Usimpe Ibilisi Nafasi

“Msimpe Ibilisi nafasi.”—WAEFESO 4:27.

1. Kwa nini watu wengi hutilia shaka kuwapo kwa Ibilisi?

KWA karne nyingi watu wengi walifikiri kwamba Ibilisi ni kiumbe mwenye pembe na kwato zilizopasuka miguuni, aliyevalia mavazi mekundu na anayetumia uma kuwatupa wanadamu waovu katika moto wa mateso. Biblia haiungi mkono maoni hayo. Hata hivyo, maoni hayo yenye kasoro yamewafanya watu wengi watilie shaka kuwapo kwa Ibilisi au yamewafanya wafikiri kwamba neno Ibilisi humaanisha tu kanuni ya uovu.

2. Ni baadhi ya mambo gani ambayo Maandiko husema kumhusu Ibilisi?

² Biblia inatoa uthibitisho ulio wazi wa kwamba Ibilisi yuko inapomtaja mtu aliyemwona. Yesu Kristo alimwona Ibilisi katika makao ya kiroho huko mbinguni na pia akazungumza naye duniani. (Ayubu 1:6; Mathayo 4:4-11) Ingawa Maandiko hayasemi kuhusu jina la awali la kiumbe huyo wa roho, yanamwita Ibilisi (maana yake “Mchongezi”), kwa sababu amemchongea Mungu. Anaitwa pia Shetani (maana yake “Mpinzani”), kwa kuwa anampinga Yehova. Shetani Ibilisi anaitwa “yule nyoka wa zamani,” yaelekea kwa sababu alimtumia nyoka ili kumdanganya Hawa. (Ufunuo 12:9; 1 Timotheo 2:14) Pia, anajulikana kuwa “yule mwovu.”—Mathayo 6:13. *

3. Tutachunguza swali gani?

³ Tukiwa watumishi wa Yehova, hatutaki kwa vyovyote kumwiga Shetani, adui mkuu wa Mungu wa pekee wa kweli. Kwa hiyo, tunapaswa kutii shauri hili la mtume Paulo: “Msimpe Ibilisi nafasi.” (Waefeso 4:27) Ni baadhi ya sifa gani mbaya za Shetani ambazo hatupaswi kuiga?

Usimwige Mchongezi Mkuu

4. “Yule mwovu” alimchongeaje Mungu?

⁴ “Yule mwovu” anastahili kuitwa Ibilisi kwa kuwa yeye ni mchongezi. Uchongezi ni kusema uwongo kumhusu mtu mwingine ili kumdhuru au kumharibia jina. Mungu alimwagiza Adamu hivi: “Kuhusu matunda ya mti wa ujuzi wa mema na mabaya usile, kwa maana siku utakapokula, utakufa hakika.” (Mwanzo 2:17) Hawa alikuwa amejulishwa kuhusu agizo hilo, lakini Ibilisi alimwambia hivi kupitia nyoka: “Hakika hamtakufa. Kwa maana Mungu anajua kwamba siku ileile mtakapokula matunda yake macho yenu yatafunguliwa, nanyi mtakuwa kama Mungu, mkijua mema na mabaya.” (Mwanzo 3:4, 5) Huo ulikuwa uchongezi mbaya dhidi ya Yehova Mungu!

5. Kwa nini Diotrefe alistahili kutozwa hesabu kwa sababu ya uchongezi wake?

⁵ Waisraeli waliagizwa hivi: “Usizunguke katikati ya watu wako ili kuchongea.” (Mambo ya Walawi 19:16) Mtume Yohana alisema hivi kuhusu mchongezi fulani katika siku zake: “Niliandikia kutaniko jambo fulani, lakini Diotrefe, anayependa kuwa na mahali pa kwanza katikati yao, hapokei kwa heshima jambo lolote kutoka kwetu. Hiyo ndiyo sababu, nikija, nitakumbusha matendo yake ambayo anaendelea  kufanya, akipiga porojo juu yetu kwa maneno maovu.” (3 Yohana 9, 10) Diotrefe alikuwa akimchongea Yohana na kwa sababu hiyo alistahili kutozwa hesabu. Hakuna Mkristo mshikamanifu ambaye angetaka kuwa kama Diotrefe na hivyo kumwiga Shetani ambaye ndiye mchongezi mkuu.

