Athawabishwa Baada ya Kutafuta kwa Muda Mrefu

“YEHOVA? Yehova ni nani?” Silvia mwenye umri wa miaka minane alikuwa ameliona jina hilo katika Biblia ya Kiarmenia, aliyoonyeshwa na msichana mmoja mdogo, ambayo ilikuwa hazina ya familia. Aliuliza watu kadhaa, lakini hakuna yeyote huko Yerevan, Armenia, ambako aliishi aliyeweza kumwambia Yehova ni nani—wala wazazi wake, wala walimu wake, wala hata viongozi wa kanisa la huko.

Silvia akawa mtu mzima, akamaliza shule, na kupata kazi, lakini bado hakujua Yehova ni nani. Alipokuwa kijana, ilimbidi atoroke Armenia, na baada ya muda fulani akafika Poland ambako aliishi katika chumba kidogo pamoja na wakimbizi wengine. Mmoja wa wale aliokaa nao alikuwa akitembelewa kwa ukawaida. “Ni nani hao ambao hukutembelea?” Silvia akauliza. “Ni Mashahidi wa Yehova, ambao huja kunifundisha Biblia,” akajibiwa.

Silvia alifurahi sana aliposikia jina Yehova. Hatimaye, akaanza kujifunza Yehova ni nani na jinsi alivyo Mungu wa upendo. Hata hivyo, muda si muda, ilimbidi aondoke Poland. Akakimbilia Denmark, ngambo ya Bahari ya Baltiki. Vichapo vya Biblia vilivyochapishwa na Mashahidi wa Yehova vilikuwa kati ya vitu vichache tu alivyobeba. Kwenye ukurasa wa nyuma wa kimojawapo cha vichapo hivyo, Silvia aliona orodha ya anwani za ofisi za tawi za Watch Tower Society. Anwani hizo zikawa mojawapo ya vitu vyake muhimu zaidi—njia ya pekee ya kumfikia Yehova!

Huko Denmark, Silvia alipelekwa kwenye kambi ya wakimbizi, naye mara moja akaanza kuwatafuta Mashahidi wa Yehova. Kutokana na orodha yake ya anwani, alijua ofisi ya tawi ya Watch Tower Society huko Denmark ilikuwa katika mji wa Holbæk. Lakini mji huo ulikuwa wapi? Silvia alihamishwa kwa garimoshi kwenda kambi nyingine, na alipokuwa akienda huko, garimoshi likapitia Holbæk! Kwa mara nyingine, akafurahi sana.

Siku moja yenye jua jangavu, muda mfupi baadaye, Silvia alirudi Holbæk kwa garimoshi na kutembea kutoka kituo cha garimoshi hadi kwenye ofisi ya tawi. Yeye akumbuka: “Nilipoingia kwenye bustani, nikakalia benchi na kuwaza, ‘Hii ni paradiso!’” Alikaribishwa kwa uchangamfu kwenye ofisi hiyo ya tawi na hatimaye akawa na funzo lake mwenyewe la Biblia.

Lakini alihamishwa tena mara kadhaa. Kutoka katika vituo kadhaa vya wakimbizi alikohamishiwa, ilimbidi Silvia awatafute Mashahidi wa Yehova na kuanza tena na tena funzo lake la Biblia. Hata hivyo, baada ya miaka miwili, alikuwa amejifunza vya kutosha kuweza kujiweka wakfu kwa Yehova. Alibatizwa na muda mfupi baadaye akaanza huduma ya wakati wote. Serikali ya Denmark ilimpa hifadhi mwaka wa 1998.

Sasa Silvia ana umri wa miaka 26 naye hufanya kazi kwenye ofisi ya tawi ya Mashahidi wa Yehova ya Denmark, mahali palipomkumbusha Paradiso. “Niseme nini?” sasa yeye huuliza. “Nimemtafuta Yehova tangu nilipokuwa msichana mdogo. Sasa nimempata. Nilitaka sana kumtumikia maisha yangu yote, na sasa nipo hapa Betheli. Natumaini kwamba haya yatakuwa makao yangu kwa miaka mingi!”