“Ni Nini Kinachoendelea Nchini Ufaransa?”

“Uhuru, uhuru tunaupenda.” Hayo ni maneno ya wimbo wa taifa la Ufaransa, uitwao “La Marseillaise.” Bila shaka, uhuru unapaswa kuthaminiwa. Hata hivyo, matukio ya hivi majuzi huko Ufaransa yanatia wasiwasi kwamba haki mbalimbali za mwanadamu zinakandamizwa. Ndiyo sababu Ijumaa, Novemba 3, 2000, maelfu ya Mashahidi wa Yehova waligawa nakala milioni 12 za trakti ya pekee yenye kichwa, “Ni Nini Kinachoendelea Nchini Ufaransa? Je, Uhuru Utakandamizwa?”

MASHAHIDI WA YEHOVA nchini Ufaransa wameshambuliwa kwa miaka kadhaa sasa na wanasiasa mbalimbali na vikundi vinavyopinga madhehebu. Hali hiyo imewaletea Mashahidi magumu katika maisha yao, katika makutaniko yao, na nchini kote. Hata hivyo, Juni 23, 2000, mahakama kuu ya utawala ya Ufaransa, iitwayo Conseil d’État, iliunga mkono uamuzi wa kesi zaidi ya 1,100 zilizofanywa na mahakama za chini 31. Mahakama kuu ilithibitisha kwamba ibada ya Mashahidi wa Yehova ni halali kabisa nchini Ufaransa na, kama vile dini nyingine, Mashahidi hawahitaji kulipa kodi kwa Majumba yao ya Ufalme.

Lakini, Wizara ya Fedha nchini Ufaransa yaendelea kupuuza kabisa uamuzi huo, na kuwanyima Mashahidi wa Yehova haki ya kutolipa kodi, ambayo ni haki ya dini zote. Wizara hiyo inatoza kodi ya asilimia 60 ya michango ambayo hutolewa na Mashahidi na marafiki wao wanaoshiriki katika makutaniko 1,500 huko Ufaransa. Kwa sasa, kesi hiyo imo mahakamani.

Lengo la kampeni hiyo ya trakti lilikuwa kufichua hali hiyo na kuonyesha waziwazi jinsi ambavyo kodi hiyo isiyo halali, na vilevile  sheria mbalimbali ambazo zimependekezwa, zinaweza kuhatarisha uhuru wa kidini. *

Siku Ndefu

Baadhi ya Makutaniko yalianza kugawa trakti hiyo nje ya vituo vya garimoshi na viwanda saa nane usiku na baadaye kwenye viwanja vya ndege. Wakazi jijini Paris huanza shughuli saa 12 asubuhi. Watu waliojitolea 6,000 walisimama mahali walipoweza kukutana na watu walioelekea kazini. Mwanamke mmoja kijana alisema: “Mnafanya vyema kutetea uhuru wa kidini. Si Mashahidi wa Yehova pekee wanaohusika.” Zaidi ya Mashahidi 350 walizigawa trakti hizo kwenye vituo vya magarimoshi yanayopita chini ya ardhi na kwenye barabara za jiji la Marseilles. Redio ya taifa ilitangaza kampeni hiyo hata kabla muda wa saa moja haujapita, na kuwaambia wasikilizaji wasishangae iwapo Mashahidi wa Yehova watazungumza nao. Kwenye kituo kikuu katika jiji la Strasbourg, ambalo ni makao ya Mahakama ya Ulaya ya Haki za Kibinadamu, wasafiri walipanga foleni wakisubiri kupata nakala yao. Wakili mmoja alisema kwamba ingawa hashiriki imani yetu, anachunguza kesi yetu kwa makini, kwa kuwa pambano letu ni muhimu na linatetea haki.

Saa mbili asubuhi, licha ya mvua kubwa, Mashahidi 507 walijitahidi kuweka trakti hiyo katika masanduku yote ya posta yaliyo nje ya nyumba za watu katika jiji la Grenoble lililo katika Milima ya Alps. Madereva wa magari na wa magarimoshi walipoona kinachoendelea walisimamisha magari yao ili kuomba trakti. Wasafiri waliowasili jiji la magharibi la Poitiers saa tatu asubuhi tayari walikuwa wamepokea trakti mahali walipopanda garimoshi. Trakti 40,000 zimekwisha gawanywa huko Mulhouse, karibu na mpaka wa Ujerumani.

Kufikia saa nne asubuhi, makutaniko mengi yalikuwa yamegawa zaidi ya nusu ya trakti zao. Watu wengi walizikubali trakti asubuhi hiyo, na kukawa na mazungumzo yenye kupendeza. Mwanamume mmoja kijana, jijini Besançon, lililoko umbali wa kilometa 80 hivi kutoka mpaka wa Uswisi, alieleza kwamba anapendezwa na Biblia na aliuliza ni kwa nini Mungu anaruhusu kuteseka. Shahidi aliyeongea naye alimkaribisha kwenye Jumba la Ufalme lililoko karibu ili waendelee na mazungumzo, ambapo walianza kujifunza mara moja kijitabu Mungu Anataka Tufanye Nini?

