“Msaada Wangu Unatoka Kwa Yehova”

Waseja Ambao Hupata Uradhi Katika Utumishi wa Yehova

MWANAMKE Mkristo kutoka Hispania alisema hivi: “Ingawa hatujafunga ndoa, wengi wetu ni wenye furaha kabisa.” Ni nini kinachomletea mwanamke huyo uradhi? “Tunafurahia kuepuka mahangaiko mengi ili tuweze kumtumikia kikamili zaidi Mungu wetu Yehova.”

Maoni hayo yanapatana na kile ambacho Neno la Mungu linasema kuhusu useja. Mtume Paulo alipozungumzia masuala ya ndoa, alisema maneno haya yaliyopuliziwa na Mungu: “Nawaambia waseja na wajane, ni vema kwao wabaki kama mimi nilivyo.” Paulo alikuwa mseja. Lakini alitoa sababu gani za kupendekeza useja? Alisema kwamba mtu aliyeoa au kuolewa amegawanyika, lakini mtu ambaye hajaoa au hajaolewa “huhangaikia mambo ya Bwana.” (1 Wakorintho 7:8, 32-34) Kumtumikia Yehova ndiyo sababu kuu inayomfanya mseja awe na furaha na aridhike.

Kuwa Mseja Kwa Kusudi Linalofaa

Maneno ya Paulo yanaweza kuwashangaza watu wa jamii ambazo huona ndoa na familia kuwa mambo muhimu sana. Hata hivyo, Yesu Kristo, ambaye hakuoa lakini alikuwa mwenye furaha na uradhi, alitaja kusudi linalowafaa Wakristo waseja. Alisema hivi: “Kuna matowashi ambao wamejifanya wenyewe matowashi kwa sababu ya ufalme wa mbinguni. Yule anayeweza kulipa nafasi na alipe nafasi.”—Mathayo 19:12.

Kupatana na maneno hayo, wengi wameona kwamba useja huwawezesha kumtumikia Mungu bila kukengeushwa fikira. (1 Wakorintho 7:35) Wakristo wengi wanamwabudu Yehova kwa furaha bila kuwa na wenzi wa ndoa, nao hushangilia kuwasaidia wengine. *

Wakristo wengi waseja wanafahamu kwamba si watu waliooa au kuolewa tu walio na furaha, na pia wanatambua kuwa si waseja wote ambao hukosa furaha. Baadhi ya watu waliofunga ndoa na baadhi ya wale walio waseja, hufurahi na hukosa furaha mara kwa mara. Kwa kweli, Biblia inasema kwamba ndoa huleta “dhiki katika mwili.”—1 Wakorintho 7:28.

Mtu Anapolazimika Kuwa Mseja

Watu wengi huwa waseja kwa sababu ya hali wala si kwa kupenda. Wanaweza kutamani uhusiano wa karibu, urafiki, na upendo unaoweza kupatikana katika ndoa. Hata hivyo, huenda hali za uchumi au hali nyinginezo zikawazuia watu fulani kufunga ndoa kwa sasa. Wakristo fulani, wengi wao wakiwa dada wapendwa wakomavu, hawajaolewa kwa sababu wameazimia kufuata shauri la Biblia la kuolewa “katika Bwana tu.” (1 Wakorintho 7:39) Wanatafuta wenzi wa ndoa miongoni tu mwa waabudu wa Yehova waliojiweka wakfu na kubatizwa.

 Mara kwa mara, baadhi ya Wakristo hao huhisi upweke. Mkristo fulani mseja alikubali kwamba yeye huhisi upweke kisha akasema hivi: “Tunajua sheria ya Yehova na hatutaki kumkasirisha kwa njia yoyote. Tunatamani kufunga ndoa, lakini hata walimwengu wajaribu jinsi gani kututafutia wachumba tunaendelea kushikilia azimio letu. Hatutaki kushirikiana hata kidogo na wanaume na wanawake wasioamini.” Wakristo kama hao wanastahili pongezi kwa kufuata ushauri wa Biblia na kwa kudumisha viwango vya juu vya maadili wakiwa na nia ya kumpendeza Yehova licha ya kusononeka.

Yehova Husaidia Sana

Yehova ni mshikamanifu kwa watu walio washikamanifu kwake kuhusiana na mambo kama vile kukataa kuoa au kuolewa na mtu asiyemtumikia Mungu. Kwa kuwa Mfalme Daudi alijionea jambo hilo, yeye angeweza kusema hivi: “Kwa mtu mshikamanifu [Yehova] utatenda kwa ushikamanifu.” (Zaburi 18:25) Mungu anawaahidi hivi wale wanaomtii kwa uaminifu: “Sitakuacha wala kukutupa hata kidogo.” (Waebrania 13:5) Tunaweza kumwiga Yehova kwa kuwapongeza sana Wakristo waseja wenye umri mbalimbali ambao hushika Neno la Mungu kwa uaminifu. Tunaweza pia kumwomba Yehova awape nguvu za kukabili hali ngumu zinazowapata.—Waamuzi 11:30-40.

Wakristo wengi waseja wametambua kwamba kushiriki kwa bidii katika kazi ya kuwafundisha wengine Biblia huwapa kusudi maishani. Kwa mfano, mfikirie Patricia, mwanamke mseja aliye na umri wa miaka 30 na kitu, ambaye ni painia au mhubiri wa wakati wote. Anasema hivi: “Ijapokuwa useja una magumu yake, umeniwezesha kuwa painia wa kawaida. Kwa kuwa mimi ni mseja, ninaweza kubadili ratiba yangu kwa urahisi, nami hupata nafasi zaidi ya kujifunza. Pia, nimezoea kumtegemea Yehova sana, hasa ninapokabili hali ngumu.”

Maoni hayo yanategemea ahadi hii yenye kutia moyo ya Biblia: “Mkabidhi Yehova njia yako, na kumtegemea, naye mwenyewe atatenda.” (Zaburi 37:5) Bila shaka, waabudu wote waaminifu wa Yehova, waliofunga ndoa au waseja, wanaweza kufarijiwa na kuimarishwa na maneno haya yaliyopuliziwa: “Msaada wangu unatoka kwa Yehova.”—Zaburi 121:2.

[Maelezo ya Chini]

[Blabu katika ukurasa wa 9]

“Mwanamume ambaye hajaoa huhangaikia mambo ya Bwana, jinsi anavyoweza kupata kibali cha Bwana.”—1 WAKORINTHO 7:32

[Sanduku katika ukurasa wa 8]

JINSI YA KURIDHIKA UKIWA MSEJA

Yesu, ambaye hakuoa kamwe, alisema hivi: “Chakula changu ni mimi kufanya mapenzi yake aliyenituma na kuimaliza kazi yake.”—Yohana 4:34.

Binti wanne wa Filipo ambao hawakuwa wameolewa “walitoa unabii” kwa bidii.—Matendo 21:8, 9.

Dada waseja Wakristo ambao hutangaza ujumbe wa Ufalme ni sehemu ya ‘jeshi kubwa la wanawake wanaotangaza habari njema.’—Zaburi 68:11.