Kuutazama Ulimwengu

▪ “Katika karne ya 20, watu milioni 100 walikufa kutokana na tumbaku.” —SHIRIKA LA AFYA ULIMWENGUNI, USWISI.

▪ “Kati ya wagonjwa 9000 hivi waliofanyiwa upasuaji wa moyo huko [Uingereza] kati ya mwaka wa 1996 na 2003, wakilinganishwa na wale ambao hawakutiwa chembe nyekundu za damu, wale waliotiwa walikabili hatari mara tatu zaidi ya kufa mwaka uliofuata na hatari mara sita zaidi ya kufa siku 30 baada ya upasuaji.”—NEW SCIENTIST, UINGEREZA.

Je, Ni Wakati wa Amani?

“Krismasi ni moja kati ya sherehe zetu kuu zaidi,” lakini pia ni “wakati wa migogoro,” linasema Vi Föräldrar gazeti la Kiswedi kwa ajili ya wazazi. Kwa kweli, wakati wa Krismasi, familia “zinabishana na kuvutana kuliko wakati mwingine katika mwaka.” Waandishi wa gazeti hilo waliwauliza wazazi 1,100 walio na watoto wadogo kuhusu mambo yaliyotukia katika kipindi cha sikukuu. Asilimia 88 hivi kati yao walisema kwamba familia zao hugombana kuhusu “mahali na jinsi watakavyosherehekea Krismasi.” Wengi wao hukasirika kwa sababu babu na nyanya wanawapa wajukuu wao peremende na zawadi nyingi zisizohitajiwa.

Furaha Zaidi Katika Kutoa

“Pesa zitakuletea furaha—ukiwapa watu,” kinasema kichwa kimoja katika gazeti The Globe and Mail la Kanada. Ingawa watu wengi waliofanyiwa uchunguzi walifikiri kwamba wakitumia pesa kwa sababu za kibinafsi wangefurahia, wale waliotumia pesa kuwasaidia wengine walipata furaha nyingi zaidi bila kujali walitumia pesa ngapi. “Mali haziwezi kumfanya mtu awe na furaha, ndivyo uchunguzi mmoja baada ya mwingine umeonyesha,” linasema gazeti hilo. “Watu wanapopata pesa za kutosheleza mahitaji yao, hawapati furaha nyingi zaidi wanapopata pesa zaidi.”

Vinapatikana Kwenye Intaneti!

Maofisa wa serikali ya Marekani waliamua kuchunguza ikiwa inawezekana kwa maadui wao “kununua vifaa vya kijeshi” kupitia Intaneti, linasema gazeti New Scientist. “Walishangaa kugundua jinsi ilivyokuwa rahisi kufanya hivyo.” Wakitumia tovuti maarufu za biashara, haikuwa vigumu kwao kununua “silaha zinazobebwa na wanajeshi wa Marekani, mavazi yaliyotumika ya kuzuia athari kutokana na silaha za kinyuklia, kibiolojia, na kemikali,” sehemu za ndege za kivita, na “vifaa vingine hatari.” Haijulikani jinsi wauzaji walivyopata vifaa hivyo, lakini baadhi yao “sasa wanafanyiwa uchunguzi,” linasema gazeti hilo.

Gundi Iliyotumiwa Zamani

Zamani za kale, majani ya fedha yaliyokuwa mapambo kwenye kofia ya ofisa Mroma yaliunganishwa kwa gundi inayonata sana kama gundi ya kisasa. Frank Willer, mhifadhi mkuu katika Jumba la Makumbusho la Rhineland huko Bonn, Ujerumani, aligundua jambo hilo bila kutarajia. Akitumia kifaa fulani, alikuwa akitoa kipande cha chuma kutoka kwenye kofia ya chuma ya karne ya kwanza K.W.K. iliyopatikana kwenye sakafu ya Mto Rhine baada ya angalau miaka 1,500. “Joto kutoka kwenye kifaa hicho lilifanya majani ya fedha yaanguke, na kuacha alama ya gundi,” anaeleza. Uchunguzi ulionyesha kwamba gundi hiyo ilikuwa imetengenezwa kwa kutumia lami, bereu, na mafuta ya ng’ombe.