“EUREKA!” Neno hilo linamaanisha “Nimeipata!” Katika karne ya 19, jitihada za kutafuta dhahabu zilianza huko California, Marekani, na wachimbaji walisema neno hilo walipopata dhahabu. Hata hivyo, Charles Taze Russell na Wanafunzi wenzake wa Biblia, walipata kitu fulani chenye thamani kubwa zaidi—kweli ya Biblia. Na walikuwa na hamu ya kuwaambia wengine kweli hiyo.

Kufikia majira ya kiangazi ya 1914, mamilioni ya watu walimiminika kutoka majiji makubwa ili kutazama sinema ya pekee ya “Photo-Drama of Creation,” iliyotayarishwa na shirika la International Bible Students Association (I.B.S.A.), na ilionyeshwa kwa muda wa saa nane. Sinema hiyo iliyotegemea Biblia ilikuwa na picha zenye kuvutia, slaidi zenye rangi nyangavu, masimulizi yenye kuvutia, na muziki mzuri. Na ilionyesha uumbaji kuanzia mwanzo wa historia ya wanadamu hadi mwisho wa Utawala wa Miaka Elfu Moja wa Yesu Kristo.—Ufu. 20:4. *

Lakini namna gani wale walioishi katika miji midogo na maeneo ya mashambani? Ili yeyote mwenye njaa ya kupata kweli asikose sinema hiyo, mnamo Agosti 1914 shirika la I.B.S.A. lilitoa “Eureka Drama”—onyesho linaloweza kubebwa kwa urahisi la “Photo-Drama” ambalo halikuwa na sehemu za sinema. Kulikuwa na aina tatu za “Eureka Drama” katika lugha kadhaa: “Eureka X” ilikuwa na masimulizi yote yaliyorekodiwa pamoja na muziki. “Eureka Y” ilikuwa na rekodi zote pamoja na slaidi zenye rangi maridadi. Na “Eureka Family Drama” ilikusudiwa kuonyeshwa nyumbani, nayo ilikuwa na nyimbo na masimulizi machache. Vinanda na projekta vilipatikana kwa bei nafuu.

Drama hiyo iliwawezesha Wanafunzi wa Biblia kuhubiri ujumbe wa Ufalme katika maeneo ya mashambani na maeneo mapya. Waliionyesha bila malipo, na hawakuhitaji projekta au kitambaa kikubwa cha kuonyeshea sinema. “Eureka X” iliyokuwa na sauti pekee ingeweza kuonyeshwa usiku au mchana. Projekta ya slaidi za “Eureka Y” haikuhitaji umeme, ilitumia taa ya gesi (carbide lamp). Ripoti moja katika gazeti la Mnara wa Mlinzi la lugha ya Kifini ilisema hivi: “Tunaweza kuonyesha picha hizi karibu kila mahali.” Na ndivyo ilivyokuwa!

Badala ya kukodi majumba makubwa, mara nyingi Wanafunzi wa Biblia walijitahidi kutafuta majengo yasiyohitaji kulipiwa, kama vile madarasa ya shule, majengo ya mahakama, vituo vya magari-moshi, na hata  sebule kubwa. Mara nyingi drama hiyo ilionyeshwa nje, kwenye kitambaa kikubwa cheupe kilichoning’inizwa kwenye ukuta wa jengo la kuhifadhia mazao. Anthony Hambuch aliandika hivi: “Wakulima walitengeneza uwanja mdogo katika mashamba yao kwa kuweka magogo mengi ambayo watu wangekalia na kufurahia drama hiyo.” Ndugu hao walitumia gari lililokokotwa kwa farasi kubebea vifaa vya drama hiyo, mabegi, na vifaa vya kupigia kambi na vyombo vya kupikia.

Katika maeneo fulani, watazamaji wa drama ya “Eureka” walikuwa wachache na katika maeneo mengine walikuwa wengi. Katika mji mmoja huko Marekani, watu 400 walitazama drama hiyo katika jengo la shule, ingawa mji huo ulikuwa na wakazi 150. Katika maeneo mengine watu walitembea umbali wa kilomita 8 kwenda na kurudi ili kutazama drama ya “Eureka.” Nchini Sweden, majirani wa Charlotte Ahlberg waliokusanyika katika nyumba yake ndogo, “waliguswa moyo sana” waliposikiliza rekodi hizo. Nchini Australia, watu 1,500 hivi walisafiri hadi kwenye jiji la mbali lenye migodi ili kutazama drama hiyo. Gazeti la Mnara wa Mlinzi lilisema kwamba katika shule za sekondari na vyuo, “maprofesa na wanafunzi walifurahia sana picha na rekodi zetu nzuri za gramafoni.” “Eureka Drama” ilionyeshwa pia katika majumba ya sinema.

“Eureka Drama” ilikuja kuwa kifaa muhimu katika “Kazi ya Darasa la Nyongeza,” ambako Wanafunzi wa Biblia walituma wasemaji ili kuanzisha madarasa mapya ya kujifunzia. Idadi ya watu waliotazama “Eureka Drama” haijulikani. Seti nyingi za “Drama” hiyo zilitumiwa mara nyingi. Hata hivyo, katika mwaka wa 1915, kati ya vikundi 86 vilivyoonyesha drama hiyo, ni 14 tu vilivyoripoti kwa ukawaida. Ijapokuwa ripoti yote haikukamilika, ripoti ya mwisho ya mwaka huo ilitaja kwamba watu zaidi ya milioni moja walitazama “Drama” hiyo. Watu 30,000 hivi waliomba kutumiwa machapisho yanayozungumzia Biblia.

Ingawa “Eureka Drama” haikumbukwi sana na wengi leo, yaelekea drama hiyo ya pekee ilitazamwa na mamilioni kuanzia Australia hadi Argentina, Afrika Kusini hadi Visiwa vya Uingereza, Karibea, na India. Wengi wao walipata kweli ya Biblia yenye thamani zaidi kuliko dhahabu nao walipaaza sauti hivi: “Eureka!”