Kueneza Habari Njema Katika Nchi Maridadi ya Haiti

HAITI na Jamhuri ya Dominika ziko katika kisiwa chenye joto cha Hispaniola, ambacho kina milima mirefu zaidi katika eneo la Karibea. Milima fulani ina urefu wa zaidi ya meta 2,400. Vidimbwi vidogo vilivyo katika maeneo yaliyoinuka vinakuwa na ukungu na barafu wakati wa miezi ya “baridi.”

Maeneo yenye milima na mabonde kusini mwa Haiti yamefunikwa na misitu mikubwa sana. Maeneo mengine yenye milima hayana misitu, kwa sababu imeharibiwa. Ukienda kaskazini au kusini, utagundua kwamba Haiti ni nchi maridadi sana. Ukipita katika vijia fulani vyenye kupinda-pinda milimani, utaona maeneo mbalimbali yenye kuvutia sana ya nchi kavu na bahari. Kila mahali unaweza kuona maua mbalimbali yenye rangi za kuvutia.

Nchi hii maridadi ina watu milioni 8.3, na wengi wao wana asili ya Kiafrika na wanaishi mashambani. Wengi wao ni maskini, lakini ni wenye fadhili na wakarimu. Kwa miaka 60 hivi, Mashahidi wa Yehova wamefurahia kuwahubiria watu hao habari njema ya Ufalme wa Mungu nao wamekaribishwa kwa uchangamfu.—Mathayo 24:14.

Kuhubiri Katika Mji wa Mashambani

Dada mmoja mmishonari alipotembelea mji mmoja wa mashambani kwa mara ya kwanza alieleza jambo fulani ambalo ni la kawaida. Aliandika hivi:

“Siku moja mnamo Machi (Mwezi wa 3), 2003, tulienda kuhubiri huko Casale, mji mdogo ulio umbali wa nusu saa kutoka mji wa Cabaret, ambako kuna makao yetu ya wamishonari, kilometa 30 kaskazini ya Port-au-Prince, mji mkuu wa Haiti. Mara ya mwisho ambapo Mashahidi walihubiri Casale ilikuwa mwaka wa 1999, kwa hiyo tulikuwa na hamu sana tulipoanza safari yetu saa moja asubuhi. Tulikuwa watu 22, karibu kutaniko letu lote, nasi tulisafiri kwa magari mawili. Kila mmoja wetu alizungumza na kucheka kwa furaha tulipokuwa tukisafiri kwenye barabara za vumbi zilizoinuka. Mwishowe, tukafika kwenye bonde lenye miti mingi mikubwa. Kuna mto unaotiririka katika bonde hilo, na mji wa Casale umejengwa kwenye pande mbili za mto huo.

“Historia ya mji huo mtulivu inaanzia mwanzoni mwa miaka ya 1800 wakati ambapo wanajeshi fulani wa Poland, waliokuja Haiti kuwasaidia watumwa kupata uhuru, walipoanza kuishi katika bonde hili lenye rutuba pamoja na wake zao wa Haiti. Walizaa watu wenye rangi tofauti-tofauti zenye kuvutia. Inapendeza kuona watu wa mashambani wenye ngozi nyeupe, nyekundu, au ya kahawia, macho ya kijani, macho ya kahawia, na kadhalika.

“Mtu tuliyemkuta kwenye nyumba ya kwanza hakupendezwa. Tulipokuwa tukiondoka, mtu fulani alikuja kukutana nasi barabarani. Alitaka kujua ikiwa tunaamini kwamba kuna tofauti kati ya Yesu na Mungu. Alileta Biblia yake kama tulivyomwomba,  na tukamsadikisha kupitia Maandiko kwamba Yesu ni Mwana wa Mungu na kwamba Yehova ni “Mungu wa pekee wa kweli.” (Yohana 17:3) Watu wengi walitukaribisha tuketi chini na kuzungumza nao. Wengine waliuliza, ‘Mtarudi siku gani na kujifunza Biblia pamoja nasi?’

