mnamo Aprili 1976, tulibatizwa tukionyesha wakfu wetu ili tumtumikie Mungu.

Sasa maisha yetu yalikuwa na kusudi. Tukiwa na uthamini mkubwa kwa Yehova kwa baraka alizotupatia, tulikuwa na hamu ya kurudi kwenye nchi inayotumia Kihispania ili kuhubiri habari njema za Ufalme wa Mungu. Lakini wazee Wakristo kwenye kutaniko letu walitushauri: “Ngojeni kwanza. Imarisheni imani yenu kwanza ili mweze kwenda kutumikia vizuri.” Tulikubali ushauri wao, na baada ya muda mfupi lengo letu likawa kuwa mapainia, kama Mashahidi wa Yehova wanavyowaita wahudumu wa wakati wote.

Sue alianza kupainia Januari 1978. Nilitamani kujiunga naye, lakini nilikuwa na deni kubwa la masomo ya chuo kikuu. Nilibuni mbinu ya kuhepa kulipa deni hilo kwa kujitangaza kuwa nimefilisika na kuanza kupainia.

Hata hivyo, kwa hekima, wazee walinishauri nisifanye hivyo, wakinieleza kuwa haingepatana na kanuni za Biblia, ambazo hututaka tuwe ‘wanyoofu katika mambo yote.’ (Waebrania 13:18) Hivyo nikaendelea kufanya kazi ili nilipe madeni yangu. Hatimaye, mnamo Septemba (Mwezi wa 9) 1979, nilifikia lengo langu na kujiunga na Sue katika kazi ya upainia. Kwa kuwa tulifanya maisha yetu kuwa rahisi, nilifanya kazi kwa siku chache kila juma ili kupata riziki.

Kutumikia Kwenye Betheli ya Brooklyn

Mnamo Aprili 1980, baada ya kutumikia pamoja tukiwa mapainia kwa kipindi kisichozidi mwaka mmoja, tulipata mgawo uliotushangaza. Ili kuitikia mwito uliotolewa wa watu waliotaka kujitolea katika ujenzi, sisi tulijaza ombi la kutumikia Betheli ya Brooklyn, New York, ambayo ni makao makuu ya ulimwenguni pote ya Mashahidi wa Yehova. Tuliombwa tuwasili kabla ya siku 30 kwisha! Tulifurahi kupokea mgawo huo lakini pia tulihuzunika kwani tulikuwa tunafurahia sana kupainia. Tukiwa tumechanganyikiwa tufanye nini, tulizungumza na wazee wawili ambao walitusaidia kuona jinsi ambavyo mgawo huo ni pendeleo kubwa. Walitushauri hivi: “Nendeni mkajaribu kutumikia Betheli kwa mwaka mmoja.” Kwa hiyo tuliuza kila kitu tulichokuwa nacho na kuelekea Brooklyn.

Baada ya kutumikia katika ujenzi kwa miaka miwili, niliombwa nitumikie katika Ofisi ya Uhandisi wa Ujenzi, ambako nilizoezwa kazi ya uchoraji wa majengo. Sue alifanya kazi kwenye Idara ya Kujalidi Vitabu kwa mwaka mmoja kisha akaombwa atumikie katika Idara ya Uchoraji-Picha. Kila mwaka wakati wa ukumbusho wa siku yetu ya arusi, tulipitia mambo ya mwaka uliopita ili tuone kama hali zingeturuhusu na ikiwa bado tulikuwa na tamaa ileile ya kuendelea na utumishi wetu wa Betheli.

Kadiri miaka ilivyopita tulipata marafiki wengi wa karibu. Kwa kuwa utumishi wa Betheli ulituruhusu kumtumikia Yehova na ndugu zetu ulimwenguni pote kwa kadiri kubwa hata zaidi, tuliazimia kuendelea na utumishi huo. Mnamo 1989, tulianza kujifunza Kihispania, jambo lililotuwezesha kujiunga na kutaniko la Kihispania huko Brooklyn. Hivyo tukawa na mapendeleo mawili mazuri, kutumikia Betheli na pia katika kutaniko la lugha ya kigeni.

