Jitihada Zinazoendeleza Viwango Vizuri vya Maadili

Mwishoni mwa mwaka wa 2001, wale waliokuwa wakisikiliza idhaa ya taifa ya Redio Msumbiji walisikia tangazo lifuatalo:

“Rais wa Jamhuri alitembelea ofisi ya tawi ya Mashahidi wa Yehova huko Maputo. Aliwatia moyo Mashahidi wa Yehova wazidishe jitihada zao za kuendeleza viwango vizuri vya maadili miongoni mwa familia na kuelimisha watu wazima kupitia mpango wao wa kufundisha watu kusoma na kuandika. Tayari watu wapatao 10,000 wamenufaika na mpango huo. Kulingana na Rais Chissano, miradi kama hii inastahili kusifiwa, kwa kuwa inanufaisha jumuiya kwa kusuluhisha matatizo ya elimu ambayo bado yanakabili nchi hii.”

Tangazo hilo lilinukuu maneno haya kutoka kwa hotuba ya rais: “Tunatiwa moyo sana kuona kwamba wengi wanatamani kujifunza kusoma na kuandika. Inaonyesha kwamba raia wa kawaida watatusaidia sana kufunza watu wengi kusoma na kuandika. Kwa hiyo, ningependa kuwatia moyo Mashahidi wa Yehova wazidishe jitihada yao ya kufundisha watu kusoma na kuandika, katika lugha yoyote ile. Jambo muhimu zaidi ni kwamba watu wajue kusoma na kuandika na waweze kuwasiliana kwa urahisi na kushiriki zaidi katika elimu wakati ujao.”

Mashahidi wa Yehova nchini Msumbiji wana programu za kufundisha watu kusoma na kuandika katika sehemu 850 nchini pote ili watu hao waweze kujisomea wenyewe Neno la Mungu. Kwa kuongezea, kila juma wanaongoza mafunzo ya Biblia ya nyumbani yapatayo 50,000 bila malipo. Jitihada zote hizo ni sehemu ya programu ya kufundisha watu Biblia ulimwenguni pote ambayo sasa inafanywa katika nchi 235. (Mathayo 24:14) Wewe pia unaweza kunufaika na programu hiyo. Tafadhali jihisi huru kuwasiliana na Mashahidi wa Yehova katika eneo lenu.