Unaweza Kupata Baraka za Ufalme

MTUME Mkristo Paulo alisema kwa ufasaha baadhi ya lugha kuu za siku zake. Alikuwa na elimu inayolingana na elimu ya kisiku hizi ya chuo kikuu. Alikuwa na haki zote ambazo raia wa Roma walikuwa nazo. (Matendo 21:37-40; 22:3, 28) Angaliweza kujipatia utajiri na umashuhuri kwa sababu alikuwa Mroma. Lakini alisema hivi: “Vitu vilivyokuwa mapato ya faida kwangu, hivyo nimeviona kuwa hasara kwa sababu ya Kristo . . . nami naviona kuwa takataka nyingi, ili niweze kupata Kristo.” (Wafilipi 3:7, 8) Kwa nini Paulo alisema hivyo?

Paulo alijulikana kama Sauli wa Tarso hapo awali, mnyanyasaji wa wale “walio[kuwa] wa Ile Njia.” Naye akawa mwamini baada ya kupokea ono la Yesu aliyefufuka na kutukuzwa. (Matendo 9:1-19) Ono hilo ambalo Paulo aliona alipokuwa njiani kwenda Damasko lilimthibitishia kabisa kwamba Yesu alikuwa Mesiya aliyeahidiwa, au Kristo, mtawala wa wakati ujao wa Ufalme ulioahidiwa. Pia, ono hilo lilileta mabadiliko makubwa katika maisha ya Paulo, kama tunavyoweza kuona katika maelezo yake yenye mkazo yaliyonukuliwa mapema. Paulo  alitubu kwa kuwa alikuwa mnyofu na mwenye moyo mweupe.—Wagalatia 1:13-16.

Katika Biblia, kitenzi “-tubu” mara nyingi chatafsiriwa kutokana na neno la Kigiriki ambalo kihalisi lamaanisha “-jua baadaye,” kinyume cha “-jua kimbele.” Kwa hiyo, kutubu kwatia ndani kubadili nia, mtazamo, au kusudi, na kukataa katakata njia za zamani zisizofaa. (Matendo 3:19; Ufunuo 2:5) Paulo hakuchukulia ono lile muhimu alilopokea njiani kuwa tukio la kihisia, wala hata tukio la kipekee la kiroho. Tukio hilo lilimfanya aone kwamba maisha yake ya zamani, pasipo na ujuzi juu ya Kristo, hayakuwa na maana. Pia, alitambua kwamba lazima abadili maisha yake ili anufaike na ujuzi huo mpya juu ya Kristo.—Waroma 2:4; Waefeso 4:24.

Badiliko Lililoleta Baraka

Ujuzi juu ya Mungu ambao Paulo alikuwa nao hapo awali ulitokana na madhehebu ya Mafarisayo, kwa kuwa alikuwa mmoja wao. Itikadi zao zilitia ndani falsafa nyingi na mapokeo mengi ya wanadamu. Jitihada na bidii za Paulo zilikuwa zimepotoka kwa sababu ya ubaguzi wa kidini. Ijapokuwa alifikiri alikuwa akimtumikia Mungu, kwa kweli alikuwa akimpinga.—Wafilipi 3:5, 6.

Baada ya kupata ujuzi sahihi juu ya Kristo na jinsi anavyohusika katika kusudi la Mungu, Paulo aliweza kuona kwamba alihitaji kufanya uamuzi: Je, aendelee kuwa Farisayo na kufurahia cheo na umashuhuri, au abadili maisha yake na kuanza kufanya chochote kile kinachohitajika ili kupata ukubali wa Mungu? Yafurahisha kwamba Paulo alifanya uamuzi mwema, kwa kuwa alisema hivi: “Siaibikii habari njema; kwa kweli, hiyo ni nguvu ya Mungu kwa ajili ya wokovu kwa kila mtu mwenye imani, kwa Myahudi kwanza na pia kwa Mgiriki.” (Waroma 1:16) Paulo akawa mhubiri mwenye bidii wa habari njema juu ya Kristo na Ufalme.

Miaka mingi baadaye, Paulo aliwaambia Wakristo wenzake hivi: “Sijifikirii mwenyewe kuwa nimekwisha kulishika hilo; bali kuna jambo moja juu ya hilo: Nikisahau mambo ya nyuma na kujinyoosha mbele kwenye mambo ya mbele, ninafuatilia sana kuuelekea mradi kwa ajili ya tuzo la mwito wa Mungu wa kwenda juu kwa njia ya Kristo Yesu.” (Wafilipi 3:13, 14) Paulo alinufaika na habari njema kwa kuwa alikuwa tayari kuacha kile kilichokuwa kinamwondoa mbali na Mungu na kufuatia kwa moyo wote miradi iliyopatana na kusudi la Mungu.

Wewe Ungefanya Nini?

