Je, Wewe Ni Mwaminifu Katika Mambo Yote?
Je, Wewe Ni Mwaminifu Katika Mambo Yote?
“Mtu aliye mwaminifu katika lililo dogo zaidi ni mwaminifu katika lililo kubwa pia.”—LUKA 16:10.
1. Ni jambo gani moja linaloonyesha kwamba Yehova ni mwaminifu?
JE, UMEWAHI kutambua kile kinachotukia kwa kivuli cha mti kadiri siku inavyosonga? Ukubwa wa kivuli hicho na upande ambao kinaelekea hubadilika. Mara nyingi jitihada na ahadi za wanadamu hubadilika-badilika kama kivuli. Lakini, Yehova Mungu habadiliki kadiri wakati unavyosonga. Mwanafunzi Yakobo anamtaja kuwa “Baba wa mianga ya mbinguni,” halafu anasema: “Habadiliki, kama kugeuka kwa kivuli.” (Yakobo 1:17) Hata katika mambo madogo zaidi, Yehova anategemeka na habadiliki kamwe. Yeye ni “Mungu wa uaminifu.”—Kumbukumbu la Torati 32:4.
2. (a) Kwa nini tunapaswa kujichunguza ili tuone kama sisi ni waaminifu? (b) Tutazungumzia maswali gani kuhusu uaminifu?
2 Mungu huwaonaje waabudu wake wanaotegemeka? Maoni yake ni sawa na ya Daudi, ambaye alisema hivi kuwahusu: “Macho yangu yako juu ya waaminifu wa dunia, ili wapate kukaa pamoja nami. Yule anayetembea katika njia isiyo na kosa, yeye ndiye atakayenihudumia.” (Zaburi 101:6) Naam, Yehova hupendezwa na uaminifu wa watumishi wake. Mtume Paulo alikuwa na sababu nzuri alipoandika hivi: “Kinachoangaliwa katika wasimamizi-nyumba ni mtu kupatwa akiwa mwaminifu.” (1 Wakorintho 4:2) Kuwa mwaminifu kunahusisha nini? Tunaweza kuonyesha uaminifu katika njia zipi? Kuna baraka gani za ‘kutembea katika njia isiyo na kosa’?
Maana ya Kuwa Mwaminifu
3. Ni nini kinachoonyesha kwamba sisi ni waaminifu?
3 Andiko la Waebrania 3:5 linasema hivi: “Musa akiwa mtumishi alikuwa mwaminifu.” Ni nini kilichomfanya nabii Musa awe mwaminifu? Katika kazi ya kujenga na kusimamisha ile maskani, ‘Musa alifanya kulingana na yote ambayo Yehova alikuwa amemwamuru. Alifanya vivyo hivyo.’ (Kutoka 40:16) Sisi waabudu wa Yehova tunaonyesha uaminifu kwa kumtumikia huku tukiwa watiifu. Bila shaka hilo linamaanisha kuendelea kuwa washikamanifu kwa Yehova tunapokabili majaribu makali. Hata hivyo, uaminifu wetu hauonyeshwi tu tunapokabili majaribu makali. Yesu alisema hivi: “Mtu aliye mwaminifu katika lililo dogo zaidi ni mwaminifu katika lililo kubwa pia, na mtu ambaye si mwaminifu katika lililo dogo zaidi si mwaminifu katika lililo kubwa pia.” (Luka 16:10) Tunapaswa kuwa waaminifu hata katika mambo yanayoonekana kuwa madogo.
4, 5. Uaminifu wetu katika mambo ‘yaliyo madogo zaidi’ unaonyesha nini?
4 Kuonyesha utii kila siku katika mambo ‘yaliyo madogo zaidi’ ni muhimu kwa sababu mbili. Kwanza, kufanya hivyo huonyesha jinsi tunavyohisi kuhusu utawala wa Yehova. Fikiria jaribu la ushikamanifu ambalo wenzi wa kwanza wa ndoa, Adamu na Hawa, walikabili. Jambo walilotakiwa kutimiza halikuwa gumu. Wangeweza kula vyakula vya aina zote katika bustani ya Edeni, lakini hawakupaswa kula matunda ya mti mmoja tu, yaani, “mti wa ujuzi wa mema na mabaya.” (Mwanzo 2:16, 17) Uaminifu wao katika kutii amri hiyo rahisi ungeonyesha kwamba wenzi hao wa kwanza wa kibinadamu waliunga mkono utawala wa Yehova. Tunapotii maagizo ya Yehova kila siku tunaonyesha kwamba tunatetea utawala wake.