6, 7. Kwa nini tunapaswa kuepuka kumchongea mtu mwingine?

⁶ Mara nyingi maneno ya uchongezi na shutuma kali za uwongo hutolewa dhidi ya watumishi wa Yehova. ‘Wakuu wa makuhani na waandishi waliendelea kusimama na kumshtaki Yesu kwa ukali.’ (Luka 23:10) Kuhani Mkuu Anania pamoja na wengine walimshtaki Paulo kwa uwongo. (Matendo 24:1-8) Biblia inamtaja Shetani kuwa “mshtaki wa ndugu zetu . . . , anayewashtaki mchana na usiku mbele za Mungu wetu.” (Ufunuo 12:10) Ndugu hao wanaoshtakiwa kwa uwongo ni Wakristo watiwa-mafuta ambao wako duniani katika siku hizi za mwisho.

⁷ Mkristo hapaswi kumchongea mtu yeyote au kutoa shutuma za uwongo. Hata hivyo, jambo hilo linaweza kutokea ikiwa tutatoa ushahidi dhidi ya mtu mwingine bila kuwa na habari zote. Chini ya Sheria ya Musa, mshtaki angeuawa ikiwa angetoa kimakusudi ushahidi wa uwongo. (Kutoka 20:16; Kumbukumbu la Torati 19:15-19) Isitoshe, kuwa “shahidi wa uwongo anayesema uwongo” ni kati ya mambo yanayomchukiza Yehova. (Methali 6:16-19) Hivyo, tunapaswa kuepuka kumwiga mchongezi mkuu na mshtaki wa uwongo.

Kataa Njia za Muuaji wa Kwanza

8. Ni katika njia gani Ibilisi alikuwa “muuaji alipoanza”?

⁸ Ibilisi ni muuaji. Yesu alisema hivi kumhusu: “Huyo alikuwa muuaji alipoanza.” (Yohana 8:44) Shetani alianza kuwa muuaji alipowashawishi Adamu na Hawa hapo mwanzoni wamwache Mungu. Alisababisha kifo cha wanadamu wawili wa kwanza na wazao wao. (Waroma 5:12) Ona kwamba tendo hilo linaweza tu kufanywa na mtu, wala si kanuni ya uovu.

9. Kama inavyoonyeshwa kwenye 1 Yohana 3:15, tunaweza kuwa wauaji kwa njia gani?

⁹ Mojawapo ya Amri Kumi ambazo Waisraeli walipewa inasema: “Usiue.” (Kumbukumbu la Torati 5:17) Mtume Petro aliwaandikia Wakristo hivi: “Yeyote kati yenu asiteseke kwa sababu yeye ni muuaji.” (1 Petro 4:15) Hivyo, sisi watumishi wa Yehova hatupaswi kumuua mtu yeyote. Hata hivyo, tutakuwa na hatia mbele za Mungu ikiwa tutamchukia Mkristo mwenzetu na hata kumtakia kifo. Mtume Yohana aliandika hivi: “Kila mtu anayemchukia ndugu yake ni muuaji, nanyi mnajua kwamba hakuna muuaji aliye na uzima wa milele ukikaa ndani yake.” (1 Yohana 3:15) Waisraeli waliagizwa hivi: “Usimchukie ndugu yako moyoni mwako.” (Mambo ya Walawi 19:17) Basi, acheni tutatue haraka tatizo lolote ambalo huenda likatokea kati yetu na mwamini mwenzetu ili yule muuaji Shetani asiharibu umoja wetu wa Kikristo.—Luka 17:3, 4.

Simama Imara Dhidi ya Mwongo Mkuu

10, 11. Tunapaswa kufanya nini ili kusimama imara dhidi ya mwongo mkuu, Shetani?

¹⁰ Ibilisi ni mwongo. Yesu alisema hivi kumhusu: “Anaposema uwongo, yeye husema kulingana na mwelekeo wake mwenyewe, kwa sababu yeye ni mwongo na ndiye baba ya uwongo.” (Yohana 8:44) Shetani alimwambia Hawa uwongo, lakini Yesu alikuja ulimwenguni ili kutoa ushahidi juu ya ile kweli. (Yohana 18:37) Ili tusimame imara dhidi ya Ibilisi tukiwa wafuasi wa Kristo, hatupaswi kusema uwongo wala kudanganya. Tunapaswa ‘kusema ukweli.’ (Zekaria 8:16; Waefeso 4:25) “Yehova Mungu wa ukweli” huwabariki tu Mashahidi wake wanaosema ukweli. Mtu mwovu hana haki ya kumwakilisha.—Zaburi 31:5; 50:16; Isaya 43:10.

