HABARI KUU | KWA NINI UWE MNYOOFU?
Je, Unyoofu Umepitwa na Wakati?
Hitoshi alikuwa mhasibu katika kampuni ya uwakala wa ajira huko Japani. Alipokuwa akifanya hesabu pamoja na bosi wake, Hitoshi aliambiwa aandike ripoti ya uwongo. Hitoshi alimweleza kwamba dhamiri yake haimruhusu kudanganya. Baada ya muda, Hitoshi alifukuzwa kazi.
Kwa miezi kadhaa, Hitoshi alivunjika moyo kwa sababu ya kukosa ajira. Kwa mfano, katika mahojiano ya kazi fulani, Hitoshi alieleza kwamba hangeweza kudanganya. Yule aliyemhoji akamwambia, “Unastaajabisha sana!” Ingawa watu wa familia na marafiki walimtia moyo awe imara na aendelee kuwa mnyoofu, Hitoshi alianza kuwa na mashaka. Kwa mfano, alisema hivi: “Nilianza kufikiria ikiwa ni jambo linalofaa kuwa mnyoofu kuhusu imani yangu.”
Mambo aliyokabili Hitoshi yanatukumbusha kwamba si kila mtu anapenda unyoofu. Kwa kweli, wengine wanaona unyoofu kuwa kizuizi hasa katika biashara. Mwanamke mmoja huko Afrika Kusini alisema hivi, “Nimezungukwa na watu wasio wanyoofu, na wakati mwingine ni vigumu kuwa mnyoofu.”
Kusema uwongo ni aina moja ya ukosefu wa unyoofu ulioenea sana leo. Miaka kadhaa iliyopita, utafiti uliofanywa na mwanasaikolojia Robert S. Feldmana wa chuo kikuu cha Massachusetts Amherst ulionyesha kwamba asilimia 60 ya watu hudanganya angalau mara moja katika kila mazungumzo ya dakika kumi. Feldman alisema hivi: “Matokeo hayo yalitushangaza sana, hatukutarajia uwongo uwe sehemu ya kawaida katika maisha yetu ya kila siku.” Inashangaza kwamba watu wengi wanachukia kudanganywa ilhali wao wenyewe husema uwongo.
Kwa nini kusema uwongo, kuiba, na aina nyingine za kukosa unyoofu ni mambo ya kawaida leo? Kukosa unyoofu kunawezaje kuiathiri jamii? Zaidi ya yote, tunawezaje kuepuka kunaswa na mazoea ya kukosa unyoofu?