Labda umesikia habari njema ya Ufalme hivi majuzi tu. Je, unavutiwa na tumaini la kuishi milele katika paradiso kamilifu? Lapasa kukuvutia, kwa kuwa ni jambo la kawaida kwetu sote kutaka kuishi na kufurahia maisha yenye amani na usalama. Biblia yasema kwamba Mungu ameweka “milele” ndani ya mioyo yetu. (Mhubiri 3:11) Kwa hiyo ni jambo la kawaida kwetu kutamani kuishi milele katika amani na furaha. Na habari njema ya Ufalme huahidi hayo yote yatawezekana.

Hata hivyo, ili ulione tumaini hilo kuwa jambo halisi unahitaji kuchunguza na kujua habari njema kwa kindani. Mtume Paulo alishauri hivi: ‘Jithibitishie mwenyewe mapenzi ya Mungu yaliyo mema na yenye kukubalika na makamilifu.’ (Waroma 12:2) Kwa hiyo, baada ya kupata ujuzi na uelewevu, ni lazima ufanye uamuzi kama Paulo alivyofanya.

Kwa upande mwingine, labda tayari una itikadi fulani kuhusu wakati wako ujao. Kumbuka kwamba Sauli alikuwa na maoni yake mwenyewe juu ya mapenzi ya Mungu kabla hajawa mtume Paulo. Lakini badala ya kutarajia kupata ufunuo wa kimwujiza kutoka kwa Mungu, mbona usichunguze mambo bila kupendelea upande wowote? Jiulize: ‘Je, kwa kweli najua mapenzi ya Mungu kuhusu wanadamu na dunia? Naweza kutoa uthibitisho gani wa itikadi zangu? Je, itikadi zangu zitathibitika kuwa za kweli zikichunguzwa kwa kutumia Neno la Mungu, Biblia?’ Hutapata hasara yoyote ukichunguza itikadi zako kwa njia hiyo. Wapaswa kutaka kufanya hivyo kwa kuwa Biblia yatusihi  hivi: “Hakikisheni mambo yote; shikeni sana lililo bora.” (1 Wathesalonike 5:21) Kwa vyovyote, ukubali wa Mungu ndilo jambo muhimu, sivyo?—Yohana 17:3; 1 Timotheo 2:3, 4.

Huenda viongozi wa kidini wakatuahidi wakati ujao wa milele. Lakini ahadi hiyo itatusaidia kupata baraka za Ufalme wa Mungu ikiwa tu ina msingi katika mafundisho ya Biblia. Yesu alionya kwa nguvu hivi katika Mahubiri yake maarufu ya Mlimani: “Si kila mtu anayeniambia, ‘Bwana, Bwana,’ atakayeingia katika ufalme wa mbingu, bali yule anayefanya mapenzi ya Baba yangu aliye katika mbingu ataingia.”—Mathayo 7:21.

Ona jinsi Yesu anavyokazia kufanya mapenzi ya Baba yake kuwa takwa la kupata baraka za Ufalme wa Mungu. Hilo lamaanisha kwamba kile ambacho huonekana kuwa cha kimungu si lazima kiwe kimekubaliwa na Mungu. Kwa kweli, Yesu aliendelea kusema hivi: “Wengi wataniambia katika siku hiyo, ‘Bwana, Bwana, hatukutoa unabii katika jina lako, na kufukuza roho waovu katika jina lako, na kufanya kazi nyingi zenye nguvu katika jina lako?’ Na bado ndipo hakika nitaungama kwao: Sikuwajua nyinyi kamwe! Ondokeni kwangu, nyinyi wafanyakazi wa uasi-sheria.” (Mathayo 7:22, 23) Kwa wazi, jambo muhimu ni kuhakikisha kwamba tunaelewa kwa usahihi habari njema ya Ufalme na kutenda kwa kupatana na ujuzi huo.—Mathayo 7:24, 25.

Msaada Unapatikana

Mashahidi wa Yehova wamekuwa wakihubiri habari njema za Ufalme wa Mungu kwa zaidi ya miaka 100. Kwa kutumia vitabu na kwa mdomo wanasaidia watu ulimwenguni pote kupata ujuzi sahihi juu ya Ufalme, baraka utakazoleta, na kile ambacho mtu anahitaji kufanya ili kupokea baraka hizo.

Tunakutia moyo ukubali ujumbe ambao Mashahidi wa Yehova wanahubiri. Ukikubali habari njema na kutenda kupatana nayo utaweza kupokea baraka nyingi, si sasa tu lakini pia wakati Ufalme wa Mungu utakapotawala dunia nzima.—1 Timotheo 4:8.

Chukua hatua sasa, kwa kuwa baraka za Ufalme wa Mungu zimekaribia!

[Picha katika ukurasa wa 7]

Kwa kutumia vitabu na kwa mdomo, Mashahidi wa Yehova wanahubiri habari njema za Ufalme wa Mungu