¹¹ Ikiwa tunathamini uhuru wetu wa kiroho kwa sababu tumeacha uwongo wa Shetani, tutashikamana na Ukristo, “ile njia ya kweli.” (2 Petro 2:2; Yohana 8:32) Mafundisho yote ya Kikristo ni “kweli ya habari njema.” (Wagalatia 2:5, 14) Wokovu wetu unategemea ‘kutembea  kwetu katika kweli,’ yaani, kushikamana nayo na kusimama imara dhidi ya “baba ya uwongo.”—3 Yohana 3, 4, 8.

Mpinge Mwasi-Imani Mkuu

12, 13. Tunapaswa kuwatendeaje waasi-imani?

¹² Kiumbe huyo wa roho ambaye aligeuka na kuwa Ibilisi alikuwa kwanza katika kweli. Lakini Yesu alisema kwamba Ibilisi “hakusimama imara katika kweli, kwa sababu kweli haimo ndani yake.” (Yohana 8:44) Mwasi-imani huyo mkuu ameendelea kumpinga “Mungu wa ukweli” bila kuacha. Wakristo fulani wa karne ya kwanza walinaswa na “mtego wa Ibilisi,” yaelekea kwa sababu walipotoshwa na kuiacha kweli. Hivyo, Paulo alimhimiza mfanyakazi mwenzake Timotheo awafundishe Wakristo hao kwa upole ili waweze kuponywa kiroho na kuwekwa huru kutokana na mtego wa Shetani. (2 Timotheo 2:23-26) Bila shaka, ni afadhali kushikamana na ukweli ili kuepuka kabisa kunaswa na maoni ya waasi-imani.

¹³ Wanadamu wawili wa kwanza waliasi kwa sababu walimsikiliza Ibilisi na kukubali uwongo wake. Hivyo basi, hatupaswi kuwasikiliza waasi-imani, kusoma vichapo vyao, au kuchunguza vituo vyao vya Intaneti. Hatutafanya hivyo ikiwa tunampenda Mungu na ile kweli. Hatupaswi kuwaruhusu waasi-imani waingie nyumbani mwetu au hata kuwasalimu, kwa kuwa kwa kutenda hivyo ‘tunashiriki katika matendo yao maovu.’ (2 Yohana 9-11) Tusishindwe kamwe na hila za Ibilisi na kuiacha “ile njia ya kweli” ya Ukristo ili kufuata walimu wa uwongo ambao wanatafuta “kuingiza mafundisho yenye kuharibu” na wanaojaribu “kututumia vibaya kwa maneno yaliyopotoshwa kwa ustadi.”—2 Petro 2:1-3, Byington.

14, 15. Ni onyo gani ambalo Paulo aliwapa wazee wa Efeso na pia Timotheo mfanyakazi mwenzake?

¹⁴ Paulo aliwaambia hivi wazee Wakristo katika Efeso: “Jiangalieni ninyi wenyewe na kundi lote, ambalo roho takatifu imewaweka ninyi rasmi kuwa waangalizi kati yake, kulichunga kutaniko la Mungu, ambalo alilinunua kwa damu ya Mwana wake mwenyewe. Ninajua kwamba baada ya kuondoka kwangu mbwa-mwitu wenye kukandamiza wataingia katikati yenu nao hawatalitendea kundi kwa wororo, na kutoka katikati yenu ninyi wenyewe watu watasimama na kusema mambo yaliyopotoka ili kuwavuta wanafunzi wawafuate wao wenyewe.” (Matendo 20:28-30) Baada ya muda, waasi-imani kama hao walitokea na “kusema mambo yaliyopotoka.”