5 Pili, mwenendo wetu katika “lililo dogo zaidi” huonyesha jinsi tutakavyotenda katika “lililo kubwa pia,” yaani, tunapopatwa na majaribu makubwa zaidi maishani. Kwa habari hii, fikiria kile kilichowapata Danieli na rafiki zake watatu Waebrania, yaani, Hanania, Mishaeli, na Azaria. Walipelekwa uhamishoni huko Babiloni mwaka wa 617 K.W.K. Vijana hao wanne, ambao yaelekea hawakuwa wamefikisha umri wa miaka 20, walipelekwa katika makao ya Mfalme Nebukadneza. Wakiwa huko ‘waliwekewa posho ya kila siku kutoka katika vyakula vitamu vya mfalme na kutoka katika divai yake ya kunywa, ili kuwalisha miaka mitatu, ndipo mwishowe wasimame mbele ya mfalme.’—Danieli 1:3-5.
6. Danieli na rafiki zake watatu Waebrania walikabili jaribu gani katika makao ya mfalme wa Babiloni?
6 Lakini vijana hao wanne Waebrania walikabili tatizo fulani kuhusiana na vyakula vya mfalme wa Babiloni. Yaelekea vyakula vitamu vya mfalme vilitia ndani vile ambavyo Sheria ya Musa ilikataza. (Kumbukumbu la Torati 14:3-20) Huenda wanyama waliochinjwa hawakuondolewa damu ifaavyo, na ikiwa wangekula nyama ya aina hiyo wangevunja Sheria ya Mungu. (Kumbukumbu la Torati 12:23-25) Labda pia chakula hicho kilikuwa kimetolewa kwa sanamu, kwa kuwa hiyo ilikuwa desturi ya waabudu huko Babiloni kabla ya kula mlo wa ushirika.
7. Utii wa Danieli na rafiki zake watatu ulionyesha nini?
7 Bila shaka, vizuizi vya kutokula vyakula fulani havikuwa muhimu sana kwa watu walioishi katika makao ya mfalme wa Babiloni. Hata hivyo, Danieli na rafiki zake waliazimia mioyoni mwao wasijitie unajisi kwa kula vyakula vilivyokatazwa katika Sheria ya Mungu kwa Waisraeli. Jambo hilo lilihusiana na ushikamanifu na uaminifu wao kwa Mungu. Kwa hiyo, waliomba wale mboga za majani na kunywa maji, na ombi lao likakubaliwa. (Danieli 1:9-14) Huenda watu fulani leo wakaona kwamba tendo hilo la vijana hao wanne halikuwa na maana yoyote. Hata hivyo, utii wao kwa Mungu ulionyesha msimamo wao kuhusu suala la enzi kuu ya Yehova.
8. (a) Waebrania watatu walikabili jaribu gani kali la ushikamanifu? (b) Matokeo ya jaribu hilo yalikuwa nini, na hilo linaonyesha nini?
