Wanatumikia Ndugu Zao Wakristo Ulimwenguni Pote

JE, UMEWAHI kusikia majina haya, “wafanyakazi wa kimataifa” na “wafanyakazi wa kujitolea wa kimataifa”? Mashahidi wa Yehova walio na mapendeleo hayo hutumia wakati na ustadi wao kusaidia kujenga majengo yanayotumiwa kuchapisha na kugawanya ujumbe wa Biblia wa Ufalme. Wafanyakazi hao wa kujitolea pia husaidia kujenga Majumba ya Kusanyiko na Majumba ya Ufalme ambayo hutumiwa kama vituo vya kujifunzia Biblia. Kwa sasa, wafanyakazi hao wa kujitolea wanasaidia katika miradi ya ujenzi katika nchi 34, hasa nchi ambazo hazina uwezo mkubwa sana wa kifedha. Wahudumu hao hukabili magumu gani ya kipekee, nao hupata shangwe gani wanapowatumikia ndugu zao Wakristo ulimwenguni pote? Wao huuonaje ‘utumishi huo mtakatifu’? (Ufunuo 7:9, 15) Ili kupata jibu, na tuwasikilize wafanyakazi wa kujitolea waliotumikia huko Mexico.

Wafanyakazi wa kujitolea kutoka nchi nyingine waliwasili Mexico mnamo Mei 1992. Muda mfupi baadaye, wao ndio waliokuwa mstari wa mbele katika upanuzi wa ofisi ya tawi, inayosimamia kazi ya Mashahidi wa Yehova nchini Mexico. Upanuzi huo ulitia ndani majengo mapya 14, pamoja na makazi ya wafanyakazi waliokuwa wakitumikia kwenye ofisi hiyo, chumba cha uchapaji, na jengo la ofisi.

Ili kusaidia katika mradi huo, zaidi ya wafanyakazi wa kujitolea 730 kutoka Kanada, Uingereza, Marekani, na nchi nyinginezo walitumikia bega kwa bega pamoja na mamia ya wafanyakazi wengine wa kujitolea kutoka sehemu zote za Mexico. Isitoshe, zaidi ya Mashahidi 28,000 wa makutaniko 1,600 yaliyo karibu na ofisi ya tawi walisaidia katika kazi ya ujenzi wakati wa miisho-juma. Wote walitumikia kwa moyo wa kujitolea, wakitumia ustadi wao bila kudai malipo. Waliliona kuwa pendeleo kumtumikia Yehova katika njia hiyo. Ujenzi huo ulipokuwa ukiendelea walikumbuka maneno haya ya andiko la Zaburi 127:1 yaliyoandikwa kwa roho: “BWANA asipoijenga nyumba waijengao wafanya kazi bure.”

Magumu Wanayokabili

Wafanyakazi wa kujitolea wa kimataifa hukabili magumu gani wanapotumikia katika nchi za kigeni? Hivi ndivyo wanavyosema. Curtis na Sally, ambao ni mume na mke  kutoka Marekani, wamesaidia katika miradi ya ujenzi huko India, Mexico, Paraguai, Rumania, Senegal, Ujerumani, Urusi, na Zambia. Curtis anasema: “Kwanza, tulikabili ugumu wa kumwacha binti yetu aliyekuwa painia [mhudumu wa wakati wote] na pia kutaniko letu la Minnesota. Mimi na mke wangu tulishirikiana na kutaniko hilo kwa miaka 24 na tulifurahia sana kuwa huko.”

Sally anasema: “Si rahisi hasa kwa mwanamke kuishi katika mazingira mapya, lakini nilijifunza kwamba mtu anaweza kuzoea. Hata nilizoea kuishi mahali penye wadudu wengi!” Anaendelea kusema: “Katika nchi fulani, tuliishi watu kumi katika chumba kimoja ambacho kilikuwa na bafu mbili lakini hakikuwa na mahali pa kupikia. Huko nilijifunza kuwa mwenye subira.”

Jambo jingine gumu linalohitaji jitihada na unyenyekevu ni kujifunza lugha mpya. Sharon, ambaye ametumikia pamoja na mume wake kwenye miradi ya ujenzi katika nchi mbalimbali anasema: “Si rahisi kutumikia katika taifa ambalo hujui lugha yake. Mwanzoni, ni vigumu kuwa na uhusiano wa karibu pamoja na ndugu na dada zako wa kiroho ikiwa huwezi kujieleza kwa urahisi. Jambo hilo linavunja moyo sana. Lakini ndugu tunaokutana nao katika nchi za kigeni wana subira na wanahangaikia sana hali yetu. Hata hivyo, baada ya muda mfupi tunaanza kuwasiliana kwa njia fulani.”