“Wakati wa mchana, tulipata mahali pazuri penye kivuli na tulikuwa tayari kula chakula cha mchana. Dada wawili walikuwa wamepika samaki wengi kwenye chungu. Samaki hao walikuwa watamu! Tulikaa hapo kwa muda, tukila na kuzungumza, na pia kuwahubiria wapita-njia. Kisha, tukavuka mto na kwenda upande wa pili wa mji. Tulifurahia kuzungumza na watu hao wenye urafiki ambao waliketi chini ya miti karibu na nyumba zao za hali ya chini. Tulifurahi sana kusikia sauti za watoto wakicheza, wanawake wakifua nguo mtoni, na akina nyanya wakisaga kahawa!

“Muda si muda, ilikuwa saa kumi kamili jioni, na kikundi chetu chenye furaha kilipanda magari na kurudi Cabaret. Mimi na mume wangu tulifurahia sana kutembelea Casale kwa mara ya kwanza. Tulifurahia pia kutembelea watu wa Casale ambao ni wakarimu na wenye urafiki.”

Tangu wamishonari wa kwanza Mashahidi walipofika Haiti mwaka wa 1945, idadi ya wahubiri wa Ufalme katika nchi hiyo imeongezeka sana, hivi kwamba leo kuna wahubiri 14,000 hivi ambao wanaongoza mafunzo ya Biblia zaidi ya 22,000. Wamechochea watu 59,372 ambao walihudhuria Ukumbusho mnamo Machi 2005, na wahubiri hao wameendelea kuwatangazia waziwazi watu wote habari njema ya Ufalme wa Mungu. Hebu angalia matokeo mazuri ya kazi ya Mashahidi wa Yehova katika maisha ya watu.

Kuhubiri Habari Njema kwa Picha Maridadi

Watu wengi wa Haiti wanapenda vitu vyenye rangi maridadi. Hilo linaonekana katika mavazi yao, nyumba zao zilizopakwa rangi, maua mbalimbali yaliyo katika bustani zao, na katika picha wanazochora. Vitambaa vilivyopakwa rangi kwa mtindo wa Haiti unaoitwa L’Art Haitien vinaonyeshwa barabarani katika mji wote wa Port-au-Prince. Wanunuzi wanatoka sehemu mbalimbali za ulimwengu.

Rangi za kuvutia hazionekani tu kwenye vitambaa. Barabara za Port-au-Prince zimejaa magari  ya abiria yanayoitwa camionettes, au tap-taps, ambayo yamepakwa rangi kwa mitindo ya pekee sana. Mara nyingi, picha hizo zinategemea masimulizi ya Biblia.

Unapotembea barabarani, kwa ghafula unaweza kuona picha unayojua kama vile picha ya Adamu na Hawa wakiwa katika bustani ya Edeni. Ndiyo, unaweza kuiona ikiwa imechorwa kwenye dirisha la nyuma la camionette inayopita. Kwa kawaida, Maandiko ya Biblia au maandishi yenye jina Yehova yanaonekana kwenye magari hayo au katika majina ya makampuni.

Kuhubiri Habari Njema Shuleni

Mashahidi vijana nchini Haiti wana nafasi nzuri za kuwasaidia wanafunzi wenzao kujifunza Biblia. Kwa mfano, soma ripoti inayofuata kutoka kwa msichana Shahidi mwenye umri wa miaka 17.

“Siku moja mwanafunzi mwenzangu alikuja kuniuliza maana ya neno ‘uasherati.’ Nilimpuuza nikifikiri kwamba alitaka kunichezea kimapenzi. Lakini alipomuuliza mwanafunzi mwingine wa kiume swali hilo, darasa lote lilitaka kujua jambo hilo. Kwa hiyo, juma lililofuata, baada ya kufanya utafiti kuhusu habari hiyo, nilitoa hotuba darasani, na kueleza kwa nini Mashahidi wa Yehova wanajitahidi kuwa safi kiadili, kiroho, na kimwili.

