Alipenda Fadhili

MNAMO Jumamosi, Machi 22, 2003, Milton G. Henschel, aliyekuwa mshiriki wa muda mrefu wa Baraza Linaloongoza la Mashahidi wa Yehova, alimaliza utumishi wake duniani akiwa Mkristo mtiwa-mafuta. Alikuwa na umri wa miaka 82.

Milton Henschel alijiunga na makao makuu ya Mashahidi wa Yehova akiwa kijana naye alitumikia kwa uaminifu kwa zaidi ya miaka 60. Muda si muda alijulikana kuwa mtu mwenye busara aliyependezwa kwa moyo mweupe na kazi ya kuhubiri Ufalme. Katika mwaka wa 1939, akawa mwandishi wa N. H. Knorr, aliyekuwa mwangalizi wa idara ya uchapaji ya Mashahidi wa Yehova huko Brooklyn. Ndugu Knorr alipochukua uongozi miongoni mwa Mashahidi ulimwenguni mwaka wa 1942, alimweka Ndugu Henschel kuwa msaidizi wake. Ndugu Henschel alimwoa Lucille Bennett mwaka wa 1956, na wote wawili walishirikiana katika shangwe na magumu ya maisha.

Ndugu Henschel alifanya kazi kwa ukaribu na Ndugu Knorr mpaka Knorr alipokufa mwaka wa 1977. Mara nyingi Ndugu Henschel alisafiri pamoja na Ndugu Knorr katika nchi zaidi ya 150, wakiwatembelea na kuwatia moyo Mashahidi wa Yehova ulimwenguni, hasa mishonari na wale wanaofanya kazi katika ofisi za tawi. Wakati mwingine safari hizo zilikuwa ngumu na hatari. Alipohudhuria kusanyiko huko Liberia katika mwaka wa 1963, Ndugu Henschel alinyanyaswa sana kwa sababu alikataa kushiriki katika sherehe fulani ya kitaifa. * Kwa ujasiri, Ndugu Henschel alirudi Liberia miezi michache tu baadaye ili kumwona rais wa nchi hiyo na kujaribu kutafuta uhuru zaidi wa ibada kwa ajili ya Mashahidi wa Yehova nchini humo.

Katika kushughulikia matatizo mazito, Ndugu Henschel alikuwa mwenye busara, mwenye kubadilikana, na mwenye usawaziko. Wafanyakazi wenzake walimthamini sana kwa kuwa alikuwa mwenye utaratibu, mwenye kiasi, na mwenye ucheshi. Alikuwa na uwezo mzuri sana wa kukumbuka mambo, naye aliwafurahisha mishonari wengi ulimwenguni kwa kuwa alikumbuka majina yao kwa urahisi. Alikumbuka pia maneno machache ya lugha ya nchi walimokuwa, naye aliyachezea kwa njia ya akili na yenye kuchekesha.

Andiko la Mika 6:8, NW linatukumbusha kwamba Yehova Mungu anataka “tupende fadhili.” Milton Henschel atakumbukwa kwa kielelezo kizuri alichoweka kuhusiana na sifa hiyo. Ingawa alikuwa na madaraka mazito, alikuwa mwenye kufikika, mpole, na mwenye fadhili. Alipenda sana kusema, “Ikiwa huna uhakika kuhusu jinsi ya kushughulikia jambo fulani, kumbuka kwamba jambo linalofaa ni kutenda kwa fadhili.” Ingawa tunahuzunika kwa sababu ya kifo cha ndugu huyu mpendwa, tunafurahi kujua kwamba alivumilia kwa uaminifu mpaka mwisho, naye ana uhakika wa kupata thawabu yake ambayo ni “taji la uhai.”—Ufunuo 2:10.

[Maelezo ya Chini]

[Picha katika ukurasa wa 31]

M. G. Henschel akiwa na N. H. Knorr

[Picha katika ukurasa wa 31]

Akiwa na mke wake, Lucille