1, 2. (a) Kwa nini mfano wa wale wanaohubiri katika maeneo ambayo watu hawapendezwi sana na ujumbe wetu hututia moyo? (Tazama picha mwanzoni mwa makala hii.) (b) Yesu alisema nini kuhusu kuhubiri katika “eneo lake la nyumbani”? (Tazama maelezo ya chini.)

SERGIO NA OLINDA ni wenzi wa ndoa mapainia walio na umri wa miaka 80 hivi wanaoishi Marekani. Ingawa hivi karibuni imekuwa vigumu kwao kutembea kwa sababu ya maumivu ya miguu, kila asubuhi wao hutembea hadi kwenye eneo la umma lenye shughuli nyingi lililo mjini kama ambavyo wamekuwa wakifanya kwa miaka mingi. Wao huwasili hapo saa moja kamili asubuhi. Kisha wanaweka vigari vyao vya machapisho karibu na kituo cha basi na kuwapa wapita njia machapisho yetu yanayotegemea Biblia. Watu wengi huwapuuza, lakini wenzi hao huendelea kubaki hapo sikuzote, na kuwaonyesha tabasamu wapita-njia. Ifikapo saa sita mchana, wao hutembea polepole wakirudi nyumbani. Asubuhi inayofuata, saa moja kamili, wao hurudi tena kwenye kituo chao. Kwa kweli, wenzi hao wa ndoa waaminifu huhubiri kwa bidii kila asubuhi, siku sita kwa juma, mwaka baada ya mwaka.

² Kama Sergio na Olinda, ndugu na dada wengi waaminifu duniani  pote wamekuwa wakihubiri kwa miaka mingi katika maeneo ya nyumbani kwao ambayo watu hawapendezwi sana na ujumbe wetu. Ikiwa unakabili hali kama hiyo, tunakupongeza kutoka moyoni kwa uvumilivu wako. * Bidii yako ya kumtumikia Yehova inawachochea wengi, kutia ndani waamini wenzako wenye uzoefu katika huduma. Ona jinsi waangalizi hawa wasafirio wanavyosema: “Ninapohubiri pamoja na ndugu na dada hao waaminifu, mfano wao huniimarisha sana.” “Uaminifu wao hunitia moyo niendelee kuvumilia na kuwa jasiri ninapotimiza huduma yangu.” “Mfano wao huuchangamsha moyo wangu.”

3. Tutachunguza maswali gani matatu, na kwa nini?

³ Ili kuimarisha azimio letu la kukamilisha kazi ya kuhubiri ambayo Yesu alituagiza tufanye, acheni tuchunguze majibu ya maswali haya matatu: Kwa nini huenda tukavunjika moyo nyakati nyingine? Tunaweza kuzaa matunda jinsi gani? Ni nini kitakachotusaidia kuendelea kuzaa matunda kwa uvumilivu?

4. (a) Paulo alihisije Wayahudi wengi walipoukataa ujumbe aliokuwa akihubiri? (b) Kwa nini Paulo alipatwa na hisia hizo?

⁴ Ikiwa umewahi kuvunjika moyo kwa sababu ya kuhubiri katika eneo ambalo watu hawapendezwi sana na ujumbe wetu, huenda ukahisi kama mtume Paulo. Wakati wa huduma yake ya miaka 30 hivi, aliwasaidia watu wengi kuwa wanafunzi wa Kristo. (Mdo. 14:21; 2 Kor. 3:2, 3) Licha ya hilo, hakufanikiwa kuwachochea Wayahudi wengi kuwa waabudu wa kweli. Badala yake, wengi wao walikataa kumsikiliza Paulo, na hata baadhi yao walimtesa. (Mdo. 14:19; 17:1, 4, 5, 13) Matendo hayo ya Wayahudi yalimfanya Paulo ahisije? Alikiri hivi waziwazi: “Ninasema kweli katika Kristo . . . nina huzuni kubwa na maumivu yasiyoisha moyoni mwangu.” (Rom. 9:1-3) Kwa nini Paulo alihisi hivyo? Kwa sababu aliipenda kazi ya kuhubiri kutoka moyoni. Aliwahubiria Wayahudi kwa sababu aliwajali kikweli. Hivyo, Paulo aliumia sana alipoona wakikataa rehema za Mungu.

5. (a) Ni jambo gani ambalo hutuchochea kuwahubiria jirani zetu? (b) Kwa nini haishangazi kwamba nyakati nyingine sisi huvunjika moyo?

