Ripoti ya Watangazaji wa Ufalme

Msaada Katika Kudumisha Utakatifu wa Damu

WATUMISHI wa Yehova duniani kote wameonyesha uaminifu kwa Mungu kuhusiana na utakatifu wa damu. (Matendo 15:28, 29) Jamii ya mtumwa mwaminifu na mwenye busara imetoa msaada kwa ndugu Wakristo ulimwenguni pote. (Mathayo 24:45-47) Na tuone matokeo yalikuwaje nchini Ufilipino.

Ofisi ya tawi ya Ufilipino inaripoti: “Mnamo mwaka wa 1990 tulijulishwa kwamba wawakilishi kutoka Betheli ya Brooklyn wangekutana hapa Ufilipino. Ndugu walialikwa kutoka ofisi za tawi kadhaa barani Asia, kutia ndani Korea, Taiwan, na Hong Kong. Kusudi la mkutano huo lilikuwa kusaidia kuanzisha Huduma za Habari za Kihospitali kwenye ofisi zao za tawi na pia kupanga ili kuwe na Halmashauri za Uhusiano na Hospitali. Nchini Ufilipino halmashauri hizo zilianzishwa kwanza katika majiji manne makubwa.” Washiriki wa halmashauri hizo wangejitahidi kutafuta madaktari ambao wangekuwa tayari kushirikiana nasi kuhusiana na msimamo wa Kikristo kuhusu damu. Pia wangewasaidia akina ndugu kunapotokea matatizo kuhusiana na damu.

Remegio aliteuliwa kutumikia kwenye Halmashauri ya Uhusiano na Hospitali huko Baguio. Baada ya muda, madaktari walianza kutambua kazi ya halmashauri hiyo. Remegio anakumbuka pindi moja ambapo madaktari kadhaa waliokuwa wamekutana na washiriki wa Halmashauri ya Uhusiano na Hospitali walitaka kujua jinsi ya kushughulika na Mashahidi walio wagonjwa ambao wanakataa kutiwa damu. Remegio alisema: “Madaktari walianza kuuliza maswali, lakini nikashindwa kujibu maswali yao kwa kuwa yalikuwa ya kitaalamu sana.” Alimwomba Yehova amsaidie ili kutatua tatizo hilo. Remegio aliendelea kusema: “Baada ya kila swali, madaktari wengine waliinua mikono yao na kueleza jinsi walivyoshughulika na hali kama hiyo.” Remegio alifurahia sana msaada huo, hasa kwa kuwa kipindi hicho cha maswali na majibu kiliendelea kwa muda wa saa mbili.

Ndugu 77 sasa wanatumikia katika halmashauri 21 nchini kote. Danilo, Shahidi ambaye ni daktari, anasema: “Madaktari wanajua kwamba wagonjwa wao ambao ni Mashahidi wanasaidiwa na tengenezo linalowajali kwa upendo.” Mwanzoni daktari mmoja alisita kumfanyia upasuaji ndugu fulani bila kutumia damu. Hata hivyo, ndugu huyo alisimama imara. Upasuaji ulifanywa na ukafaulu. Halmashauri ya Huduma za Habari za Kihospitali inaripoti: “Daktari huyo alishangazwa na jinsi ndugu huyo alivyopona haraka. Alisema hivi: ‘Kulingana na matokeo ya upasuaji huu, nitafurahi kumsaidia yeyote wa washiriki wenu anayehitaji kufanyiwa upasuaji kama huo bila kutiwa damu.’”