8 Kuwa waaminifu katika jambo ambalo huenda likaonekana kuwa dogo kuliwatayarisha wale rafiki watatu wa Danieli kushinda jaribu kubwa zaidi. Fungua sura ya 3 ya kitabu cha Biblia cha Danieli, kisha usome jinsi Waebrania hao watatu walivyokabili adhabu ya kifo kwa kukataa kuabudu sanamu ya dhahabu iliyosimamishwa na Mfalme Nebukadneza. Walipopelekwa mbele ya mfalme, walitangaza azimio lao kwa uthabiti, wakisema: “Kama ni hivyo, Mungu ambaye tunamtumikia anaweza kutuokoa. Yeye atatuokoa kutoka katika tanuru inayowaka moto na kutoka mkononi mwako, Ee mfalme. Lakini kama sivyo, ujue hivi, Ee mfalme, kwamba sisi hatuitumikii miungu yako, na sanamu ambayo umeisimamisha hatutaiabudu.” (Danieli 3:17, 18) Je, Yehova aliwaokoa? Walinzi waliowatupa vijana hao katika tanuru inayowaka moto waliangamia, lakini Waebrania hao watatu waaminifu walitoka nje salama salimini, bila kuunguzwa na joto la tanuru! Mazoea yao ya kuwa waaminifu yaliwatayarisha kuwa waaminifu wakati wa jaribu hilo kali. Je, hilo halionyeshi umuhimu wa kuwa waaminifu katika mambo madogo?
Uaminifu Kuhusiana na “Mali Zisizo za Uadilifu”
9. Ni nini muktadha wa maneno ya Yesu kwenye Luka 16:10?
9 Kabla ya kutaja ile kanuni inayosema kwamba mtu aliye mwaminifu katika mambo yanayoonekana kuwa madogo ni mwaminifu katika mambo muhimu pia, Yesu aliwashauri hivi wasikilizaji wake: “Jifanyieni rafiki kupitia mali zisizo za uadilifu, ili, zitakapopunguka wawapokee ninyi katika makao ya milele.” Kisha akataja kuhusu kuwa mwaminifu katika jambo lililo dogo zaidi. Halafu akasema: “Kwa hiyo, ikiwa ninyi hamjajionyesha wenyewe kuwa waaminifu kuhusiana na mali zisizo za uadilifu, ni nani atakayewakabidhi ninyi kilicho cha kweli? . . . Hakuna mtumishi wa nyumbani anayeweza kuwatumikia mabwana wawili; kwa maana, ama atamchukia mmoja na kumpenda mwingine, au atashikamana na mmoja na kumdharau mwingine. Hamwezi kuwa watumwa wa Mungu na wa Mali.”—Luka 16:9-13.
10. Tunawezaje kuonyesha uaminifu tunapotumia “mali zisizo za uadilifu”?
10 Kulingana na muktadha, Yesu aliposema maneno ya Luka 16:10 alikuwa akizungumza kuhusu kutumia “mali zisizo za uadilifu,” yaani, mali zetu za kimwili. Mali hizo zinatajwa kuwa zisizo za uadilifu kwa sababu mali za kimwili, hasa pesa, humilikiwa na wanadamu wenye dhambi. Isitoshe, tamaa ya kupata mali inaweza kuongoza kwenye matendo yasiyo ya uadilifu. Tunaonyesha uaminifu kwa kutumia mali zetu za kimwili kwa hekima. Badala ya kuzitumia kwa ubinafsi, tunataka kuzitumia kuendeleza mambo ya Ufalme na kuwasaidia wenye uhitaji. Tunapokuwa waaminifu kwa njia hiyo, tunafanya urafiki na Yehova Mungu na Yesu Kristo, ambao wanamiliki “makao ya milele.” Watatupokea katika makao hayo kwa kutupa uzima wa milele mbinguni au katika Paradiso duniani.
11. Kwa nini hatupaswi kusita kuwaeleza wenye nyumba kwamba tunakubali michango kwa ajili ya kazi ya ulimwenguni pote inayofanywa na Mashahidi wa Yehova?
11 Pia, fikiria nafasi tunayowaandalia watu tunaowapa Biblia au vichapo vinavyoifafanua Biblia wakati tunapotangaza ujumbe wa Ufalme na kuwaeleza kwamba tunakubali michango kwa ajili ya kazi ya ulimwenguni pote inayofanywa na watu wa Yehova. Tunapofanya hivyo, tunawaandalia nafasi ya kutumia kwa hekima mali zao za kimwili. Ijapokuwa awali maneno ya Luka 16:10 yalihusu jinsi ya kutumia mali za kimwili, kanuni inayopatikana katika andiko hilo inahusu pia sehemu nyingine za maisha.
Unyoofu Ni Muhimu Sana
12, 13. Tunaweza kuonyesha unyoofu kwa njia zipi?