Kushiriki Katika Huduma Huhitaji Ujasiri

Ingawa wafanyakazi hao wa kujitolea wenye kujidhabihu huchangia sana katika kuendeleza kazi ya ujenzi, wao hutambua kwamba jambo muhimu zaidi maishani mwao ni kuhubiri habari njema za Ufalme wa Mungu. Kwa hiyo, wanaunga mkono kikamili kazi ya kuhubiri inayofanywa na makutaniko wanayoshirikiana nayo. Åke na Ing-Mari, mume na mke ambao walisaidia katika miradi ya ujenzi huko Guadeloupe, Malawi, Mexico, na Nigeria, wanasema kwamba ujasiri unahitajiwa ili kuhubiri katika lugha ya nchi ya kigeni.

 Ing-Mari anasema: “Mwanzoni, hatukuzungumza sana kwenye mahubiri, kwa sababu sikuzote tuliandamana na Mashahidi wenyeji, na kwa kuwa tuliona haya, mara nyingi tuliwaacha wazungumze. Hata hivyo, asubuhi moja tuliamua kwenda kuhubiri tukiwa peke yetu ingawa tulikuwa na wasiwasi mwingi sana. Tulikutana na mwanamke mmoja kijana aliyesikiliza ujumbe wangu niliokuwa nimeandika. Nilimsomea andiko na nikampa vichapo fulani. Kisha mwanamke huyo akasema: ‘Tafadhali nijibu swali hili. Nina mtu wa ukoo anayejifunza Biblia na Mashahidi wa Yehova, ninawezaje kujifunza pia?’ Niliduwaa. Kisha nikapiga moyo konde na kumwambia kwamba nitajifunza naye.”

Ing-Mari anaendelea kusema: “Hebu wazia shangwe niliyopata na jinsi nilivyomshukuru Yehova kwa kubariki hatua tuliyochukua na pia tamaa yetu ya kuwaeleza wengine kweli.” Mwanamke huyo alifanya maendeleo na akabatizwa kuwa Shahidi kwenye kusanyiko moja la wilaya huko Mexico City. Åke na Ing-Mari wanasema hivi kwa ufupi kuhusu huduma yao: “Tunathamini sana migawo yetu kwenye miradi mbalimbali ya ujenzi, lakini tunapata shangwe na uradhi mwingi hata zaidi tunapomsaidia mtu ajifunze kweli.”

Roho ya Kujidhabihu

Ni kweli kwamba wafanyakazi wa kujitolea ambao huacha familia na marafiki hujidhabihu ili kutumikia ndugu zao katika nchi za kigeni, hata hivyo wao hupata shangwe isiyo na kifani. Wanapata shangwe gani?

Howard, ambaye ametumikia pamoja na Pamela mke wake huko Angola, Ekuado, El Salvador, Guyana, Kolombia, Mexico, na Puerto Riko anaeleza hivi: “Ni pendeleo kuwajua ndugu na dada wa nchi mbalimbali na kujionea mwenyewe upendo uliopo miongoni mwa ndugu zetu ulimwenguni pote. Mara nyingi tunasoma kuhusu upendo huo, lakini unapoishi na kutumikia pamoja na ndugu wa tamaduni na malezi mbalimbali, unapata kuwathamini hata zaidi.”

Gary, ambaye amesaidia katika miradi ya ujenzi huko Ekuado, Kolombia, Kosta Rika, Mexico, na Zambia, pia anahisi kwamba mpango huo umemnufaisha sana. Anasema: “Mazoezi niliyopata kwa kushirikiana kwa miaka mingi na ndugu wakomavu ambao wanatumikia kwenye ofisi za tawi katika nchi nilizotumwa, yamenisaidia kukabiliana na magumu vizuri zaidi katika migawo yangu. Mazoezi hayo yameimarisha imani yangu kwa sababu yananipa fursa ya kujionea umoja ambao ndugu katika tengenezo la Yehova ulimwenguni pote huonyesha licha ya kwamba wametoka katika lugha, jamii, na tamaduni mbalimbali.”

Sasa ujenzi nchini Mexico umekwisha, na ofisi ya tawi iliyopanuliwa imewekwa wakfu mwaka huu. Kwa kuchochewa na upendo wao kwa Mungu, wafanyakazi wa kimataifa na wafanyakazi wa kujitolea wa kimataifa wamechangia sana upanuzi wa ibada ya kweli huko Mexico na kwingineko. Nia na roho yao ya kujidhabihu ili kuwatumikia ndugu zao Wakristo katika nchi nyingine huthaminiwa na Mashahidi wa Yehova ulimwenguni pote.

[Picha katika ukurasa wa 25]

Ekuado

[Picha katika ukurasa wa 25]

Kolombia

[Picha katika ukurasa wa 25]

Angola

[Picha katika ukurasa wa 26]

Ujenzi wa majengo mapya waanza kwenye ofisi ya tawi ya Mexico

[Picha katika ukurasa wa 26]

Bustani kwenye ofisi ya tawi

[Picha katika ukurasa wa 26]

Chini: Baadhi ya akina ndugu na dada wa Idara ya Ujenzi wakiwa mbele ya majengo mapya

[Picha katika ukurasa wa 27]

Wanaojitolea katika kazi ya ujenzi hufurahia kuunga mkono kazi ya kuhubiri katika makutaniko ya mahali wanapotumwa