Vijana Huuliza

Ninaweza Kufikia Miradi Yangu Jinsi Gani?

KATI ya mambo yaliyoorodheshwa hapa chini ni gani ungependa kuwa nayo?

● Kujiamini zaidi

● Marafiki zaidi

● Furaha zaidi

Kwa kweli, unaweza kuwa na yote matatu! Jinsi gani? Kwa kuweka na kufikia miradi. Fikiria kuhusu mambo yafuatayo.

Kujiamini zaidi Unapoweka miradi midogo na kuifikia, utajiamini na hivyo utajiwekea na kufikia miradi mingine mikubwa zaidi. Pia utakuwa na ujasiri unaposhughulika na magumu ya kila siku—kama vile kukabiliana na shinikizo kutoka kwa marafiki. Baada ya muda, watu watatambua kwamba unajiamini na hivyo watakuheshimu. Huenda wengine hawatakusumbua. Badala yake, huenda wakapendezwa na sifa zako.—Linganisha Mathayo 5:14-16.

Marafiki zaidi Watu hufurahia kuwa pamoja na wale ambao hujiwekea miradi—wale ambao wanajua kile wanachotaka maishani na wako tayari kukifanyia kazi. Hivyo, watu wanapovutiwa na wewe kwa sababu ya miradi yako, kwa kawaida wanakuwa kati ya watu watakaokusaidia kufikia miradi hiyo.—Mhubiri 4:9, 10.

Furaha zaidi Ukweli wa mambo ni kwamba mtu hana furaha anapokosa jambo la kufanya au anaposubiri jambo fulani litendeke maishani mwake. Kwa upande ule mwingine, unapoweka miradi na kuifikia, unajihisi ukiwa umeridhika. Si ajabu kwamba mtume Paulo, Mkristo wa karne ya kwanza, alisema: ‘Ninapiga mbio nikiwa na nia ya kushinda.’ (1 Wakorintho 9:26, Biblia Habari Njema) Pia kumbuka, kadiri mradi wako ulivyo mkubwa, ndivyo utakavyofurahi hata zaidi baada ya kuutimiza!

Je, sasa uko tayari kuanza? Kata ukurasa ulio kwenye upande wa kulia, kisha ufuate maagizo yaliyoonyeshwa. *

[Maelezo ya Chini]

 MAMBO YA KUFIKIRIA

● Je, mtu anaweza kuwa na miradi mingi kwa wakati mmoja?—Wafilipi 1:10.

● Je, kujiwekea miradi kunamaanisha kwamba upangie kila dakika maishani mwako?—Wafilipi 4:5.

[Sanduku/Picha katika ukurasa wa 25, 26]

Jinsi ya kufikia miradi yako

ANDIKA Methali 4:25, 26 1

“Usiogope kujiwekea miradi mikubwa. Ikiwa wengine wameifikia, hata wewe unaweza.”—Roben.

1. Fikiria miradi unayoweza kujiwekea. Usichanganue, andika tu mambo mengi kadiri unavyoweza kuwazia. Ona ikiwa unaweza kuandika angalau mambo 10 au 20.

2. Changanua mambo uliyoandika. Ni mambo gani yanayokusisimua zaidi? Ni mambo gani yaliyo magumu kutimiza? Utafurahi zaidi kufikia mradi gani? Kumbuka, mradi bora zaidi ni ule ulio muhimu zaidi kwako.

3. Panga mambo ya kutanguliza. Kwanza chagua miradi midogo unayoweza kufikia kwa muda wa siku chache. Kisha chagua miradi itakayokuchukua muda mrefu kufikia (unayoweza kufikia baada ya majuma au miezi kadhaa). Andika nambari kando ya miradi yako kulingana na jinsi ungependa kuifikia.

Mifano ya Miradi

Urafiki Kuanzisha urafiki na mtu ambaye si wa rika langu. Kuanzisha upya urafiki wa zamani.

Afya Fanya mazoezi kwa jumla ya dakika 90 kila juma. Lala saa nane kila usiku.

Shule Kuwa na alama za juu zaidi katika hesabu. Kudumu nikiwa mwaminifu hata ninaposhinikizwa kuiba mtihani.

Hali ya kiroho Kusoma Biblia kwa dakika 15 kila siku. Kumweleza mwanafunzi mwenzangu kuhusu imani yangu juma hili.