12 Mtume Paulo aliandika hivi: “Tuna uhakika kwamba tuna dhamiri nyoofu, kwa kuwa tunataka kujiendesha kwa unyoofu katika mambo yote.” (Waebrania 13:18) Kwa hakika, “mambo yote” yanatia ndani shughuli zote zinazohusiana na pesa. Sisi hulipa madeni na kodi bila kukawia na kwa unyoofu. Kwa nini? Kwa sababu ya dhamiri yetu na hasa kwa kuwa tunampenda Mungu na tunatii maagizo yake. (Waroma 13:5, 6) Sisi hutendaje tunapopata kitu ambacho si chetu? Tunajitahidi kumrudishia mwenyewe, na tunapomweleza kile kilichotuchochea kukirudisha, hilo hutoa ushahidi mzuri!
13 Kuwa waaminifu na wanyoofu katika mambo yote kunatia ndani kuwa wanyoofu kazini. Tunapokuwa wanyoofu kazini, tunafanya watu wavutiwe na Mungu tunayemwakilisha. ‘Hatuibi’ wakati kwa kuwa wavivu. Badala yake, tunafanya kazi kwa bidii, kama kwa Yehova. (Waefeso 4:28; Wakolosai 3:23) Katika nchi moja huko Ulaya, inakadiriwa kwamba mfanyakazi mmoja kati ya wafanyakazi watatu hudanganya kwamba yeye ni mgonjwa ili apewe likizo. Watumishi wa kweli wa Mungu hawatoi visingizio ili kuepuka kwenda kazini. Nyakati nyingine Mashahidi wa Yehova hupandishwa cheo kwa sababu wakubwa wao hutambua unyoofu wao na jinsi wanavyofanya kazi kwa bidii.—Methali 10:4.
Uaminifu Katika Huduma Yetu ya Kikristo
14, 15. Tunaweza kuonyesha uaminifu katika huduma ya Kikristo kwa njia zipi?
14 Tunaonyeshaje uaminifu katika huduma tuliyopewa? Biblia inasema hivi: “Na tumtolee Mungu dhabihu ya sifa, yaani, tunda la midomo ambayo hulifanyia jina lake tangazo la hadharani.” (Waebrania 13:15) Njia kuu ya kuonyesha uaminifu katika huduma ya shambani ni kuifanya kwa ukawaida. Bila shaka, haifai kuacha mwezi mzima uishe bila kutoa ushahidi juu ya Yehova na kusudi lake. Kuhubiri kwa ukawaida hutusaidia pia kupata matokeo mazuri na kuboresha ustadi wetu.
15 Njia nyingine bora ya kuonyesha uaminifu katika utumishi wa shambani ni kutumia madokezo yanayopatikana katika Mnara wa Mlinzi na Huduma Yetu ya Ufalme. Tunapotayarisha na kutumia madokezo yaliyotolewa au njia nyingine za kuhubiri zinazofaa eneo letu, je, hatupati mafanikio mengi zaidi katika huduma yetu? Tunapompata mtu anayependezwa na ujumbe wa Ufalme, je, sisi humrudia haraka? Namna gani mafunzo ya Biblia ambayo tunaanzisha na watu wanaopendezwa? Je, sisi huwa waaminifu kwa kuyaongoza kwa ukawaida? Kuwa waaminifu katika huduma kunaweza kutusaidia sisi na wale wanaotusikiliza kupata uzima.—1 Timotheo 4:15, 16.
Kuendelea Kujitenga na Ulimwengu
16, 17. Tunaweza kuonyesha kwamba tumejitenga na ulimwengu kwa njia zipi?