⁵ Kama Paulo, sisi pia tunawahubiria watu kwa sababu tunawajali kikweli. (Mt. 22:39; 1 Kor. 11:1) Kwa nini? Kwa sababu tunajua vizuri baraka ambazo wale wanaoamua kumtumikia Yehova watapata. Tunapowafikiria watu katika eneo letu, sisi hujiambia, ‘Laiti tungeweza kuwasaidia watambue mambo wanayokosa!’ Kwa sababu hiyo, sisi huendelea kuwatia moyo wajifunze kweli kumhusu Yehova na kusudi lake kwa wanadamu. Ni kana kwamba tunawaambia watu tunaowahubiria: ‘Tumewaletea zawadi nzuri sana. Tafadhali ipokeeni.’ Hivyo watu wanapokataa kuipokea zawadi hiyo, haishangazi kwamba tunapata ‘maumivu moyoni mwetu.’ Hisia hizo zinaonyesha wazi kwamba tunapenda kazi ya kuhubiri kutoka moyoni, si kwamba hatuna imani. Hivyo, licha ya kwamba pindi fulani sisi huvunjika moyo, tunaendelea kuvumilia. Wengi wetu tunahisi kama Elena, ambaye amekuwa painia kwa zaidi ya miaka 25, aliyesema hivi: “Kazi ya kuhubiri ni ngumu. Hata hivyo, hiyo ndiyo kazi ambayo ninapendelea zaidi kufanya.”

6. Tutachunguza swali gani, na ni nini kitakachotusaidia kujibu swali hilo?

⁶ Kwa nini tunaweza kuwa na uhakika kwamba tunaweza kuwa na matokeo haidhuru tunahubiri wapi? Ili kujibu swali hilo muhimu, acheni tuchunguze mifano miwili ya Yesu ambapo alizungumzia kwa nini ni muhimu ‘kuzaa matunda.’ (Mt. 13:23) Mfano wa kwanza unahusu mzabibu.

7. (a) Ni nani wanaowakilishwa na “mkulima,” “mzabibu,” na “matawi”? (b) Tungependa kupata jibu la swali gani?

 ⁷ Soma Yohana 15:1-5, 8. Ona kwamba Yesu aliwaambia hivi mitume wake: “Baba yangu hutukuzwa kwa jambo hili, kwamba mwendelee kuzaa matunda mengi na kujithibitisha kuwa wanafunzi wangu.” Yesu alisema kwamba Yehova “ndiye mkulima,” akasema yeye mwenyewe “ndiye mzabibu wa kweli,” na wanafunzi wake ni “matawi.” * Hivyo basi, matunda ambayo wafuasi wa Kristo wanapaswa kuzaa ni nini? Katika mfano huo, Yesu hakutaja moja kwa moja matunda hayo ni nini lakini alitaja jambo fulani muhimu linaloweza kutusaidia kujua maana ya matunda hayo.

8. (a) Katika mfano wa Yesu, kwa nini matunda tunayopaswa kuzaa si wanafunzi tunaowasaidia kufikia hatua ya kubatizwa? (b) Ukweli ni nini kuhusu yale ambayo Yehova anataka tutimize?

⁸ Yesu alisema hivi kumhusu Baba yake: “Yeye huliondoa kila tawi ndani yangu lisilozaa matunda.” Kwa maneno mengine, Yehova anatuona kuwa watumishi wake ikiwa tu tunazaa matunda. (Mt. 13:23; 21:43) Hivyo, katika mfano huo, hatuwezi kusema kwamba matunda ambayo kila Mkristo anapaswa kuzaa ni wanafunzi tunaowasaidia kufikia hatua ya kubatizwa. (Mt. 28:19) Hilo lingemaanisha kwamba Mashahidi waaminifu ambao hawajafanikiwa kumsaidia yeyote kufikia hatua ya kubatizwa kwa sababu katika eneo wanalohubiri watu hawapendezwi sana na ujumbe wetu, ni matawi yasiyozaa matunda yanayotajwa katika mfano wa Yesu. Hata hivyo, wazo hilo si sahihi hata kidogo! Kwa nini? Kwa sababu hatuwezi kuwalazimisha watu wawe wanafunzi wa Yesu. Kwa kuwa Yehova ni Mungu mwenye upendo, hawezi kamwe kuwaomba watumishi wake wafanye mambo yanayopita uwezo wao. Sikuzote Yehova hutuomba tufanye mambo tuliyo na uwezo wa kuyatimiza.—Kum. 30:11-14.

9. (a) Tunazaa matunda tunapofanya kazi gani? (b) Tutachunguza mfano gani, na kwa nini?

⁹ Hivyo basi, matunda tunayopaswa kuzaa ni nini? Ni wazi kwamba tunda linalorejelewa ni jambo ambalo kila mmoja wetu ana uwezo wa kutimiza. Ni jambo gani hilo linalowakilishwa na ‘kuzaa matunda’? Ni kazi ya kuhubiri habari njema ya Ufalme wa Mungu. * (Mt. 24:14) Mfano wa Yesu kuhusu mpandaji unatusaidia kuelewa wazi jambo hilo. Acheni tuchunguze mfano huo wa pili.