¹⁵ Yapata mwaka wa 65 W.K., mtume huyo alimhimiza Timotheo ‘alitumie sawasawa neno la kweli.’ Paulo aliandika: “Lakini epuka kabisa maneno matupu ambayo huchafua mambo matakatifu; kwa maana wataendelea kwenye ukosefu wa kumwogopa Mungu ulio mwingi zaidi na zaidi, na neno lao litaenea kama kidonda chenye kuoza. Himenayo na Fileto ni kati ya hao. Watu hao wamegeuka kutoka kwenye kweli, wakisema kwamba ufufuo tayari umetukia; nao wanaipindua imani ya wengine.” Uasi-imani ulikuwa umeanza! Paulo aliongeza hivi: “Hata hivyo, msingi imara wa Mungu unakaa ukiwa umesimama.”—2 Timotheo 2:15-19.

16. Licha ya hila za mwasi-imani mkuu, kwa nini tumekuwa washikamanifu kwa Mungu na kwa Neno lake?

 ¹⁶ Mara nyingi Shetani amewatumia waasi-imani ili kujaribu kupotosha ibada ya kweli, lakini ameshindwa. Katika mwaka wa 1868 hivi, Charles Taze Russell alianza kuchunguza kwa makini mafundisho ya dini zinazodai kuwa za Kikristo yaliyokuwa yamefuatwa kwa muda mrefu na akagundua Maandiko yaliyofasiriwa vibaya. Russell na wengine wachache waliokuwa wakitafuta kweli walianzisha kikundi cha kujifunza Biblia huko Pittsburgh, Pennsylvania, Marekani. Miaka 140 hivi tangu hapo, watumishi wa Yehova wameongeza ujuzi na upendo wa Mungu na wa Neno lake. Licha ya hila za mwasi-imani mkuu, Wakristo hao wa kweli wamesaidiwa kubaki washikamanifu kwa Yehova na kwa Neno lake kwa sababu jamii ya mtumwa mwaminifu na mwenye busara imekuwa macho kiroho.—Mathayo 24:45.

Usiache Kamwe Mtawala wa Ulimwengu Akushinde

17-19. Ulimwengu ulio chini ya uwezo wa Ibilisi ni nini, na kwa nini hatupaswi kuupenda?

¹⁷ Njia nyingine ambayo Shetani hutumia ili kutunasa ni kutushawishi tuupende ulimwengu, yaani, wanadamu wasio waadilifu waliotengwa mbali na Mungu. Yesu alimwita Ibilisi “mtawala wa ulimwengu” na akasema hivi: “Hana uwezo juu yangu.” (Yohana 14:30) Shetani asiwe kamwe na uwezo juu yetu! Bila shaka, tunajua kwamba “ulimwengu mzima unakaa katika nguvu za [huyo] mwovu.” (1 Yohana 5:19) Hiyo ndiyo sababu Ibilisi alimtolea Yesu “falme zote za ulimwengu” kwa kumtaka aasi imani kwa kufanya tendo moja la ibada, jambo ambalo Mwana wa Mungu alikataa kabisa. (Mathayo 4:8-10) Ulimwengu unaotawaliwa na Shetani unawachukia wafuasi wa Kristo. (Yohana 15:18-21) Haishangazi kwamba mtume Yohana alituonya kwamba tusiupende ulimwengu!

¹⁸ Yohana aliandika hivi: “Msiwe mkiupenda ulimwengu au vitu vilivyo katika ulimwengu. Yeyote akiupenda ulimwengu, kumpenda Baba hakumo ndani yake; kwa sababu kila kitu kilicho katika ulimwengu—tamaa ya mwili na tamaa ya macho na mtu kujionyesha mali  yake maishani—hakitokani na Baba, bali hutokana na ulimwengu. Zaidi ya hayo, ulimwengu unapitilia mbali na pia tamaa yake, lakini yeye anayefanya mapenzi ya Mungu anadumu milele.” (1 Yohana 2:15-17) Hatupaswi kuupenda ulimwengu, kwa kuwa njia za ulimwengu hufurahisha tu mwili wenye dhambi na hilo ni kinyume kabisa cha kanuni za Yehova Mungu.

¹⁹ Namna gani ikiwa tunaupenda ulimwengu moyoni mwetu? Ikiwa ndivyo, basi acheni tusali kwa Mungu ili atusaidie kuushinda upendo wa ulimwengu na tamaa zake za mwili. (Wagalatia 5:16-21) Bila shaka, tutajitahidi kuendelea kujilinda “bila doa kutokana na ulimwengu” kwa kuwa tunajua kwamba “majeshi ya roho waovu” ndio “watawala wa ulimwengu” wasioonekana ambao wanatawala wanadamu wasio waadilifu.—Yakobo 1:27; Waefeso 6:11, 12; 2 Wakorintho 4:4.

