Maswali Kutoka kwa Wasomaji

Je, mipango yoyote inaweza kufanywa iwapo Mkristo mtiwa-mafuta aliye mgonjwa hawezi kuadhimisha Mlo wa Jioni wa Bwana pamoja na kutaniko?

Ndiyo. Mipango inaweza na inapaswa kufanywa kwa kumfikiria Mkristo mtiwa-mafuta aliye mgonjwa ambaye hawezi kuwepo wakati kutaniko linapoadhimisha Ukumbusho wa kifo cha Kristo. Katika hali hiyo, baraza la wazee linaweza kupanga mzee mmoja au mwanamume Mkristo mkomavu ampelekee mwamini huyo mifano ya mkate na divai jioni hiyohiyo kabla ya jua kuchomoza siku inayofuata.

Ikitegemea hali, mzee au ndugu atakayemtembelea anaweza kutoa maelezo mafupi na kusoma maandiko yanayofaa. Anaweza kufuata kielelezo cha Yesu alipoanzisha Mlo wa Jioni wa Bwana. Kwa mfano, anaweza kusoma Mathayo 26:26 kisha ampe mkate usiotiwa chachu baada ya sala. Halafu, ndugu huyo anaweza kusoma Mathayo sura ya 26, mstari wa 27 na 28, kisha ampe divai baada ya kutoa sala nyingine. Maelezo mafupi yanaweza kutolewa kuhusu kinachowakilishwa na mifano hiyo, na sala ya kumalizia inapaswa kutolewa.

Bila shaka, tunapaswa kujitahidi juu chini kuwepo wakati kutaniko linapoadhimisha Mlo wa Jioni wa Bwana. Lakini ni nini kinachoweza kufanywa ikiwa Mkristo mtiwa-mafuta ni mgonjwa sana, amelazwa hospitalini, au kwa sababu fulani hawezi kuhudhuria Ukumbusho baada ya jua kutua Nisani 14? Mkristo huyo aliyetiwa mafuta anaweza kufuata kielelezo katika Sheria ya Musa na afanye Ukumbusho huo siku 30 baadaye.—Hesabu 9:9-14.