Wakati mmoja Jenny, aliyetajwa awali, alitutembelea Betheli, na lilikuwa jambo la kufurahisha kumsikiliza akisimulia kilichotokea siku ile tulipokutana nchini El Salvador. Anasema alikuwa akiongoza funzo la Biblia na akaanza  kujisikia vibaya. Alipokuwa akirudi nyumbani, aliamua kupitia kwenye duka la dawa ili anunue dawa. Kwa sababu fulani, aliamua asiende kwenye duka la dawa ambalo alizoea kwenda na akaja kwenye duka ambalo sisi tulikuwa.

Kutumikia Katika Nchi Nyingine

Siku moja mnamo 1999 msimamizi wangu wa idara huko Betheli alinishitua aliponiuliza, “Je, ungependa kwenda kwenye ofisi ya tawi ya Australia na kufanya kazi katika Ofisi ya Uhandisi ya Kimkoa kwa miezi mitatu?”

Bila kusitasita nilimjibu, “Ndiyo.” Muda si muda tukaelekea Australia ambako tulitumikia kwa muda wa miaka mitatu. Lilikuwa pendeleo kusaidia katika uchoraji-ramani wa ofisi za tawi za nchi kadhaa za Mashariki na Pasifiki ya Kusini. Tuliporudi Brooklyn mnamo 2003, tulipata mgawo mwingine tusiotazamia. Tulialikwa kwa ajili ya mgawo mwingine katika nchi ya kigeni, kutumikia kwenye Idara ya Ujenzi wa Majumba ya Ufalme ambayo iko chini ya usimamizi wa ofisi ya tawi ya Brazili, umbali fulani kutoka jiji kubwa la São Paulo.

Bado tunaendelea kutumikia hapa. Ofisi hii inasimamia ujenzi wa Majumba ya Ufalme katika nchi nyingi za Amerika ya Kusini. Kazi yangu inatia ndani kusafiri kwenda kusaidia kazi za ujenzi na kuwatia moyo wale wanaofanya kazi katika miradi mbalimbali ya ujenzi, na Sue amekuwa akiambatana nami.

Kuendelea Kushikamana na Azimio Letu

Nakiri kwamba bado ninapenda sana kuteleza kwenye mawimbi, lakini nimepata jambo bora zaidi kuliko kuteleza kwenye mawimbi makubwa. Hivyo nimekuwa na usawaziko ili burudani hiyo isiingilie mambo muhimu. Nikisaidiwa na Sue, nimekazia uangalifu jambo la maana hata zaidi, yaani, kumtumikia Yehova, Mungu wetu mwenye upendo.

Jambo kuu katika maisha yetu sasa ni kutumia uhai na ujuzi tulio nao kuendeleza masilahi ya Ufalme na ibada safi ya Yehova Mungu. Tumejifunza kwamba jambo kuu si mahali tunapomtumikia Yehova, bali ni kumtumikia kwa nafsi yote popote pale.—Wakolosai 3:23.

[Blabu katika ukurasa wa 25]

“Bado ninapenda sana kuteleza kwenye mawimbi, lakini nimepata jambo bora zaidi kuliko kuteleza kwenye mawimbi makubwa”

[Picha katika ukurasa wa 22, 23]

Nikiteleza kwenye mawimbi. Picha hii ilitumiwa kwenye Maonyesho ya Kuteleza Kwenye Mawimbi

[Picha katika ukurasa wa 23]

Nilipokuwa na miaka 13

[Picha katika ukurasa wa 23]

Sikuridhishwa na maisha ya kihuni

[Picha katika ukurasa wa 25]

Juu: Kusaidia ujenzi wa Jumba la Ufalme

Kulia: Nikiwa na Sue leo