“Endeleeni Kukesha”

HAPO zamani, kulikuwa na watunza-malango kwenye malango ya jiji na ya hekalu, na katika pindi fulani, kwenye milango ya nyumba za kibinafsi. Mbali na kuhakikisha kwamba malango yamefungwa usiku, watunza-malango walikuwa pia walinzi. Kazi hiyo ilikuwa muhimu sana kwa kuwa usalama wa jiji ulitegemea onyo walilotoa kuhusu hatari yoyote iliyokuwa inakaribia.

Yesu Kristo alifahamu kazi iliyofanywa na watunza-malango, ambao pia waliitwa watunza-milango. Pindi moja, aliwalinganisha wanafunzi wake na watunza-milango na kuwatia moyo waendelee kukesha kuhusiana na umalizio wa mfumo wa mambo wa Kiyahudi. Alisema: “Endeleeni kutazama, endeleeni kukesha, kwa maana hamjui wakati uliowekwa ni gani. Ni kama mtu anayesafiri kwenda ng’ambo, ambaye aliacha nyumba yake na . . . kumwamuru mtunza-mlango aendelee kukesha. Kwa hiyo endeleeni kukesha, kwa maana hamjui bwana wa nyumba anakuja wakati gani.”—Marko 13:33-35.

Vivyo hivyo, sasa kwa zaidi ya miaka 125, gazeti hili Mnara wa Mlinzi, limetangaza kitia-moyo cha Yesu cha “kuendelea kukesha.” Jinsi gani? Kama ukurasa wa 2 wa gazeti hili unavyosema, “Linaendelea kuyatazama matukio ya ulimwengu kwa kadiri yanavyotimiza unabii wa Biblia. Hufariji jamii zote za watu kwa habari njema za kwamba karibuni Ufalme wa Mungu utaharibu wale wanaoonea wanadamu wenzao na kwamba utaigeuza dunia iwe paradiso.” Mnara wa Mlinzi ndilo gazeti la kidini linalogawanywa kwa wingi zaidi ulimwenguni. Nakala zaidi ya 26,000,000 za gazeti hilo huchapishwa katika lugha 150. Kupitia gazeti hili, Mashahidi wa Yehova, kama watunza-malango wa zamani, wanawahimiza watu kila mahali ‘waendelee kukesha’ kiroho kwa sababu Bwana, Yesu Kristo, anakaribia kurudi na kutekeleza hukumu juu ya mfumo huu wa mambo.—Marko 13:26, 37.