10. (a) Katika mfano wa pili, mbegu na udongo vinawakilisha nini? (b) Bua la ngano linatokeza nini?

¹⁰ Soma Luka 8:5-8, 11-15. Katika mfano wa mpandaji, mbegu ni “neno la Mungu,” au ujumbe wa Ufalme. Udongo unawakilisha moyo wa mfano wa mtu. Mbegu hiyo iliyoanguka kwenye udongo mzuri, ilitia mizizi, ikachipuka, na kuwa bua. Tuseme mbegu hiyo ilikuwa ya ngano. Kisha, “[ikazaa] matunda mara 100 zaidi.” Lakini bua la ngano hutokeza matunda ya aina gani? Je, linazaa mabua mengine madogo ya ngano? Hapana, bua hilo huzaa mbegu mpya, ambazo huenda mwishowe zikamea na kuwa mabua ya ngano. Katika mfano huo, mbegu moja ilitokeza mbegu mia moja. Jambo hilo linahusianaje na huduma yetu?

11. (a) Mfano wa mpandaji unahusianaje na huduma yetu? (b) Tunatokezaje mbegu mpya za Ufalme?

¹¹ Ili kuelewa jambo hilo fikiria hali hii: tuseme miaka mingi iliyopita Mashahidi fulani au wazazi wetu Wakristo walitufundisha kweli za Ufalme. Walishangilia kuona moyo wetu ukipokea ujumbe wa Ufalme. Kama ambavyo udongo mzuri katika mfano wa Yesu ulivyohifadhi mbegu iliyopandwa, sisi  pia tulikubali ujumbe wa Ufalme na kushikamana nao. Hivyo, kwa njia ya mfano mbegu hiyo ya ujumbe wa Ufalme ilitia mizizi, ikamea na kuwa bua, na baada ya muda ikawa tayari kuzaa matunda. Na kama tu ambavyo bua la ngano hutokeza mbegu mpya na si mabua mapya, sisi pia hutokeza mbegu mpya za Ufalme, si wanafunzi wapya wa Kristo. * Sisi hutokeza mbegu mpya za Ufalme jinsi gani? Kila mara tunapotumia njia mbalimbali kutangaza ujumbe wa Ufalme, ni kana kwamba tunatawanya mbegu mpya zilizotokana na mbegu ile iliyokuwa imepandwa moyoni mwetu. (Luka 6:45; 8:1) Hivyo, mfano huu unatufundisha kwamba maadamu tunaendelea kutangaza ujumbe wa Ufalme, tunaendelea “kuzaa matunda kwa uvumilivu.”

12. (a) Tunajifunza somo gani kutokana na mfano wa Yesu wa mzabibu na wa mpandaji? (b) Somo hilo linakufanya uhisije?

¹² Tunaweza kujifunza nini kutokana na mfano wa Yesu wa mzabibu na wa mpandaji? Mifano hiyo inatusaidia kuelewa kwamba uwezo wetu wa kuzaa matunda hautegemei itikio la watu katika eneo letu. Badala yake, uwezo wetu wa kuzaa matunda unategemea uaminifu wetu. Paulo aliunga mkono maneno hayo aliposema hivi: “Kila mtu atapokea thawabu yake kulingana na kazi yake mwenyewe.” (1 Kor. 3:8) Mtu anapokea thawabu kulingana na kazi yake, si kulingana na matokeo ya kazi yake. Matilda, dada ambaye amekuwa painia kwa miaka 20 anasema hivi: “Ninafurahi sana kujua kwamba Yehova hututhawabisha kwa sababu ya jitihada zetu.”

13, 14. Kulingana na andiko la Waroma 10:1, 2, ni sababu zipi zilizomfanya Paulo aendelee kuwahubiria wale waliokataa ujumbe wa Ufalme?

¹³ Ni nini kitakachotusaidia kuendelea kuzaa matunda kwa uvumilivu? Kama tulivyoona, Paulo alivunjika moyo alipoona Wayahudi wakikataa ujumbe wa Ufalme. Ingawa hivyo, aliendelea kuwahubiria. Isitoshe, ona jinsi barua yake kwa Wakristo huko Roma inavyoeleza hisia zake kuwaelekea Wayahudi hao: “Nia njema ya moyo wangu na dua yangu kwa Mungu kwa ajili yao, kwa kweli, ni kwa ajili ya wokovu wao. Kwa maana ninawatolea ushahidi kwamba wana bidii kwa  ajili ya Mungu, lakini si kulingana na ujuzi sahihi.” (Rom. 10:1, 2) Paulo alitaja sababu zipi zilizomchochea aendelee na huduma yake?