Wakati wa mapumziko kwa ajili ya chakula cha mchana Mashahidi wengi walikwenda kuhubiri kwa muda wa saa moja au mbili. Kazi hiyo ya kugawa trakti iliendelea alasiri nzima, na kufikia saa tisa au saa kumi jioni makutaniko mengi yalikuwa yamemaliza kugawa trakti. Watu kadhaa jijini Reims, ambao wamejifunza Biblia pamoja na Mashahidi wa Yehova au walioshirikiana nao mbeleni, walieleza kwamba walitaka kuanza kushirikiana nao tena. Mafunzo ya Biblia matatu yalianzishwa jijini Bordeaux. Na katika jiji hilo pia, Shahidi mmoja aliingia katika duka fulani ili kununua gazeti na aliona trakti kadhaa mezani. Mwenye duka, aliyekuwa Shahidi hapo awali, alikuwa amepokea trakti hiyo na alipoona umuhimu wake alikuwa amefanyiza nakala kadhaa ili azigawe.

Mwanamke mmoja Mprotestanti katika jiji la Normandy la Le Havre alishtuka aliposikia kwe nye redio kwamba michango ya Mashahidi wa Yehova inatozwa kodi. Alikubali trakti kwa hamu na kuwapongeza Mashahidi kwa kupinga jambo hilo lisilo la haki. Saa 1:20 usiku, televisheni ya eneo la Lyons ilitangaza hivi kuhusu ugawanyaji huo: “Leo asubuhi ilikuwa rahisi kuepuka matone ya mvua kuliko kuepuka trakti za Mashahidi wa Yehova.” Mashahidi wawili walihojiwa katika kipindi hicho, nao walieleza sababu za kampeni hiyo.

Mashahidi waliotaka kushiriki kugawa trakti baada ya kazi walizigawia watu wanaorudi nyumbani, na kuweka nyingine katika masanduku ya posta. Watu waliotoka sinema saa tano usiku walikuwa kati ya watu wa mwisho kupokea trakti hiyo katika majiji ya Brest na Limoges—yanayojulikana sana kwa kauri inayotengenezewa hapo. Trakti zilizobaki zilikusanywa na kugawanywa asubuhi iliyofuata.

Matokeo

Shahidi mmoja aliandika: “Maadui wetu wanafikiri kwamba wanatuvunja moyo. Lakini matokeo ni tofauti kabisa.” Katika makutaniko mengi, zaidi ya asilimia 75 ya Mashahidi walishiriki, na baadhi yao walitumia muda wa saa 10, 12, au 14 kufanya kazi hiyo. Baada ya kufanya kazi usiku, Shahidi mmoja katika jiji la kaskazini mwa Ufaransa la Hem, aligawa trakti hiyo kuanzia saa 11:00 alfajiri hadi saa 9:00 alasiri. Mashahidi 75 walitumia muda wa saa 200 kugawa trakti hiyo siku ya Ijumaa huko Denain, ambako kumekuwa na kutaniko tangu mwaka wa 1906. Wengine waliazimia pia kushiriki licha ya uzee, ugonjwa, na hali mbaya ya hewa. Kwa mfano, wazee watatu katika miaka yao ya 80, huko Le Mans, walitumia muda wa saa mbili kutia trakti hizo katika masanduku ya posta, na Shahidi mmoja anayetembea kwa kiti cha magurudumu aligawa trakti hiyo nje ya kituo cha garimoshi. Na jinsi ilivyotia moyo kuona Mashahidi wengi wasiotenda wakishiriki katika kazi hiyo ya pekee!

Bila shaka, ugawanyaji huo ulitoa ushahidi mkubwa. Watu wengi ambao hawapatikani nyumbani Mashahidi wanapowatembelea, walipokea trakti hiyo. Watu kadhaa walihisi kwamba ugawanyaji huo ulitimiza mengi zaidi kuliko kutetea haki za Mashahidi tu. Wengi waliuona kuwa utetezi wa uhuru wa kufuata dhamiri na uhuru wa ibada ya Wafaransa wote. Hiyo ilithibitishwa wakati watu wasio Mashahidi walipoomba nakala za ziada za trakti kwa ajili ya marafiki, wafanyakazi wenzao, au watu wa ukoo.

Ndiyo, Mashahidi wa Yehova nchini Ufaransa wanaonea fahari kutangaza jina la Yehova na kutetea masilahi za Ufalme. (1 Petro 3:15) Wanatumaini kwa moyo mweupe kwamba wataweza “kuendelea kuishi maisha yaliyo shwari na matulivu pamoja na ujitoaji-kimungu kamili na uchukuaji-mambo kwa uzito” na kwamba maelfu watajiunga nao kumtukuza Baba yao wa mbinguni, Yehova.—1 Timotheo 2:2.

[Maelezo ya Chini]