16 Yesu aliposali kwa Mungu, alisema hivi kuhusu wafuasi wake: “Nimewapa neno lako, lakini ulimwengu umewachukia, kwa sababu wao si sehemu ya ulimwengu, kama vile ambavyo mimi si sehemu ya ulimwengu. Ninakuomba, si kwamba uwatoe ulimwenguni, bali uwalinde kwa sababu ya yule mwovu. Wao si sehemu ya ulimwengu, kama vile ambavyo mimi si sehemu ya ulimwengu.” (Yohana 17:14-16) Tunaweza kuwa tumeazimia kuendelea kujitenga na ulimwengu kuhusiana na mambo makubwa, kama vile kutounga mkono upande wowote kisiasa, kutoshiriki sikukuu na desturi za kidini, na kutohusika katika matendo yasiyo ya adili. Lakini namna gani kuhusu mambo madogo zaidi? Je, inawezekana kwamba tunaathiriwa na ulimwengu bila kujua? Kwa mfano, tusipokuwa waangalifu inaweza kuwa rahisi kuanza kuvaa kizembe na kwa njia isiyofaa! Kuwa waaminifu kunahusisha kuwa na “kiasi na utimamu wa akili” kuhusiana na mavazi na mapambo yetu. (1 Timotheo 2:9, 10) Naam, “sisi hatutoi sababu yoyote ya kukwaza kwa njia yoyote, ili huduma yetu isilaumiwe; bali katika kila njia tunajipendekeza kuwa wahudumu wa Mungu.”—2 Wakorintho 6:3, 4.
17 Kwa sababu tunataka kumheshimu Yehova, sisi huvalia kwa heshima tunapohudhuria mikutano ya kutaniko. Sisi hufanya hivyo pia tunapokutana kwenye makusanyiko. Tunahitaji kuvaa kwa njia inayofaa na yenye kupendeza. Hilo hutoa ushahidi kwa wengine wanaotutazama. Hata malaika huona tunayofanya, sawa na walivyoona yale ambayo Paulo na Wakristo wenzake walikuwa wakifanya. (1 Wakorintho 4:9) Naam, tunapaswa kuvaa kwa njia inayofaa kila wakati. Huenda wengine wakaona kwamba kuwa waaminifu kuhusiana na mavazi ni jambo dogo, lakini Mungu analiona kuwa muhimu.
Baraka za Kuwa Waaminifu
18, 19. Ni baraka zipi zinazotokana na uaminifu?
18 Wakristo wa kweli wanatajwa kuwa “wasimamizi-nyumba wazuri wa fadhili zisizostahiliwa za Mungu zinazoonyeshwa kwa njia mbalimbali.” Wao ‘hutegemea nguvu ambazo Mungu hutoa.’ (1 Petro 4:10, 11) Isitoshe, tukiwa wasimamizi-nyumba tumekabidhiwa mambo fulani ambayo si mali yetu, yaani, mambo yanayoonyesha fadhili zisizostahiliwa za Mungu, na hayo yanatia ndani huduma yetu. Tunapokuwa wasimamizi-nyumba wazuri, tunategemea nguvu ambazo Mungu hutoa, “nguvu zinazopita zile za kawaida.” (2 Wakorintho 4:7) Tunapata mazoezi mazuri sana ili kutusaidia kukabili majaribu yoyote yanayoweza kutokea wakati ujao!
19 Mtunga-zaburi aliimba hivi: “Enyi washikamanifu wake wote, mpendeni Yehova. Yehova anawalinda waaminifu.” (Zaburi 31:23) Na tuazimie kuwa waaminifu, huku tukiwa na uhakika kamili kwamba Yehova ni “Mwokozi wa watu wa namna zote, hasa wa watu waaminifu.”—1 Timotheo 4:10.
Je, Unakumbuka?
• Kwa nini tunapaswa kuwa ‘waaminifu katika lililo dogo zaidi’?
• Tunawezaje kuwa waaminifu
kuhusiana na unyoofu?
katika huduma?
kwa kuendelea kujitenga na ulimwengu?
[Maswali ya Funzo]
[Picha katika ukurasa wa 26]
Uaminifu katika lililo dogo zaidi, uaminifu katika lililo kubwa pia
[Picha katika ukurasa wa 29]
‘Jiendesheni kwa unyoofu katika mambo yote’
[Picha katika ukurasa wa 29]
Njia moja bora ya kuonyesha uaminifu ni kujitayarisha vizuri kwa ajili ya huduma ya shambani
[Picha katika ukurasa wa 30]
Uwe mwenye kiasi katika mavazi na mapambo