¹⁴ Kwanza, Paulo alitaja sababu iliyomchochea kuendelea kuwahubiria Wayahudi. Alichochewa na “nia njema ya moyo [wake].” Alitamani kutoka moyoni kwamba angalau baadhi ya Wayahudi wapate wokovu. (Rom. 11:13, 14) Pili, Paulo alitaja kwamba alitoa “dua . . . kwa Mungu kwa ajili yao.” Alimsihi Mungu katika sala amsaidie Myahudi mmoja-mmoja kukubali ujumbe wa Ufalme. Tatu, Paulo alisema: “Wana bidii kwa ajili ya Mungu.” Alitambua kwamba watu hao wangeweza kubadilika na kuwa waabudu wa Yehova. Bidii inapoelekezwa katika mambo yanayofaa, inaweza kuwachochea watu wanyoofu kuwa wanafunzi wenye bidii wa Kristo, na Paulo mwenyewe alijua vizuri jambo hilo.

15. Tunaweza kumwigaje Paulo? Toa mifano.

¹⁵ Tunaweza kumwigaje Paulo? Kwanza, tunapaswa kujitahidi kudumisha tamaa ya kutoka moyoni ya kuwatafuta wale wote walio na “mwelekeo unaofaa kwa ajili ya uzima wa milele.” Pili, tunamsihi Yehova katika sala aifungue mioyo ya watu wanyoofu. (Mdo. 13:48; 16:14) Silvana, dada ambaye amekuwa painia kwa miaka 30 hivi, anasema, “Kabla ya kubisha mlango wowote katika eneo letu, mimi husali kwa Yehova anisaidie kuwa na mtazamo unaofaa.” Pia, tunasali kwamba Yehova atumie malaika zake kutuelekeza kwa watu walio na moyo mnyoofu. (Mt. 10:11-13; Ufu. 14:6) Robert, ambaye amekuwa painia kwa zaidi ya miaka 30 anasema hivi: “Inasisimua sana kufanya kazi pamoja na malaika ambao wanajua hali ambazo wenye nyumba wanapitia.” Tatu, tunajitahidi kuwa na maoni yanayofaa kwamba watu wanaweza kubadilika na kuwa waabudu wa Yehova. Carl, mzee wa kutaniko aliyebatizwa zaidi ya miaka 50 iliyopita, anasema hivi: “Mimi hutafuta ishara yoyote hata ikiwa ni ndogo inayoonyesha unyoofu wa mtu huyo, labda tabasamu yake, uso wake mtulivu, au swali la unyoofu analouliza.” Naam, kama Paulo sisi pia tunaweza kuendelea kuzaa matunda kwa uvumilivu.

16, 17. (a) Andiko la Mhubiri 11:6 linatufundisha nini? (b) Toa mfano unaoonyesha jinsi kazi yetu ya kupanda mbegu inavyoweza kubadili maoni ya wale wanaotutazama.

¹⁶ Hata ikionekana kwamba ujumbe wa Ufalme tunaohubiri haupenyi katika mioyo ya watu tunaowahubiria, hatupaswi kufikiri kwamba kazi yetu ya kupanda mbegu za Ufalme ni ya bure. (Soma Mhubiri 11:6.) Ingawa watu wengi hawatusikilizi, wao hututazama. Wao huona jinsi tulivyovalia vizuri, tabia yetu nzuri, na tabasamu zetu changamfu. Baada ya muda, huenda mwenendo wetu ukawafanya baadhi yao waone kwamba maoni waliyokuwa nayo kutuhusu si sahihi. Sergio na Olinda, waliotajwa mwanzoni mwa makala hii, walijionea ukweli wa jambo hilo.

¹⁷ Sergio anaeleza hivi: “Pindi moja tulipokuwa wagonjwa, hatukwenda kwenye kituo chetu cha kuhubiri kwa muda fulani. Tuliporudi, wapita-njia walituuliza, ‘Mlikuwa wapi? Tuliwakosa sana.’” Olinda anasema hivi huku akitabasamu: “Madereva wa mabasi walitupungia mkono na baadhi yao walisema, ‘Asanteni kwa kazi nzuri!’ Hata walituomba magazeti.” Wenzi hao walishangaa sana mwanamume fulani alipokuja na kuwapa shada la maua na kuwashukuru sana kwa kazi yao.

18. Kwa nini umeazimia kuendelea “kuzaa matunda kwa uvumilivu”?

¹⁸ Kwa hakika, maadamu ‘hatupumzishi mikono yetu’ katika kazi ya kupanda mbegu ya Ufalme, tunachangia pakubwa katika kutoa “ushahidi kwa mataifa yote.” (Mt. 24:14) Zaidi ya yote, tunapata shangwe nyingi kwa kujua kwamba tuna kibali cha Yehova, kwa kuwa yeye anawapenda wale wote “[wanaozaa] matunda kwa uvumilivu”!