20. Kwa nini tunaweza kusema kwamba sisi “si sehemu ya ulimwengu”?

²⁰ Kuhusu wanafunzi wake, Yesu alisema: “Wao si sehemu ya ulimwengu, kama vile ambavyo mimi si sehemu ya ulimwengu.” (Yohana 17:16) Wakristo watiwa-mafuta na waandamani wao waliojiweka wakfu hujitahidi kujilinda safi kiadili na kiroho kwa kujitenga na ulimwengu. (Yohana 15:19; 17:14; Yakobo 4:4) Ulimwengu huu usio na uadilifu hutuchukia kwa sababu tunajitenga nao na sisi ni ‘wahubiri wa uadilifu.’ (2 Petro 2:5) Naam, tunaishi miongoni mwa wanadamu ambao baadhi yao ni waasherati, wazinzi, wanyang’anyi, waabudu-sanamu, wezi, waongo, na walevi. (1 Wakorintho 5:9-11; 6:9-11; Ufunuo 21:8) Hata hivyo, hatupumui “roho ya ulimwengu,” kwa kuwa hatuongozwi na nguvu hiyo inayochochea dhambi.—1 Wakorintho 2:12.

Usimpe Ibilisi Nafasi

21, 22. Unaweza kutumiaje shauri la Paulo kwenye Waefeso 4:26, 27?

²¹ Badala ya kuchochewa na “roho ya ulimwengu,” sisi tunaongozwa na roho ya Mungu, ambayo hukuza ndani yetu sifa kama vile upendo na kujizuia. (Wagalatia 5:22, 23) Sifa hizo hutusaidia kushinda mashambulizi ya Ibilisi dhidi ya imani yetu. Anataka ‘tuwake hasira ili tu kufanya uovu,’ lakini roho ya Mungu hutusaidia ‘kuacha hasira na ghadhabu.’ (Zaburi 37:8) Naam, huenda nyakati nyingine tukawa na sababu nzuri ya kuwa wenye hasira, lakini Paulo anatushauri hivi: “Iweni na ghadhabu, lakini msitende dhambi; jua lisitue mkiwa katika hali ya kuchokozeka, wala msimpe Ibilisi nafasi.”—Waefeso 4:26, 27.

²² Hasira yetu inaweza kusababisha dhambi tukiendelea kuwa katika hali ya kuchokozeka. Tukiendelea kuwa katika hali hiyo, tutakuwa tukimpa Ibilisi nafasi ya kuleta mgawanyiko kutanikoni au kutuchochea kufanya matendo maovu. Hivyo, ikiwa tumekosana na wengine tunapaswa kutatua mambo haraka kwa njia inayokubaliwa na Mungu. (Mambo ya Walawi 19:17, 18; Mathayo 5:23, 24; 18:15, 16) Hivyo basi, acheni tuongozwe na roho ya Mungu, huku tukisitawisha sifa ya kujizuia na kutoruhusu kamwe hasira isababishe ndani yetu uchungu, nia mbaya, au chuki hata iwe tuna sababu nzuri ya kukasirika.

23. Ni maswali gani tutakayochunguza katika makala inayofuata?

²³ Tumezungumzia baadhi ya sifa mbaya za Ibilisi ambazo hatupaswi kuiga. Lakini huenda wasomaji wengine wakajiuliza: Je, tunapaswa kumwogopa Shetani? Kwa nini anachochea mateso dhidi ya Wakristo? Na tunaweza kuepukaje kushindwa na Ibilisi?

[Maelezo ya Chini]

Utajibuje?

• Kwa nini hatupaswi kamwe kumchongea mtu yeyote?

• Kulingana na 1 Yohana 3:15, tunaweza kuepukaje kuwa wauaji?

• Tunapaswa kuwaonaje waasi-imani, na kwa nini?

• Kwa nini hatupaswi kuupenda ulimwengu?

[Maswali ya Funzo]

[Picha katika ukurasa wa 23]

Hatutamruhusu kamwe Ibilisi aharibu umoja wetu wa Kikristo

[Picha katika ukurasa wa 24]

Kwa nini Yohana alitushauri tusiupende ulimwengu?