Je, Una Ustadi wa Kuwasiliana?
Je, Una Ustadi wa Kuwasiliana?
“BARUA ya Mapenzi ya mtu mwenye umri wa miaka 60.” Hicho kilikuwa kichwa cha shindano la bahati nasibu lililosimamiwa na benki moja nchini Japani miaka michache iliyopita. Shindano hilo liliwatia moyo Wajapani wenye umri wa miaka 50 na 60 hivi kueleza “hisia” zao kuwaelekea wenzi wao. Mshindani mmoja alimwandikia mke wake hivi: “Huenda ukacheka, lakini nitajuta nisipokwambia kwamba hivi ndivyo ninavyohisi moyoni: Asante sana kwa kukubali kufunga ndoa nami.”
Katika utamaduni mbalimbali, kutia ndani utamaduni kadhaa katika nchi za Mashariki, watu hukatazwa wasieleze hisia zao. Hata hivyo, zaidi ya watu 15,000 walitaka kuingia katika shindano hilo la kuandika barua ya mapenzi. Shindano hilo lilipendwa sana hivi kwamba lingine likafanywa na vitabu vikachapishwa vikitegemea barua hizo. Hilo linaonyesha kwamba watu wengi hutamani sana kueleza jinsi wanavyohisi kuhusu wenzi wao wapendwa. Hata hivyo, wengine hawaelezi hisia zao. Kwa nini? Huenda ikawa ni kwa sababu inahitaji jitihada na ustadi ili watu wengine, kama vile mwenzi wa ndoa, waelewe jinsi wanavyohisi.
Hitoshi Kato, ambaye aliandika kitabu kuhusu kustaafu, anasema kwamba kesi nyingi za talaka kati ya wenzi wa ndoa wenye umri mkubwa nchini Japani, huwasilishwa na wake waliofungia kinyongo moyoni kwa miaka mingi. “Lakini,” anasema, “pia ni kwa sababu wenzi hao hawaelezi hisia zao wanapokuwa na matatizo.”
Wakati mwingine, baada ya kustaafu, mume anaweza kushangaa mke wake anapomwambia kwamba anataka watalikiane. Huenda kwa miaka mingi wenzi hao hawakuzungumzia hisia zao. Labda mume na mke walijaribu kueleza hisia zao lakini wakashindwa kudumisha mawasiliano mazuri. Badala ya kusitawisha uhusiano wa karibu, wanakuwa na mabishano kila siku.
Mume na mke wanaweza kushughulikiaje matatizo yao kwa amani na kueleza hisia zao kwa njia inayofaa? Huenda ukapendezwa kujua kwamba madokezo bora zaidi hayapatikani katika kitabu cha karibuni kilichoandikwa na mshauri wa ndoa, bali yanapatikana katika Biblia, kitabu cha zamani ambacho kimependwa sana kwa karne nyingi.