Wakati Ambapo Chuki Haitakuwapo Tena!
Hata tukiondoa chuki moyoni mwetu, hatuwezi kudhibiti matendo na mitazamo ya watu wengine. Watu wasio na hatia wanaendelea kuathiriwa na chuki. Hivyo, ni nani atakayeondoa kabisa chuki?
Ni Yehova Mungu pekee ndiye atakayeondoa kabisa chuki tunayoona leo. Biblia inaahidi kwamba atafanya hivyo.—Methali 20:22.
MUNGU ATAONDOA VYANZO VYA CHUKI
-
1. SHETANI IBILISI. Shetani, yule malaika aliyeasi, ndiye anayesababisha chuki tunayoona leo. Mungu atamwangamiza Shetani na wale wote wanaotenda kwa chuki.—Zaburi 37:38; Waroma 16:20.
-
2. ULIMWENGU WA SHETANI ULIOJAA CHUKI. Mungu ataondoa uovu wote katika ulimwengu huu, kutia ndani wanasiasa na viongozi wa dini wenye ufisadi ambao wanachochea chuki. Mungu ataondoa mfumo wa kibiashara wenye pupa pamoja na rushwa na unyonyaji.—2 Petro 3:13.
-
3. HALI YA KUTOKAMILIKA. Biblia inasema kwamba wanadamu wote si wakamilifu—wanafikiri, wanahisi, na kutenda mambo mabaya. (Waroma 5:12) Kusitawisha na kuonyesha chuki ni mojawapo ya mambo yanayofunua mwelekeo wetu wa dhambi. Mungu atawasaidia wanadamu kushinda mielekeo yote ya kutokamilika ili chuki yote waliyo nayo iondolewe milele.—Isaya 54:13.
BIBLIA INAAHIDI KUTAKUWA NA ULIMWENGU USIO NA CHUKI
-
1. HAKUNA MTU ATAKAYETENDEWA ISIVYO HAKI. Ulimwengu utatawaliwa na Ufalme wa Mungu, serikali ya mbinguni yenye haki na inayodumu milele. (Danieli 2:44) Hakutakuwa na ubaguzi wa aina yoyote. Mungu ataondoa ukosefu wote wa haki ambao watu wanakabili leo.—Luka 18:7.
-
2. KILA MTU ATAKUWA NA AMANI. Hakuna mtu atakayeteseka kwa sababu ya jeuri au vita. (Zaburi 46:9) Dunia itakuwa mahali salama ambamo watu wanaopenda amani wataishi.—Zaburi 72:7.
-
3. KILA MTU ATAISHI MILELE KATIKA HALI BORA. Kila mtu duniani atampenda kikweli jirani yake. (Mathayo 22:39) Hakuna yeyote atakayekuwa na mikazo hata ile inayosababishwa na mawazo au kumbukumbu mbaya. (Isaya 65:17) Wakati huo, wanadamu wasio na chuki “watafurahia kwelikweli wingi wa amani.”—Zaburi 37:11.
Je, unatamani kuishi katika ulimwengu huo? Hata sasa, watu wengi wanajifunza kuondoa chuki kwa kutumia kanuni za Biblia. (Zaburi 37:8) Mashahidi wa Yehova ulimwenguni pote wamejionea jambo hilo. Ingawa wametoka katika tamaduni na malezi mbalimbali, wanapendana na wana umoja.—Isaya 2:2-4.
Mashahidi wa Yehova watafurahi kukuambia mambo waliyojifunza kuhusu jinsi ya kushughulika na ukosefu wa haki na ubaguzi. Mambo utakayojifunza yatakusaidia kuondoa chuki hatua kwa hatua na kuwa na upendo. Utajifunza jinsi ya kuwatendea watu wote kwa fadhili—hata wale wasio na shukrani au wenye chuki. Hivyo, utakuwa na furaha zaidi na uhusiano mzuri na wengine. Zaidi ya yote, utajifunza mambo unayopaswa kufanya ili uishi wakati ambapo chuki itaondolewa milele chini ya Ufalme wa Mungu.—Zaburi 37:29.
Huenda Ukapenda Pia
MNARA WA MLINZI
Ufalme wa Mungu Utatimiza Nini?
Yesu alijua kwamba Ufalme wa Mungu ndio serikali pekee inayoweza kusuluhisha matatizo duniani. Ufalme huo umefanya mambo gani yanayotupatia tumaini?
MAJIBU YA MASWALI YA BIBLIA
Ninaweza Kupata Wapi Tumaini?
Chanzo kinachotegemeka kinaweza kuboresha maisha yako sasa na kukupa uhakika kwa ajili ya wakati ujao.
HABARI ZAIDI
Je, Kilio cha Haki Kitasikika?
Biblia inaonyesha kwamba haki ya kweli inatoka kwa Mungu, anayeona kwamba uhai wa kila mwanadamu ni wenye thamani.
AMKENI!
Ubaguzi—Suluhisho la Kudumu
Ni mambo gani manne ambayo Ufalme wa Mungu utafanya ili kuondoa ubaguzi?
