Wafundishe Watoto Wako

Yosia Alichagua Kutenda Yaliyo Sawa

JE, UNAONA ni vigumu kutenda yaliyo sawa? *— Ukisema ndiyo, watu wengi watakubaliana nawe. Hata watu wazima huona ikiwa vigumu kufanya mambo wanayojua ni sawa. Acheni tuone kwa nini ilikuwa vigumu hasa kwa Yosia kufanya maamuzi yanayofaa. Je, unajua Yosia alikuwa nani?—

Yosia alikuwa mwana wa Amoni, mfalme wa Yuda ambaye alikuwa na umri wa miaka 16 tu Yosia alipozaliwa. Amoni alikuwa mfalme mbaya sana kama tu baba yake, Mfalme Manase. Kwa kweli, Manase alikuwa mfalme mwovu kwa miaka mingi sana. Lakini alichukuliwa mateka na Waashuru na kufungwa gerezani huko mbali katika nchi ya Babiloni. Alipokuwa gerezani, Manase alimsihi Yehova amsamehe na Yehova akamsamehe.

Manase alipofunguliwa, alirudi Yerusalemu na akaanza tena kutawala akiwa mfalme. Mara moja alisahihisha mambo yote mabaya aliyokuwa amefanya na akawasaidia watu wamtumikie Yehova. Lazima awe alihuzunika mwana wake Amoni alipokosa kufuata mfano wake mzuri. Karibu na wakati huo, Yosia alizaliwa. Biblia haisemi Manase alitumia wakati mwingi kadiri gani na mjukuu wake Yosia. Lakini, je, unafikiri Manase alijaribu kumsaidia amtumikie Yehova?—

Yosia alipokuwa na umri wa miaka sita tu, Manase alikufa, na Amoni baba ya Yosia, akawa mfalme. Amoni alitawala kwa miaka miwili tu kabla ya watumishi wake kumwua. Kwa hiyo, Yosia akawa mfalme wa Yuda alipokuwa na umri wa miaka minane. (2 Mambo ya Nyakati, sura ya 33) Unafikiri ni nini kilichotendeka wakati huo? Je, Yosia alichagua kufuata mfano mbaya wa baba yake, Amoni, au alifuata mfano mzuri wa babu yake, Manase, aliyetubu?—

Hata ingawa Yosia alikuwa mchanga, alijua kwamba alitaka kumtumikia Yehova. Kwa hiyo, aliwasikiliza wale waliompenda Yehova, badala ya kuwasikiliza wale waliokuwa rafiki za baba yake. Yosia alikuwa na umri wa miaka minane tu, lakini alijua kwamba alipaswa kuwasikiliza watu wanaompenda  Mungu. (2 Mambo ya Nyakati 34:1, 2) Je, ungependa kujua jambo fulani kuwahusu wale waliompa Yosia mashauri na waliomwekea mfano wa kuiga?—

Mmoja kati ya wale waliomwekea Yosia mfano mzuri alikuwa nabii Sefania. Alikuwa mtu wa ukoo wa Yosia, kwa sababu huenda alikuwa mzao wa mfalme aliyetenda mema aliyeitwa Hezekia, baba ya Manase. Mwanzoni mwa utawala wa Yosia, Sefania aliandika kitabu kinachoitwa kwa jina lake. Sefania alionya kuhusu mambo mabaya ambayo yangewapata wale ambao hawakuchagua kutenda yaliyo sawa, na ni wazi kwamba Yosia alisikiliza maonyo hayo.

Kisha kulikuwa na Yeremia ambaye huenda umewahi kusikia kumhusu. Yeremia na Yosia walikuwa vijana na walikuwa majirani wa karibu. Yehova alitumia roho yake kumwongoza Yeremia aandike kitabu cha Biblia kinachoitwa kwa jina lake. Yosia alipokufa vitani, Yeremia aliandika wimbo wa pekee ili kueleza huzuni yake nyingi. (2 Mambo ya Nyakati 35:25) Tunaweza kuwazia jinsi walivyotiana moyo waendelee kuwa waaminifu kwa Yehova!

Unafikiri unaweza kujifunza nini kutoka kwa Yosia?— Ikiwa wewe pia huna baba anayemtumikia Yehova, je, kuna mtu mwingine ambaye anaweza kukusaidia kujifunza kumhusu Mungu? Huenda mtu huyo ni mama yako, nyanya, au mtu mwingine wa ukoo. Labda ni mtu mwingine yeyote anayemtumikia Yehova, mtu ambaye mama yako atamruhusu ajifunze Biblia pamoja nawe.

Ingawa Yosia hakuwa na ndugu au dada, alikuwa na umri wa kutosha kujua kwamba anapaswa kuwa na marafiki ambao wanamtumikia Yehova. Wewe pia na ufanye vivyo hivyo ukichagua kutenda yaliyo sawa!

[Maelezo ya chini]

Maswali:

○ Ni nani waliokuwa baba na babu ya Yosia, na walikuwa watu wa aina gani?

○ Babu ya Yosia alifanya mabadiliko gani maishani?

○ Ni manabii gani wawili ambao huenda walimwekea Yosia mfano mzuri, na unafikiri kwa nini ni muhimu kuwa na marafiki kama wao?

[Picha katika ukurasa wa 25]

Sefania na Yeremia walimsaidia Yosia jinsi gani kutenda yaliyo sawa?