 Mikakati Methali 21:5 2

“Ni vizuri kuweka miradi, lakini unahitaji kujiwekea mikakati ya kuifikia. La sivyo, itaendelea tu kuwa miradi isiyotimizwa.”—Derrick.

Kwa kila mradi ambao umechagua, fanya mambo yafuatayo:

1. Orodhesha mradi wako.

2. Weka wakati wa kufikia mradi huo. Bila kuweka wakati wa kuufikia, mradi huo ni ndoto tu!

3. Panga hatua utakazochukua.

4. Jitayarishe kwa ajili ya magumu. Fikiria jinsi utakavyokabiliana nayo.

5. Azimia. Jiwekee ahadi kwamba utafanya yote uwezayo ili kufikia mradi huo. Sasa tia sahihi na uandike tarehe.

Kujifunza Kihispania kwa ajili ya safari yangu ya kwenda Mexico Julai 1

Hatua

1. Kununua kamusi.

2. Kujifunza maneno kumi kila juma.

3. Kusikiliza watu wengine wanapozungumza Kihispania.

4. Kumwomba mtu mwingine ahakikishe ikiwa sarufi na matamshi yangu yako sawa.

Magumu ninayotazamia

Hakuna mtu anayezungumza Kihispania karibu nami

Jinsi ninavyoweza kuyakabili

Kupakua rekodi za Kihispania kwenye Tovuti ya www.dan124.com.

․․․․․ ․․․․․

Sahihi

Tenda! Yohana 13:17 3

“Ni rahisi sana kukengeushwa na kuisahau miradi yako, kwa hiyo ni vizuri ukaze fikira na ujitahidi kuifikia.”—Erika.

Anza mara moja. Jiulize, ‘Ninaweza kufanya nini leo ili niufikie mradi wangu?’ Ni kweli, huenda ikawa hujapanga vizuri kila hatua ya kufikia mradi wako, lakini usiruhusu hilo likuzuie kuanza mradi wako. Kama vile Biblia inavyosema, ‘ukingoja upepo hutapanda mbegu, ukisubiri mawingu yatoweke, hutavuna kitu.’ (Mhubiri 11:4, BHN) Tafuta jambo la kufanya leo, na ulifanye—hata kama ni jambo dogo.

Pitia miradi yako kila siku. Jikumbushe kwa nini kila mradi ni muhimu sana kwako. Fuatia maendeleo yako kwa kuweka ✔ (au tarehe uliyomaliza) kando ya kila hatua baada ya kuitimiza.

Badilikana na hali. Hata mipango yako iwe mizuri kadiri gani, wakati fulani utahitaji kuirekebisha. Hakuna ubaya kufanya hivyo. Usishikilie kupita kiasi ratiba uliyoweka. Lakini endelea kufanyia kazi mradi wako hadi mwisho.

Uwe mbunifu. Wazia wakati ambapo utakuwa umeufikia mradi wako. Je, unajihisi umeridhika? Sasa, fikiria kuhusu kila hatua uliyochukua. Mwishowe, jiwazie ukitimiza kila hatua, na uwazie jinsi utakavyohisi baada ya kufikia mradi wako. Sasa anza kuufanyia kazi!

[Picha]

Miradi ni kama ramani ya nyumba—lazima ufanye kazi ili kuitimiza!

[Sanduku/Picha katika ukurasa wa 25]

VIJANA WENZAKO WANASEMA NINI?

“Ni rahisi sana kukata tamaa ikiwa huna jambo fulani hususa unalokazia fikira au unalotazamia. Lakini unapojiwekea miradi na kuifikia, unajihisi vizuri.”—Reed.

“Usijichambue kupita kiasi unaposhindwa kufikia mradi wako kikamilifu au kwa wakati uliojiwekea. Kufanya hivyo hakutakusaidia kamwe. Endelea kujitahidi!”—Cori.

“Zungumza na watu ambao tayari wamefikia miradi uliyojiwekea. Wanaweza kukuchochea na kukupa madokezo yatakayokusaidia. Pia zungumza na familia yako kuhusu miradi yako ili wakusaidie kuifikia.”—Julia.

[Mchoro katika ukurasa wa 24]

(Ona mpangilio kamili katika nakala iliyochapishwa)

Kata

Kunja