“Wanafunzi waliuliza maswali mengi na kukubali majibu ya Biblia niliyowapa. Hata mwalimu-mkuu, ambaye mwanzoni alisitasita, aliuliza maswali mengi na kupanga ili nizungumze na wanafunzi katika madarasa mengine. Niliwaonyesha kitabu Maswali Ambayo Vijana Huuliza—Majibu Yafanyayo Kazi, * na wengi walipendezwa nacho. Siku iliyofuata niliwapa wanafunzi wenzangu vitabu 45. Wengi walisoma haraka nakala zao, na sasa wengine kati yao wanajifunza Biblia pamoja na Mashahidi wanaoishi katika eneo lao. Mwanafunzi mmoja anayeishi karibu nasi sasa anahudhuria mikutano yote.”

Kutumia Lugha ya Krioli

Watu wa Haiti wanavutia, na nchi yao ni maridadi, na ndivyo ilivyo lugha ya Krioli ya Haiti, ambayo ni mchanganyiko wa maneno ya Kifaransa na kanuni za lugha za Afrika Magharibi. Hiyo ndiyo lugha ya asili ya watu wa Haiti, lugha ambayo inagusa moyo wao. Mashahidi wa Yehova wanatumia lugha hiyo hasa katika kutimiza huduma yao, na mipango imefanywa ili kutokeza vichapo zaidi vya Biblia katika Kikrioli cha Haiti.

Katika mwaka wa 1987, broshua Furahia Milele Maisha Duniani! ilitafsiriwa katika Kikrioli cha Haiti, kisha kitabu Ujuzi Uongozao Kwenye Uhai Udumuo Milele, halafu broshua Mungu Anataka Tufanye Nini? Vichapo hivyo vimewasaidia sana wanafunzi wapya wa Biblia ambao wanataka kupata ujuzi wa msingi wa Neno la Mungu. Kuanzia Septemba 1, 2002 (1/9/2002), gazeti la Mnara wa Mlinzi limekuwa likichapishwa katika Kikrioli cha Haiti. Hata hivyo, bado vichapo vya Kifaransa vinatumiwa, lakini watu wengi wanapenda kusoma vichapo katika lugha yao wenyewe.

Kuwahubiria Habari Njema Watu Walio Gerezani

Hivi karibuni, Mashahidi wa Yehova wameanza kuwahubiria habari njema wanaume na wanawake walio katika magereza ya Serikali. Mashahidi wanaofanya hivyo wanafurahi kuwapelekea ujumbe wa faraja wale walio katika hali hiyo ya kuhuzunisha. Mhudumu mmoja Mkristo anasema hivi:

“Wakati wa ziara yetu ya kwanza katika gereza moja, wafungwa waliletwa katika chumba kikubwa ili wakutane nasi. Hatukujua jinsi ambavyo wangeitikia. Tulipowaeleza kwamba tuliwatembelea ili kuwasaidia kuelewa Biblia, wafungwa wote 50 walitukaribisha. Tuliwaonyesha broshua Jitahidi Kusoma na Kuandika na Furahia Milele Maisha Duniani! za lugha ya Kikrioli na tukaanza kujifunza Biblia na wafungwa 26. Wafungwa kumi hawakujua kusoma wala kuandika, lakini  walipendezwa tulipowaonyesha picha zilizo katika broshua ambazo zingewasaidia kuelewa habari zilizomo.”

Mashahidi waliporudi, mwanamume mmoja alisema hivi: “Nimeisoma na kuisoma tena ile broshua. Sikuzote ninafikiria habari zilizo katika broshua hii, nami nimekuwa nikitazamia sana ziara yenu.” Mwanamume aliyefungwa kwa sababu ya kuiba kwa kutumia silaha alisema kwamba alitaka kubadilika, naye akaomba mtu fulani atumwe ili ajifunze Biblia pamoja na mke wake. Baba mwenye watoto wawili aliyefungwa gerezani pia aliomba mke wake afundishwe Biblia ili aone tofauti kati ya mafundisho ya kweli na ya uwongo. Kasisi mmoja Mprotestanti aliyefungwa kwa sababu ya kuwaibia wafuasi wa kanisa lake kiasi kikubwa cha pesa, alisema kwamba sasa alikuwa amepata kweli, na kwamba baada ya kufunguliwa angewasaidia washiriki wa kanisa lake kuwa Mashahidi wa Yehova.

