Maswali Kutoka kwa Wasomaji

Je, Shetani Ibilisi ana uwezo wa kujua yale ambayo mwanadamu anafikiri?

Ijapokuwa hatuwezi kuwa na uhakika kabisa, inaonekana kwamba wala Shetani wala roho waovu hawana uwezo wa kujua yale ambayo mwanadamu anafikiri.

Fikiria majina yanayotumiwa kumfafanua Shetani. Anaitwa Shetani (Mpingaji), Ibilisi (Mchongezi), Nyoka (linalomaanisha pia Mdanganyifu), Mshawishi, na Mwongo. (Ayubu 1:6; Mathayo 4:3; Yohana 8:44; 2 Wakorintho 11:3; Ufunuo 12:9) Hakuna mojawapo ya majina hayo ya ufafanuzi linalodokeza kwamba Shetani ana uwezo wa kujua yale ambayo mwanadamu anafikiri.

Hata hivyo, tofauti na Shetani, Yehova Mungu anatajwa kuwa “mchunguzaji wa mioyo.” (Mithali 17:3, NW; 1 Samweli 16:7; 1 Mambo ya Nyakati 29:17) Andiko la Waebrania 4:13 linasema: “Hakuna kiumbe kisichokuwa dhahiri machoni pake [Yehova], bali vitu vyote viko uchi na vikiwa vimefunuliwa wazi machoni pake ambaye kwake sisi tuna kutoa hesabu.” Si ajabu kwamba Yehova amempa Mwana wake Yesu uwezo wa kuchunguza mioyo. Yesu aliyefufuliwa alisema hivi: “Mimi ndimi nichunguzaye mafigo na mioyo, nami hakika nitawapa nyinyi mmoja-mmoja kulingana na vitendo vyenu.”—Ufunuo 2:23.

Biblia haisemi kwamba Shetani ana uwezo wa kuchunguza mioyo na akili ya wanadamu. Hilo ni jambo la maana kwa kuwa mtume Paulo anatuhakikishia kwamba Wakristo “si wasio na ujuzi kuhusu mbinu zake [Shetani].” (2 Wakorintho 2:11) Kwa hiyo hatupaswi kuogopa kwamba Shetani ana uwezo mkubwa sana tusioujua.

Hata hivyo, hiyo haimaanishi kwamba Adui wetu hawezi kutambua udhaifu wetu. Kwa miaka mingi Shetani amejifunza tabia za wanadamu. Si lazima awe na uwezo wa kujua yale tunayofikiri ili atambue tabia zetu, achunguze vitumbuizo tunavyopenda, au asikilize mambo tunayozungumza, na kadhalika. Ishara zetu za uso na za mwili zinaweza kudokeza pia yale tunayofikiri au tunayohisi.

Hata hivyo, kwa ujumla Shetani hutumia mbinu zilezile alizotumia katika bustani ya Edeni—uwongo, udanganyifu, au habari zenye kupotosha. (Mwanzo 3:1-5) Ingawa Wakristo hawapaswi kuogopa kwamba Shetani atajua yale wanayofikiri, wana sababu ya kuhangaikia mawazo ambayo Shetani anaweza kujaribu kuingiza akilini mwao. Anataka Wakristo wawe “waliofisidika katika akili na kuporwa ile kweli.” (1 Timotheo 6:5) Si ajabu kwamba ulimwengu wa Shetani una habari na vitumbuizo vingi sana vyenye kupotosha. Ili kupinga shambulizi hilo, lazima Wakristo walinde akili zao kwa kuvaa “kofia ya chuma ya wokovu.” (Waefeso 6:17) Wanafanya hivyo kwa kujaza akili zao kweli za Biblia na kuepuka uvutano mbaya wa ulimwengu wa Shetani.

Shetani ni adui mbaya sana. Lakini hatuhitaji kuwa na woga usiofaa kumhusu Shetani au roho wake waovu. Andiko la Yakobo 4:7 linatuhakikishia hivi: “Mpingeni Ibilisi, naye atawakimbia.” Tukifuata shauri hilo, tutaweza kusema kama Yesu kwamba Shetani hana uwezo juu yetu.—Yohana 14:30.