YEHOVA anatarajia nini kutoka kwa wale wanaotaka kumwabudu kwa njia inayokubalika? Je, anataka tufanye mambo kikamilifu, na hivyo kufanya iwe vigumu kwetu, wanadamu wasiokamilika, kumpendeza? Au je, anataka tufanye mambo kulingana na uwezo wetu? Majibu ya maswali hayo ni muhimu ikiwa tunataka kupata shangwe katika kumtumikia Mungu. Acheni tuchunguze jinsi nabii Mika alivyofafanua kwa ufupi matakwa ya Mungu.—Soma Mika 6:8.

“Amekuambia yaliyo mema.” Hatuhitaji kukisia mambo ambayo Yehova anatazamia kutoka kwetu. Ametuambia, na kutueleza waziwazi matakwa yake katika Biblia. Mungu anataka tutende “yaliyo mema.” Na si mabaya. “Mungu ni upendo,” kwa hiyo anataka tufanikiwe maishani. (1 Yohana 4:8; 5:3) Tunapofuata matakwa yake tunampendeza na pia tunafaidika.—Kumbukumbu la Torati 10:12, 13.

“Yehova anataka nini kutoka kwako?” Je, Mungu ana haki ya kudai jambo lolote kutoka kwetu? Bila shaka, ana haki! Tunapaswa kumtii kwa sababu yeye ndiye Chanzo na Mtegemezaji wa uhai. (Zaburi 36:9) Hivyo basi, anataka nini kutoka kwetu? Mika anaeleza kwa ufupi matakwa ya Mungu akitumia mambo matatu. Mambo mawili ya kwanza yanahusu hasa mahusiano yetu na wanadamu wenzetu na jambo la tatu linahusu uhusiano wetu pamoja na Mungu.

“Kutenda haki.” Neno la Kiebrania “haki,” kulingana na kitabu kimoja cha marejezo, “linahusisha mahusiano ya haki na usawa katika jamii.” Mungu anataka tuwatendee wengine kwa haki na usawa kwa kufuata viwango vyake. Tunakuwa wenye haki tunapotenda bila ubaguzi, na kwa unyoofu tunaposhughulika na wengine. (Mambo ya Walawi 19:15; Isaya 1:17; Waebrania 13:18) Tunapowatendea wengine kwa haki huenda wao pia wakachochewa kututendea kwa haki.—Mathayo 7:12.

“Kupenda fadhili.” Mungu hatuambii tuonyeshe tu sifa ya fadhili bali pia tuipende. Neno la Kiebrania linalotafsiriwa “fadhili” (cheʹsedh) linaweza pia kutafsiriwa “fadhili-upendo” au “upendo mshikamanifu.” Msomi mmoja wa Biblia anasema: “Neno [cheʹsedh] halina maana sawa na upendo, rehema, au fadhili; halimaanishi moja ya sifa hizo bali ni sifa hizo zote pamoja.” Tukipenda fadhili, tutaonyesha sifa hiyo kwa hiari; tunapata shangwe kwa kuwasaidia watu wenye uhitaji. Matokeo ni kwamba tunapata furaha inayotokana na kutoa.—Matendo 20:35.

“Kuwa na kiasi katika kutembea na Mungu wako.” Katika Biblia, neno “kutembea” linamaanisha “kufuata mwendo fulani.” Tunatembea pamoja na Mungu tunapofuata mwendo wa maisha ambao ametuonyesha katika Biblia. Tunapaswa “kuwa na kiasi” katika kufuata mwendo huo. Jinsi gani? Tukiwa na kiasi mbele za Mungu, tutachunguza kwa unyoofu hali yetu mbele zake na kutambua udhaifu wetu. Hivyo basi, maneno “kuwa na kiasi katika kutembea na,” yanamaanisha kuwa na maoni yaliyosawazika kuhusu mambo anayotaka tufanye na mambo tunayoweza kufanya.

Inapendeza kwamba Yehova hataki tufanye mambo yanayopita uwezo wetu. Anapendezwa kuona tunapojitahidi kabisa kumtumikia. (Wakolosai 3:23) Anaelewa udhaifu wetu. (Zaburi 103:14) Nasi, kwa kiasi, tunapotambua udhaifu huo, tunaweza kupata shangwe tunapotembea naye. Tunakuomba ujifunze jinsi unavyoweza kuanza kutembea pamoja na Mungu. Ukifanya hivyo, utapata baraka nyingi kutoka kwake.—Methali 10:22.