Kilichomvutia

KILA mwaka, Mashahidi wa Yehova hukutanika katika nchi zao kwa ajili ya makusanyiko na mikusanyiko ya Kikristo. Wanafanya hivyo ili wafundishwe na kufurahia ushirika wenye kujenga. Mbali na hayo, mambo mengine pia yanaweza kuvutia wanaohudhuria kwa mara ya kwanza.

Kwa mfano, mnamo Julai 1999, maelfu ya Mashahidi huko Msumbiji waliimarishwa kwenye Mkusanyiko wa Wilaya wa siku tatu wa “Neno la Mungu la Kiunabii.” Kwa wengi, ilikuwa mara ya kwanza kuhudhuria mkusanyiko kama huo. Mbali na kuvutiwa na hotuba zilizotolewa walivutiwa pia na kile walichoona.

Mtu mmoja alisema hivi kwenye Jumba la Kusanyiko la Maputo: “Sijaona jengo zuri kama hili maishani mwangu mwote! Kulikuwa na sabuni na vioo kwenye vyoo, na hata vilikuwa visafi. Kulikuwa na utulivu, hakuna watoto waliopigana na kupiga kelele. Na watu hawakusukumana! Niliwaona vijana wenye furaha wakiongea mambo yanayotia moyo. Nilivutiwa pia kuona jinsi watu walivyovalia nadhifu sana. Mkusanyiko ufuatao nitaleta watoto wangu na kumshawishi mume wangu ahudhurie.”

Naam, sifa za unyofu, uaminifu, na usafi wa Mashahidi wa Yehova huvutia wengine. Kwa nini Mashahidi wa Yehova ni tofauti? Wanajitahidi kufuata yale ambayo wanajifunza katika Biblia. Mbona usihudhurie mojawapo ya mikusanyiko yao itakayofanywa katika nchi yako mwaka huu au mikutano ya kila juma kwenye Jumba la Ufalme ukajionee?

[Picha katika ukurasa wa 32]

ZAMBIA

[Picha katika ukurasa wa 32]

KENYA

[Picha katika ukurasa wa 32]

MSUMBIJI