Mfungwa mwingine ambaye hakupata nakala ya broshua Anataka ya Kikrioli, aliandika kwa mkono nakala nzima ya broshua hiyo kutokana na broshua ya mfungwa mwenzake, halafu akaiweka yote akilini. Mfungwa mmoja mwanamke alianza kuwaambia wafungwa wengine tisa mambo ambayo alikuwa akijifunza, hata alianza kujifunza pamoja nao. Mfungwa mwingine mwanamume alimaliza kujifunza broshua hiyo, na alipoanza kujifunza kitabu Ujuzi, alianza kuwahubiria wafungwa wengine. Muda si muda, alikuwa akijifunza Biblia pamoja na wafungwa wanne.

Mercony, * ambaye ana watu wa ukoo ambao ni Mashahidi wa Yehova, alikuwa akijifunza Biblia. Aliwatia moyo wafungwa wengine wasome vichapo vya Biblia ambavyo aliletewa na watu wake wa ukoo. Anaeleza hivi: “Ninapowapa wafungwa vichapo, wanasema mimi ni Shahidi wa Yehova. Ninawaambia kwamba mimi si Shahidi kwa kuwa ninajua maana ya kuwa Shahidi. Sasa ninataka kuchukua jambo hilo kwa uzito, kujifunza na kubatizwa. Kama ningewaiga ndugu zangu nilipokuwa na umri mdogo, singekuwa humu gerezani.”

Mmoja wa wafungwa ambaye alikuwa amepokea kichapo kutoka kwa Mercony alimwambia hivi Shahidi aliyemtembelea: “Jumatatu (Siku ya 1) iliyopita kabla hujafika, nilikuwa nimeshuka moyo na nilitaka kujiua. Lakini baada ya kusoma yale magazeti, nilimwomba Mungu anisamehe kwa sababu ya mambo mabaya ambayo nilifanya na pia nikamwomba amtume mtu fulani anionyeshe njia inayofaa. Nilifurahi sana ulipokuja siku iliyofuata na kujitolea kujifunza Biblia pamoja na wafungwa! Ningependa unifundishe jinsi ya kumtumikia Yehova.”

Gazeti la Amkeni! Linawaletea Wengi Habari Njema

Toleo la Amkeni! la Novemba 8, 2000 (8/11/2000) lilizungumza kuhusu kazi ya uuguzi. Mwanamke fulani alichukua nakala 2,000, na kuwagawia wauguzi waliokuwa wakihudhuria mkutano huko Port-au-Prince. Toleo la Amkeni! la Julai 8, 2002 (8/7/2002) lenye habari kuhusu polisi na kazi yao lilichukuliwa na polisi wengi huko Port-au-Prince. Walifurahia gazeti hilo, na hata sasa, polisi wengine bado wanawasimamisha Mashahidi barabarani na kuwaomba nakala zaidi za gazeti hilo.

Hivi karibuni, ofisa mmoja mwanamke wa Shirika la Afya Ulimwenguni alikuwa akipanga programu ya kuwaelimisha watu kuhusu tatizo la UKIMWI. Alialikwa kwenye ofisi ya tawi ya Mashahidi wa Yehova, ambako alionyeshwa habari kuhusu UKIMWI katika Amkeni! Alivutiwa kuona habari za Biblia ambazo zinazungumzia njia bora ya kuzuia UKIMWI na jinsi ya kuwasaidia walioambukizwa kukabiliana na hali yao. Alisema kwamba Amkeni! linaongoza katika kutoa habari kuhusu UKIMWI.

Mashahidi wa Yehova wanatumia njia nyingi kueneza habari njema ya Ufalme katika nchi maridadi ya Haiti, kama vile wanavyofanya katika nchi nyingine 234 ulimwenguni pote. Watu wengi wanakubali ujumbe huo wa tumaini, nao wanasaidiwa kutofikiria sana matatizo ya maisha ya sasa na badala yake kutarajia ulimwengu mpya, ambamo watu wote wanaomwabudu Mungu wa kweli, Yehova, watafurahia kabisa maisha makamilifu.—Ufunuo 21:4.

[Maelezo ya Chini]

[Hisani ya Picha katika ukurasa wa 9]

Background: ©Adalberto Rios Szalay/photodisc/age fotostock